Juan 9 - Yura porciones de la biblia

Dukuwede wexu kaĩdi Jesúspa kayawadi

¹ Jesús kakĩ dukuwede wexu kaĩdi uĩdi.

² A udua tapibiswawe ñukadiwu: “Maestrõ da dukuwede aweskai wexu kaĩdime apaweta awa chaka uduax iyabai awẽ chaka uduaxraka”, wadiwu.

³ Jesúspa atu kebadi: “Awẽ chaka uduax kaĩdiba apaweta awa awẽ chaka uduaxri kaĩdiba. Naskara kaĩdi Epa Dios awẽ bitsisipa kayawaitu ma uĩnu.

⁴ Pedayuadu na ea nichidi nu yuduxutiru. Ma yabeaidu nu yudutiruba.

⁵ Da bai adu ẽ iyuax na ẽ peda keskara na baitiu ikawu ẽ atu chaxai”.

⁶ Naskata baiki kebu bechuta bai bechanawaxu dukuwede awẽ weruki wetekere adi.

⁷ Naskata yuidi: “Iã kawasharadua kata chukitawe pozo awẽ ade Siloé”, Jesúspa wadi. Tsai wetsa “Siloé”, yuipai “Nichia”. Naskata dukuwede wexu kata chukita ma uĩtiru idi.

⁸ Na wexu uĩwawaĩdawawe awẽ chaiba ikawawe yuidiwu: “Da tsauwax pei yukakabekakaĩda”, wadiwu.

⁹ Wetsawawe: “Naa”, wadiwu. Atiriwawe: “Aaba. Naa keskara”, wadiwu. Ikakaĩdatu: “Naa ẽ”, atu wadi.

¹⁰ Naskata ñukadiwu: “Aweskawaxu mi uĩme”, wadiwu.

¹¹ Naskaiwawe atu kebadi: “Na dukuwene awẽ ade Jesús bai bechawaxu ea wetekere aka ewẽ weruki. Naskata ea yuiya: ‘Karaya awẽ ade Siloé aduax wechukubetawe’, ea waa. Naskata ẽ wechukubea ma ẽ uĩtiru ika”, atu wadi.

¹² Naskake ñukadiwu “Wanime a dukuwede”, waiwawe: “Ẽ tapiaba”, wexu ikakaĩdatu atu wadi.

Na wexu kaĩdi uĩyaitu fariseowawe ñukadiwu

¹³ Dukuwede wexu ibis fariseowu adu iyudiwu.

¹⁴ Jesúspa peda tedetitiã sábadowaidu dukuwede wexu kayawake.

¹⁵ Naskata fariseowawe na wexu ibis ñukadiwu uĩyaitu naatu atu kebadi: “Jesúspa bai bechawaxu ea wetekere akadu ẽ chukia. Naskake ma ẽ uĩ”.

¹⁶ Atiri fariseowawe yuidiwu: “Da iskara aka Epa Diosnaba peda tedetitiã sábadowaidu ikũira waiba”. Naskaweke wetsawawe: “¿Aweskawaxume tsuã atiruba keskara atirume chakawixu?” ikadax awirasi ikũira watanadiwuba.

¹⁷ Awiana na wexu ibis ñukadiwu: “¿Mewẽ weru bia kayawaxua mi tsuara mi waime?” Na wexu ibistu atu kebadi: “Naatu Epa Dios tsai yuibis”, atu wadi.

¹⁸ Naskaweke judíowawe naa wexu ibis ikũira wabiswuba uĩwiyaitu. Apa kedata awa kedadiwu.

¹⁹ Naskakata ñukadiwu: “¿Da matu wakeme wexu kaĩdi? ¿Aweskawaxu ma uĩme?”

²⁰ Apaweta awã kebadiwu: “Da nuku wake wexu kaĩdi.

²¹ Nu tapiaba tsuãra kayawaa ma uĩ. Ñukakawe. Ma dukuwedeaki awikui batu yuinu”.

²² “ ‘Epa Diospa Jesús kañawadi’, tsuara ikaitu nuku ichanati pexe adu ikitiruba”, judíowu ikaiwawe dikakadi apawe awa besediwu.

²³ Naskake: “Ma dukuwedeaki ñukakawe”, apaweta awã fariseowu wadiwu.

²⁴ Judíowawe wexu ibis awiana ñukadiwu: “Duku yuikuiwe: ‘Epa Diospa ea kayawaa’. Ma nu tapia naa dukuwede chaka”, wadiwu.

²⁵ Naskaiwawe atu kebadi: “Ẽ tapiaba chakaraiki. Datiã ma ẽ uĩtiru. Ẽ wexu ibis”, atu wadi.

²⁶ Judíowawe ana ñukadi: “¿Aweskawaxu bia kayawaame?” wadiwu.

²⁷ Dukuwene ana kebadi: “Ma ẽ batu yuiwiyaitu ea ma ikũira waaba. ¿Aweskakĩ ana ẽ batu yuitirume? ¿Maariwi a udua tapibiswu ma ipaime?” atu wadi.

²⁸ Judíowawe ichãkata yuidiwu: “Mi naa dukuwede ikũira wawe. Nuuwawe Moisés nu ikũira wai”, idiwu.

²⁹ “Ma nu tapia Epa Diospa Moisés tsai adi. Naa dukuwede nu tapiaba wakiax uame”, Judíowawe wadiwu.

³⁰ Dukuwene atu yuidi: “Ma tapiaba wakiraduax ua. Askataba uxũ ewẽ weru ea kayawaxua.

³¹ Ma nu tapia yura chakawu Epa Diospa dikapaitiruba. Askataba na aki idibaiwu naatu duiyai akaiwu atu dikatiru.

³² Wani pishta ẽ dikabisba wexu kaya na kaĩditiã nu uĩbisba uĩyaitu.

³³ Epa Diospa nichiyabadike ẽ kayakeradaba”, dukuwede idi.

³⁴ Naa dikakakĩ judíowawe kebadiwu: “Mi chakakui kaĩdi. ¿Aweskai mi duku tapibapaime chakawixu? Nuku ichanati pexe adu ana mi ikitiruba”, wadiwu. Naduxu putadiwu.

³⁵ Jesúspa dikadi naa dukuwede wexu ibis ichanati pexe aduxu nichiawu. Naskaxu wedata wichixu ñukadi: “¿Dukuwene awẽ Wake mi ikũira waame?” Jesúspa wadi.

³⁶ “Diaiwũ, ¿naa dukuwede tsuame naa ẽ ikũira wanu?” dukuwene wadi.

³⁷ Jesúspa kebadi: “Naa mi awe tsaiki naa ẽ”, Jesúspa wadi.

³⁸ Jesúspa uĩyaidu titipakekawã: “Diaiwũ ẽ bia ikũira wai”, wadi.

³⁹ Naskata Jesúspa atu yuidi: “Ewẽ Epa Dios ikaduax ẽ bai adu udi ikũkui. Ẽ atu uĩyuiyudi. Na wexu uĩnuwu ẽ udi na uĩyaiwawe awiana wexunuwu”, Jesúspa atu wadi.

⁴⁰ Naa dikakakĩ fariseowawe Jesús ñukadiwu: “¿Nuriwi nu wexume?” idiwu.

⁴¹ Naskaiwawe Jesúspa atu kebadi: “ ‘Nu wexuba nu chakabisba’, ma ika. Naskaweke ‘Ma nu uĩtiru’, raika matu chaka naskaspakedaka”, Jesúspa atu wadi.