Lucas 24 - Yura porciones de la biblia

Jesús daitaxakĩ wididi

¹ Peda rawe ikadu domingo wenamari pishtakui na iniwu itipiniwaitawuya awĩwuu wediwu Jesúspa awẽ kaya Josépa waitadu.

² Na bakex kiniwã adu wekaxu uĩyawu na bakex kiniwã apekebea idi.

³ Ikiwaĩkata uĩyawu adu Diaiwu Jesúspa awẽ kaya idiba.

⁴ Ea dikapu. A udua tapipaiyaiwudu iriyaui dukuwede rawe atu wewu nitadiwu. Atũ saweti chaxakui idiwu.

⁵ Naskaiwudu awĩwuu ratekadi baiki rakapakewuwã atũ bapu baiki ratapakewuwãdiwu. Naa dukuwede raweta atu yuidiwu: “Na yura daawu watiruwu aduxu yura dia wedayabakawe.

⁶ Duduba. Daitaxakĩ ma widia. Shinakawe na Galilea bai aduxu batuwe diyuxu Jesúspa batu yuita:

⁷ ‘Dukuwene Wake udua yuikĩ ẽ udua ẽ batu yuinu. Tsuã yurawu chakabiswu Dukuwene Wake achibaxiwiki. Naawawe tabla rawe kuña ikaki wetsawu ea bastabaxikadiki. Me daitadu iki ma tres peda ikadu ẽ widixiwi’, Jesúspa batu waita”, na dukuwede raweta atu wadiwu.

⁸ Naskawaiwudu na Jesúspa atu yuidi keskara shinatadiwu.

⁹ Na bakex kiniwãduax dasukata na uĩyawuya na dikawuriwi na Jesúspa nichipaudiwu onceya naatiiwi na atuwe ichanawuriwi atu yuidiwu.

¹⁰ Na atu yuidiwawe atũ adewu duduri María Magdalena, Juana, Santiagopa awẽ awa María, awĩwu wetsawu atuwe raweawuriwi nawawe atu yuidiwu.

¹¹ Na Jesúspa nichipaudiwawe atuwe ichanawuweta naa awĩwuu atu ikũira wadiwuba. Shinadiwu: “Atũ tsai aũ ikabakui”, idiwu.

¹² Naskawiax Pedro widinakawata ichudi bakex kiniwã mera uĩ kai. Dukuta kakupakekawa rakutiwu linona wisti uĩdi naawawe Jesúspa awẽ kaya rakuitawu. Pedropa duduri shinayana: “¿Aweskai iskame?” shinayana kadi.

Auxũ tapipaudiwu rawe wuwaiwudu Jesúspa atu shinawerãdiyudi

¹³ Ea dikapu. Na pedata domingo waidu Jesúsuxũ tapipaudiwu rawe pexe ichapabadu awẽ ade Emaús wukadi idiwu. Yurawu pexe ichapa Jerusalén aduax wukadi once kilómetro wukata Emaús dukupaudiwu.

¹⁴ Na Jerusalén aduax awarawu ikita na udua na rawe tsaiwudiwu.

¹⁵ Tsaiwuwaiwudu Jesús awikui atuki udi. Naduax atuwe kadi.

¹⁶ Naskawiyaitu unadiwuba. Atũ weru unatiru idiwuba.

¹⁷ Jesúspa atu ñukadi: “¿Awana ma tsaiwui kaime?” atu waidu netediwu. Shinabetsai idiwu.

¹⁸ Auxũ tapipaudiwu wistichi awẽ ade Cleofás naatu kebadi: “Jerusalén adu mi iwiyaitaxakĩ ¿beres wistichi na ikita mi tapiabame?” wadi.

