Lucas 10 - Yura porciones de la biblia

Jesúspa setenta y dos yurawu atu nichidi Diospa tsai yurawu yuinuwu aturi kayawatanuwu

¹ Diaiwu Jesúspa dukuwedewu awe wupaiyaiwu atu tapibata xuku wetsa ikĩwadi. Setenta y dos yurawu idiwu. Atu ikĩwata atu reke nichidi. Rawe nichita wetsa adu rawe nichita naatiiwi atu nichipakedi pexe ichapa adu wukata pexe ichapabawu aduriwi wuwasatanuwu na Jesús kaaxiwai adutii.

² Wuawubaadu Jesúspa atu Dios udua yuikĩ tsai wetsawaxu atu yuidi: “Bae iwawe awẽ yuduwu ma ikawu. Ichapakui. Naskawia yudubiswu ichapabawu. Naatiiwi wikakĩ adaititiruwubaki. Bae iwu kexunawakawe yudubiswu nichinu awẽ yuduwu wixui wunuwu.

³ Wutakawe. Ea dikakapu. Ẽ batu nichi na yurawu besewu adu. Basharunu oveja awẽ wake retepaitiru keskara na yurawawe batu retepaitiruwu.

⁴ Pei sapa wutaba upu wuyabakawe. Sandalia wetsa wuyabakawe. Waĩ kai wetsawu ma wichixu tsua tsai ayabakawe.

⁵ Pexe wetsa mera ikixu nadu ikawu reke yuikawe: ‘Dios batu sharawanu dudu isharata ma inu’, atu wakawe.

⁶ Nadu yura isharata ikaitu Diospa na yura sharawaaxiwi. Naduax tsua isharata iyabaitu Diospa atu sharawaaxiwiba.

⁷ Ma xanene ikadax nadu wisti uxakawe. Xane wetsa adu uxata xane wetsa adu uxata iyabakawe. Naduxu na awara batu pibaiwu pikawe. Awara batu ayabaiwu ayakawe na yuduaiwawemai atũ pei sapawu witiruwu.

⁸ Pexe ichapa adu ma dukuwaitu na batu iwiyaiwawe batu pibayaiwu pikawe.

⁹ Naduxu na isinikaiwu atu kayawakawe. Atu yuikawe: ‘Dios yurawawe atũ diaiwu ikiyua’, atu wakawe.

¹⁰ Pexe ichapa adu ma dukuwaitu nadu ikawawe batu iwiyabaiwawe xawakawi yura ichapa ichanatiruwu adu kaxu atu yuikawe:

¹¹ ‘Na ma ikadua bapuruku nu ta tawaĩdikaini. Naskaxu nu batu uĩbai batuki Dios idibaiba. Naskawia duduri tapikawe: datiã Dios yurawawe atũ diaiwu itiru’, atu wakawe.

¹² Diospa yura chakawu ubiskuibakĩ na pexe ichapa Sodoma adu ipaudiwu atu ubiskuibanupukui. Na batu iwiyabaiwu atu ubiskuibakĩ widanupukuiki”, Jesúspa atu wadi.

¹³ Naskawata Jesúspa yura wetsawu atu yuidi: “Pexe ichapa Corazín adu ikawawe, pexe ichapa Betsaida adu ikawaweriwi, ẽ batu yuinu. Awara chaka batu ixuxiwi. Na Dios wistichi atiru keskara ẽ batu uĩbawiake ma ana chakayabaxikĩ ma shinaba. Na yura chakawu pexe ichapa Tiro adu ipaudiwu na yura chakawu pexe ichapa Sidón adu ipaudiwuya atu na ẽ batu uĩba keskara ẽ atu uĩbaidu naawu ana chakayabaxikakĩ datiãbakui shinakeradiwu. Saweti pere peresitsa saweta chii bapu adu tsaukeradiwu.

¹⁴ Na pexe ichapa Tiro adu ipaudiwu na pexe ichapa Sidón adu ipaudiwuwe ana chakayabaxikakĩ shinayabawawe na Diospa yurawu yuinupukuwaitiã watuwu ubiskuibaimaiki atu yuita naawu atu ubiskuibanupukui. Pexe ichapa Corazín adu ikawawe, pexe ichapa Betsaida adu ikawaweri, ẽ batu yuinu. Diospa batu ubiskuibakĩ widanupukui.

