Labar na war yivai n'avut 12 - Ɗû na sɗik na wiini Alaw

Askarai n'e tipi pini David avut war Siklag

¹ War mefeŋ n'a na ka aŋ ŋoya wuzani Sawul n'ahini Kis war Siglag, ɗai zamai e hilisi pini buri e zini pini war hatam, e ɗi askarai na agulɗi a huna kai, e si siɗi edi ta mini hatam.

² E ɗi ɗai na gaini ɓaraw, viliyu lai tiɗi; gaini tiɗi sulu paŋ e kiɗi e ɵiɓi ɓaraw, e bili viliyu lai, arbaɗi ɗai zamai e ɗi zagalakaini Sawul tar war pini zibani Benyamin, e ɗi miɗi:

³ Ahiyezer n'abaiɗi gaini Yowas n'ahini Sema na Gibiya par, Yeziyel gaini Pelet alini Asmewet, Beraka gaini Yehu na Anatot par,

⁴ Yismaya na war Gabawon par a ɗif na agulni a huna kai, ɗai pini hu,

⁵ Irmeya, Yazyel, Yohan'an gaini Yosabad na Gedera par,

⁶ Elusai, Yerimot, Beyaliya, Semariyahu gaini Sefatiyahu na Huruf par,

⁷ Elkana, Yisiyahu, Asarel, Yowezer gaini Yasobeham na war pinzibani Kora,

⁸ Yoweba gaini Zebadiya n'ahini Yeroham na Gedor par lai.

⁹ Ɗai zamai war pinzibani Gat e ɗûklisi edi e hili pini David, e simni gaini war hlai zi ŋoyai edi war basga na kaɗataŋ, e ɗi ɗai na agulɗi a huna kai, n'e hitri ya miɗini hatam, e ɗi gaini gamar gaini kawakai lai war tiɗi, agulɗi a huna kai maini gurnai nɵa, kokolakai maini widre na sini huwuŋ nɵa lai.

¹⁰ Ezer ɗa a abaiɗi, Obadiya aga wulani, Eliyab a na ag'aŋ hu,

¹¹ Misma n'a na ag'aŋ puɗu, Yirmeya a na ag'aŋ ɵim,

¹² Atai a na ag'aŋ ɵaara, Eliyel a na ag'aŋ muguzak,

¹³ Yoaha n'aŋ a na ag'aŋ mitwis, Elsabad a na gaŋ ɵeeŋe,

¹⁴ Yirmeyehu a n'ag'aŋ, doogo Makbannai a na ag'aŋ doogo pi ktai.

¹⁵ Hanɗa e ɗi abakaiɗi askarai na war pinzibani Gat, n'agwi arbaɗi a ŋa midiɗi askarai miya ɗaw, n'abai arbaɗi a ŋa midiɗi askarai dubu ɗaw lai.

¹⁶ E ɗi nagai n'e vigi ra na Yurdan amai war tile n'avut war hlai na yem a tika amai haa a huŋva edi miɗini daŋ, e ɵimiɗi ɗai n'e simni warni huduk na ɵimaɗi piɗi futi na koskoi sek gaiɗi na dawai par paŋ.

¹⁷ Ɗai zamai na war pinzibani Benyamin gaini Yuda lai e hilisi sini David war hlaini zi ŋoyai,

¹⁸ David a niyasi anene miɗi a miɗiɗi: na ɓa ki hilisi sa na war ɵeɗ, aŋ zini pa lai ɗa, aga mu yimiki sa gaiɗi agula paŋ, amma na ɓa hiliki ɗa a hili zi rhai kapai ki siŋa tiɗi gawŋa paŋktai ta a tetema wala na meefeŋ kai, Alaw na wiiɗi tamaimu a zaida, aga a ziti sariya hanɗa.

¹⁹ Nɵa seze na wiini Alaw a niya warni Amasai abaini vok n'askarai warni hu, a muɗa: tiyi mi ɗi ɗaiku David, tiyi mi ɗi ɗaiku ahini Esai, ɵeɗ a sumna muduku, ɵeɗ miɗini ni n'a zina puku, David a yimiɗi sini, a ziɗi aŋ abakai arbaɗi vokɗi askaraini.

²⁰ Ɗai zamai war pinzibani Manase par e hili pini David, won hlai n'a halasi gaiɗi Filistrekai aŋ hitimi Sawul. Amma David gaiɗi ɗaini e kiɗi e zini piɗi Filistrekai kai buri war kitini mi na wiiɗi abakaiɗi Filistrekai, e siki David edi sak ɓa a hitima gaiɗi kai, e miɗi aga David a fuɗumu tumu edi kafa kapai a tapa arbani gaini Sawul n'epigezani.