¹⁹ Jesúspa atu ñukadi: “¿Awa aweskaitame?” atu waitu “Jesús na Nazaret adu ipaudi na udua nu tsaiki. Na Jesúspa yurawu yuiwawaĩda dikaxu na awawaĩda uĩkaxuriwi Diospa naatiiwi yurawuweta Jesús uĩwawaĩdawu profeta bitsisipakui ikakaĩda.

²⁰ Naskaweke sacerdotewawe atũ diaiwuuweta nuku diaiwuwawe diaiwu adu Jesús iyudiwu naatu Jesús yuinu: ‘Na mi aka uduax mi dai’, wanu. Naskadu soldadowawe tabla rawe kuña ikaki bastaitawu.

²¹ Aka nuuwawe na dukuwede dayuabadu nu shinawawaĩda: ‘Naatu duku na Israelpa awẽ rewuduwu duku comprawaaxiwi nu awena inu’, nu ikakaĩda. Naskaweke tres peda aki ma ika na daita.

^22-23 Naskaweke wenamari pishtakui awĩwuu na duwe rawetiruwawe na Jesúspa awẽ kaya waitawu adu wukaxu uĩyawu awẽ kaya adu ikaba. Ariax dasukaxu duku yuiyawu: ‘Na dai arixu Diospa tsai webiswawe duku wichibadawu. Duku yuiyawu: “Jesús dia”, duku waawu’, awĩwuwawe duku waawu. Na udua duku yuiyaiwawe nu wetsa keskara.

²⁴ Naskata atiriwi duwe rawebiswu na Jesúspa awẽ kaya waitawu adu wukaxu uĩyawu na awĩwuwawe yuiyawu keskara naskarakui ika. Naskaweke Jesús uĩyawubakia”, waiwawe

²⁵ Jesúspa atu yuidi: “Ma wena dikatapititiruba. Naatiiwi na profetawawe yuidiwu ma wena ikũira watiruba.

²⁶ Na Diospa kañawadi naatiiwuna atũ Diaiwu inu naa ubiskuita ubiskuitiru ikita dai mera kayuaxba awẽ kaya na warĩ chaxai keska chaxayuabax”, Jesúspa atu wadi.

²⁷ Naskata Jesús awi yuikĩ atu dikatapitibadi na a udua kedeawutii Diospa tsai adu. Taewakĩ na Moiséspa kededi naatiiwi na profetawawe kedediwuya atu dikatapitibadi.

²⁸ Naskadu na pexe ichapaba dukupaiyaiwu adu ma dukuwaiwudu Jesúspa na pexe ichapaba winuwaĩdi kaisadi.

²⁹ Naskaitu kexunawadiwu: “Duwe netewe. Ma wari kaaki. Ma yabei”, wadiwu. Naskake pexe adu ikikaĩdi nadu atuwe netexikĩ.

³⁰ Atuweta ma piixikĩ Jesúspa pan tsubaxu kiwĩdi: “Epã, ẽ biki idibai. Mia duku piti ina”, wadi. Pan kaxketa atu inadi.

³¹ Atu inaidu nadu unatiru idiwu. Jesús unadiwu. Naskawia yabarisatadi.

³² Na rawe yuinadiwu: “Datiã nu tapia aweskakĩ nuku uĩti meraxu nu sharakui beetadamaiki na waĩ ui duwe tsaiweaidu Diospa tsai duku dikatapitibaweaitu dikakĩ”, idiwu.

^33-34 Naskata widiniwuwakata Jerusalén adu dasuwaĩdiwu. Na Jesúspa nichipaudiwu onceya na atuwe ichanawu atu wichitushidiwu. Nawawe na rawe yuidiwu: “Ikũ. Nuku Diaiwu daitaxakĩ ma widia. Simón wewu ma ditada”, wadiwu.

³⁵ Naskawaiwawe na raweta na wai nexpakaya adu ika keskara atu yuidiwu. Naskata yuidiwu: “Chipu duku pan kaxkexuwaitu uĩkĩ nu una”, atu wadiwu.