¹⁵ Pexe ichapa Cafarnaúm adu ikawawe, ẽ batu yuinu. Na dai mera ikawawe na ma abiswu udua yuisharaxikadibaki. Na chakawu dakadax wutiruwu adu Diospa batu putaxiwi”, Jesúspa atu wadi.

¹⁶ Naskawata Jesúspa na setenta y dos dukuwedewu nichiyaitii atu yuidi: “Na ẽ batu tapibabiswu yurawu atu yuitakawe. Ẽ batuwe kayabawiyaidu watura wetsã batu dikakĩ eariwi dikai. Watura wetsã batu dikakaspakĩ eariwi dikakaspai. Watura wetsã ea dikakaspakĩ na ea nichidiriwi dikakaspai”, atu wadi. Naskawata na setenta y dos dukuwedewu na atu yuiya aki wukadi wudiwu.

¹⁷ Jesúspa ma atu nichiyabeadu na setenta y dos dukuwedewu aki dasudiwu. Idibayana yuitushidiwu: “Diaiwũ, nu waka keskarawu duduri nu atu yuita: ‘Diaiwu Jesúspa duku yuibisadu nu batu putai’, nu atu waitu duku ikũira wadiwu”, wadiwu.

¹⁸ Jesúspa atu yuidi: “Yurawawe atũ kaya meradua maawawe waka keskarawu putaidu me uĩwawaĩda Satanás dai ariax pakeaitu. Kushi pakeyabea kada keskara.

¹⁹ Ea dikakapu. Ẽ batu yuita maawawe na ẽ batu yuitauxũ ruduwu titirikawuya naawu ma peaba peabatiru inu na yurawu duikaspabistu batu chakawapaiyaitu ma winutiru inu. Awa pishtakai batu chakawaaxiwiba.

²⁰ Naskawia waka keskarawawe batu dikayaiwawe uĩyax a uduax idibayabakawe. Idibakawe dai mera ma matu ade libro adu kedeaki”, Jesúspa atu wadi.

Jesús Apaki idibadi

²¹ Na setenta y dos dukuwedewuwe tsaita Jesús Espíritu Santo uduax idibakuikĩ kiwĩdi: “Epã, mi dai iwu. Mi bai iwu. Ẽ bia yui mi sharakui. Na ẽ da yurawu yuiya mi na tapiwaĩkawu na awara tapitiruwuya atu mi tapibaaba tapiyabanuwu. Na kedebiswuba mi atu tapiba. Naskara mi duiya, Epã”, Apa wadi.

²² Naskawata yurawu atu yuidi: “Dios ewẽ Epã ea naatiiwi inadi. Epa Dios wistichi ea tapikuiya. Ẽ wistichi Epa Dios tapikuiya. Na yurawu ẽ atu Epa Dios tapibapaiyaiwu naawaweriwi tapikuitiruwu”, atu wadi.

²³ Naskawaxu na auxũ tapipaudiwuki iwiakekawã atu wisti yuidi: “Na Dios wistichi atiru keskara ẽ akaitu wetsawuweta ma uĩtiru. Naskax wetsawuwe ma idibatiru.

²⁴ Naa ma uĩyai keskara profeta ichapaweta diaiwu datukui ichapawawe uĩpaiwikakĩ uĩdiwubaki. Na ma dikai keskara dikapaiwikakĩ dikadiwuba”, Jesúspa atu wadi.

Samaritano udua Jesúspa atu yuidi

²⁵ Ea dikapu. Yurawawe Jesús dikayaiwudu dukuwene na Diospa Moisés kedebadi yurawu atu tapibapaudiwu wetsa nadu idi. Naa widinakawãdi Jesús ñukaxikĩ. Tapipaidi Jesúspa kebasharaimaiki. Yuidi: “Diaiwũ, ¿ẽ aweskatirume Dioswe ipaxakĩ?” wadi.