²¹ Won hlai na David a hala war Siglag, ɗai na war pinzibani Manase e tipi gaini, e ɗi miɗi: Adna, Yosabad, Mikayel, Yozabad, Elihu gaini Cilletai, nagai paŋ e ɗi abakaiɗi askarai n'e ŋi midiɗi askarai na dubu ɗaw ɗaw war pinzibani Manase,

²² E ɗi nagai n'e zini pini David gaiɗi vok na wiini buri nagai paŋ e ɗi ɗai na agulɗi a huna kai, e bindi aŋ bagakai arbaɗi askarai na wiini.

²³ Mefeŋ paŋ ɗa ɗai e hilisi sini David aŋ zini pini, haa vokɗi askarai na wiini e bindi viya maini vokɗi askarai na wiini Alaw nɵa.

Pɵaɗi askarai n'e hilisi pini David war Hebron

²⁴ Pɵaɗi ɗai n'e zizini siɗi mini hatam, n'e hilisi pini David war Hebron aŋ sitini pai na wiini Sawul pini miɗi na wiini EPIƊ-ƊAI a na maini nɵa:

²⁵ War pinzibani Yuda, askarai na gaini gamar, gaini kawai lai tiɗi e ɗa ɗai dubu ɵaara gaini miya mitwis,

²⁶ War pinzibani Simeyon, askarai na agulɗi a huna kai ɗai dubu muguzak gaini miya ɗaw,

²⁷ war pinzibani Levi, askarai dubu puɗu gaini miya ɵaara,

²⁸ gaini Yoyada abaini pinzibani Aaron, gaiɗi ɗai pini dubu hu gaini miya muguzak lai.

²⁹ Gaini Sadok gawla zi hatam na agulni a huna kai gaiɗi ɗai n'abakai caaɓa pi sulu na war pinzibani par lai.

³⁰ War pinzibani Benyamin, na zagalakaini Sawul tar askarai dubu hu na haa sini mefeŋ ni ta, abaiɗi e ɗi fu war sda na ahani Sawul.

³¹ War pinzibani Efrayim, ɗai na agulɗi a huna kai na yikiɗi a wa gara arbaɗi pinzibaɗi lai ɗa askarai dubu caaɓa gaini miya mitwis.

³² War galni pinzibani Manase na war piɗi futi na koskoi sek, askarai dubu doogo pi mitwis n'e virisi edi gaini yikiɗi yikiɗi buri e hilisi e tiki David aŋ pai.

³³ War pinzibani Isakar, n'e siɗi ɓrawni hlai kapai e siŋkiɗi wiiɗi aliɗi Izrayel wala n'e siɗi e ziŋ, askarai n'abakai miya sulu gaiɗi nagai n'e ɗa pini paŋ lai.

³⁴ War pinzibani Zabulon, askarai na siɗi gaini si edi ta mini hatam gaini wazagaiɗi zi hatam, na agulɗi pal ɗai dubu ɵim.

³⁵ War pinzibani Neftali, abakaiɗi askarai dubu ɗaw, askarai na piɗi hu pi muguzak, gaini gamar gaini kawakai lai tiɗi.

³⁶ War pinzibani Dan, askarai dubu caaɓa pi mitwis gaini miya ɵaara siɗi gaini zizini mini hatam.

³⁷ War pinzibani Aser askarai dubu puɗu gaini zizini mini hatam.

³⁸ Anene duɓani ra na Yurdan par, war pinzibani Ruben, Gat gaini galni pinzibani Manase lai, askarai dubu miya gaini caaɓa gaini wazagaiɗi zi gaw paŋ tiɗi.

³⁹ Askarai zi hatam hanɗa paŋ, na siɗi gaini si edi ta mini hatam, e hilisi gaini hiini ktai war Hebron aŋ tiki David aŋ pai midiɗi Izrayel paŋ, aliɗi Izrayel na zamai ɗa paŋ e hilisi gaini hiini ktai lai ɓa e tiki David aŋ pai.

⁴⁰ E simni gaini David woni haa mefeŋ hu, e simi, e si wazagai paŋ na tawalakaiɗi na war Hebron e ziziniŋ buriɗi ɗa.

⁴¹ Ɗai na war hlai ni par haa sini afti na wiini Isakar, na wiini Zabulon gaini Neftali lai e libisi wazagai zi simi viya miɗini Ablehökai, ɵigini, miɗini Plasai Atoŋo gaini garakai lai. E libisi avudi, gamla na wiini alini luwuŋ Fige, alini luwuŋ zi vin na huleŋ, vin, emel, wazagai n'e zini puɗu puɗu n'abakai gaini n'agogoi lai viya kadai, buri firiyi n'abai a na fu aha war Izrayel.