Na Jesúspa nichipaudiwu na atuwe ichanawuya atu nexpakaya Jesús ditadi

³⁶ Na pexe ichapaba Emaús adua dasua raweta na Jesúspa nichipaudiwuya na atuwe ichanawu atu yuiyaiwudu Jesús atu nexpakaya ditadi. “Ma isharata inu”, atu wadi.

³⁷ Naskaidu “Waka”, raikadax besta idiwu. Ratediwu.

³⁸ Naskaiwawe Jesúspa atu yuidi: “¿Aweskai ma rateime? ¿Aweskawakĩ ma shinaime: ‘Jesúsraka dayuaki’, ma ikime?

³⁹ Ewẽ meke rawe ewẽ tae raweriwi uĩkapu. Ẽẽkai wetsaba. Ea beekapu. Uĩkapu. Ẽ dabiya. Ẽ xauya. Ẽ wakax ẽ iskara ikeradaba”, atu wadi.

⁴⁰ Naskawata awẽ meke raweya awẽ tae rawe atu uĩbadi.

⁴¹ Naskaitu uĩkadi idibakadax wetsa keskaradiwu. Naskawia na Jesúspa atu yuiya ikũira wayudiwuba. Naskake Jesúspa atu ñukadi: “¿Dudu pitime?” atu wadi.

^42-43 Shima dabi xuiya inadiwu. Wita uĩyaiwudu pidi.

⁴⁴ Naskata atu yuidi: “Na ea ubiskuibaitawu keskara na ẽ ika keskaraya ẽ batu yuiwawaĩda ẽ batuwe iyuxu. Ẽ batu yuiwawaĩda: ‘Diospa ẽ udua Moisés kedebadi. Na profetawawe ẽ uduari kedediwu. Na Dios udua wadawu kedediwawe ẽ uduari kedediwu. Na ẽ udua kedediwutii naskaxiwi’, ẽ batu wawawaĩda”, Jesúspa atu wadi.

⁴⁵ Naskata Jesúspa atu dikatapitibadi Diospa tsai.

^46-47 Atu yuidi: “Diospa tsai adu duduri kedea na Diospa kañawadi naatiiwuna atũ Diaiwu inu naa ubiskuita danupukui idi. Tres peda aki ikadu widinupukui idi. Diospa tsai adu duduri kedeari awẽ adeuxũ awẽ yurawawe xukuwutii yuinupukukadi idi ana chakayabaxikakĩ shinanuwu na chakabiswu aduri Diospa ana shinayabanu. Naduri yuikakĩ pexe ichapa Jerusalén aduxu atu yuikĩ taewanupukukadi idi.

⁴⁸ Na ẽ udua kedeawu keskaitu maawawe ma uĩya. Naskake nawu udua wetsawu atu yuikawe.

⁴⁹ Ea dikakapu. Na ewẽ Epã batu yuidi batu inayaxakĩ naa ẽ batuki nichixiwi. Da Jerusalén adu netekawe Espíritu Santo badaxikakĩ. Dai ariax uuxiwi na uduax maawu bitsisipa iixikakĩ. Na uduax bitsisipa ita Jerusalén adua ma tseketiru”, Jesúspa atu wadi.

Jesús dai mera kadi

⁵⁰ Pexe aduax tseketa Jesúspa na nichipaudiwuya na atuwe ichanawu pexe ichapa Jerusalén aduxu iyuta pexe ichapa Betania chaiba atu iyudi. Meshainakawãta atu yuidi: “Dios batu sharawanu”, atu wadi.

⁵¹ Naskawayana atubakiduax kaidadi Apã dai ari iyuwaidu.

⁵² Naskaidu Jesús duikakĩ rachatubepakewuwãdiwu. Naskakata Jerusalén adu dasudiwu idibakuiyana.

⁵³ Na pedatiiwi oración pexe adu dipaudiwu “Dios sharakui”, waaxikakĩ.