²⁶ Jesúspa kebadi: “¿Na udua Diospa yurawu kekẽxu Moisés waniri kedebadime? ¿Na Diospa Moisés kedebadi udua waniri mi dikaime?” waitu

²⁷ “Diospa Moisés duduri kedebadi: ‘Diaiwu Dios naa mi ikũira watiru naa duikĩ duikuiwe. Dios duikĩ mewẽ yura bitsiswainiwuwata Dios yuduxuwe. Shinainiwuwa Dios duiwe. Na mewẽ chaiba ika duiwe na biwikui duiyai keskai’. Naduri Diospa Moisés kedebadi”, na dukuwene na Diospa Moisés kedebadi yurawu tapibapauditu wadi.

²⁸ Naskawaitu Jesúspa yuidi: “Mi yuikuiya. Naskawe daax Dioswe ipaxakĩ”, wadi.

²⁹ Naskawaitu dikakĩ Jesúspa shinanu: “Na ea ñuka bitsisipa”, rainu na dukuwene awiana wetsa Jesús ñukadi: “¿Watu ewẽ chaiba ikame?” wadi.

³⁰ Naskawaitu Jesúspa yuidi: “Dukuwede pexe ichapa Jerusalén aduax pexe ichapa Jericó adu tisiribekaĩdaitu yubetsuwawe achidiwu. Awẽ awarawuya na saweti saweawuriwi wiãdiwu. Kushadiwu. Dabakĩ rashkikata uĩwaĩdiwu.

³¹ Ma naskawawuadu na waĩ kakĩ sacerdotepa dukuwede raka wichikai tapia idiba. Ma wichita wai kexka wetsauri kakĩ uĩwaĩdi.

³² Dukuwene sacerdotewuweta yudubis kakĩ naaturi naskawawaĩdi. Wai kexka wetsauri kakĩ uĩwaĩdi.

³³ Naskaweke samaritano na waĩ kakĩ na dukuwede wai ketukunu raka adu dukudi. Uĩkĩ ubisbadi.

³⁴ Aki kaxu na kushawu adu vinopa ata xini adi. Vendawawe raxedi. Naskata awẽ asno mamakaya nichixu iyudi dukutiruwu pexe adu. Naduxu kexedi.

³⁵ Kexeshita denario rawe pexe iwu inadi kexenu. ‘Da dukuwede ea kexesharaxuwe. Da pei sapawu ẽ bia inai daayabaitu mewẽ pei sapauxũ awara mi wixutiru. Ana uxũ na mi gastaitatii ẽ bia nasuxiwi’, wadi”, Jesúspa naduri yuidi.

³⁶ Naskawata Jesúspa na dukuwene na Diospa Moisés kedebadi yurawu atu tapibapaudi yuidi: “Tres dukuwene na yubetsuwawe kushawu uĩdiwu. Mi shina ¿na treswawe uĩkadax watu awe chaiba ika nadu idime?” Jesúspa wadi.

³⁷ Na dukuwene kebadi: “Na ubisbadi”, wadi. Jesúspa yuidi: “Naskatawe”, Jesúspa wadi.

Jesúspa Martaya María uĩ kai kadi

³⁸ Jesús na auxũ tapipaudiwuwe pexe ichapa Jerusalén adu kai puchini pexe ichapaba adu dukudiwu. Naduxu awĩwawe awẽ ade Marta ipauditu awẽ pexe adu Jesús iwidi.

³⁹ Marta awẽ chikuya ipaudi. Awẽ chikũ awẽ ade María ipaudi. María Jesúspa awẽ tae rawe chaiba tsaupakekawãdi. Jesúspa yuiyaitu dikai idi.

⁴⁰ Martapa awarawu aki shinachakadi. Naskake Jesús adu kaxu Martapa Jesús yuidi: “Diaiwũ, ¿mia shinaibame? Ewẽ chikũ eweta awa yuduiba. Yuiwe ea ayudawanu”, wadi.

⁴¹ Naskawaitu Jesúspa kebadi: “Martashtã, awarawu akĩ mi shinachakayana mi kushi kushipai.

⁴² Maríane ea dikai keskawakĩ ea dikayuwe. Na wisti mi ayutiru. Maríane na sharakui shina ea dikaxikĩ. Tsuã María ‘Jesús dikayabawe’, watiruba”, wadi Jesúspa.