Juan 5 - Yura porciones de la biblia

Jesúspa dukuwede katiruba Betzatá aduxu kayawadi

¹ Awetiira uxe ikadu judíowawe fiesta waiwudu Jesús Jerusalén dasudi.

² Jerusalén adu ovejawawe atũ kaĩti idi. Judíowawe ede kawashara chetea adekakĩ Betzatá, wapaudiwu. Nadu cinco pexe tapas kawashara.

^3-4 Nadu yura isinibiswu ichapawu idiwu. Nadu rakawawaĩdawu idi. Wexuwu chatuwu naawu isinibiswu na pexe tapas kawashara adu rakawu idiwu. Epa Diospa awẽ ángel ede adu wutuxu ede wechu wechuwaidu na isinikaiwu reke dashi taeax kushi kayabiswu. Nawuwawe Epa Diospa awẽ ángel badabiswu ede wechu wechuwaiyunu.

⁵ Jesús nadu dukuxu dukuwede wichidi treinta y ocho wari isinibis idi.

⁶ Dukuwede widibisba raka wichixu Jesúspa tapidi kabisba idi. Naskaxu ñukadi: “Mi kayapaime”, Jesúspa wadi.

⁷ Naskawaitu dukuwene kebadi: “Diaiwũ tsuã ede adu ea iyubisba. Ede wechu wechu ikaidu ẽ dashipaiwiyaitu ea xitibiswu”, wadi.

⁸ Jesúspa yuidi: “Widinakawata katawe. Na mi aki rakabis wutawe”, Jesúspa wadi.

⁹ Naskawatadaidu na dukuwede ma kaya idi. Widinakawata awẽ rakati wiwaĩdi kadi. Naa pedata sábado idi.

¹⁰ Naskadu judíowawe uĩdiwu na dukuwede widibisbatu ma kayaxu awẽ rakati wiwaĩdi kaitu. Ñukadiwu: “Aweskakĩ mi rakati sábado mi wuikaime. Mewẽ rakati sábadowaidu mi wutiruba”, wadiwu.

¹¹ Askawaiwudu atu kebadi: “Na dukuwene ea kayawatu ea yuiya: ‘Mewẽ rakati wita katawe’, ea waa”, atu wadi.

¹² “Watu dukuwene bia yuiyame: ‘Mewẽ rakati wutawe’, bia waame”, wadiwu.

¹³ Widibisbatu tapidiba tsuã kayawaamaiki. Jesús yurawawe dakiwawudu ana uĩdiba.

¹⁴ Naskadu chipu oración pexe aduxu wichixu Jesúspa yuidi: “Ma mi kaya. Ana mi chakaki mi witibaxiitiru”, Jesúspa wadi.

¹⁵ Naskata naa dukuwede Jesúsbakidua kadi judíowu yui kai: “Jesúspa naatu ea kayawaa”, atu wadi.

¹⁶ Jesúspa sábadowaidu atu kayawadu dikakadax judíowawe Jesús yuikĩ chakawadiwu.

¹⁷ Naskawaiwudu Jesúspa atu yuidi: “Ewẽ Epã naa pedatiiwi yuduwawaĩdi. Ewẽ Epã yuduwaidu ẽriwi yudui”, atu wadi.

¹⁸ Naskake judíowawe Jesús aweskawaxuba retepaidiwu. Moiséspa kededi sábado yurawawe yudutiruba Jesúspa dukuwede kabisba kayawake. Naskatari Epa Dios keskara ita “Dios ewẽ Epa”, ikaitu.

Jesús Apa diaiwu keskara

¹⁹ Naskaxu Jesúspa atu yuidi: “Ẽ batu yuikuinu. Ẽ Dios awẽ Wake ewẽ shinama ẽa awa atiruba. Ewẽ Epa Diospa akaitu uĩxu ẽri atiru. Na Epa Diospa awara akai awẽ Wakẽri naa atiru.

²⁰ Ewẽ Epã ea dui. Naskake na awarawu akai ea uĩbai. Awara wetsa tsuã atiruba keskara ewapakui ea uĩbaxiwi. Naskake maawu wetsa keskaraxiwi

²¹ Epa Diospa yura daadu kayawata ibapaketiru. Awẽ Wake Jesúspari naskawatiru. Yura daadu kayawata ibapaketiru.

²² Ewẽ Epã tsua chakamaikixu yura sharamaiki uĩbisba. Ẽ awẽ Wake awẽ bitsisipa ea inadi ẽ atu chakamaikixu sharawuke uĩnu.

²³ Yurawawe Epa Dios awẽ Wake idibaxukata na Apa idibaxuwai keskawakakĩ. Epa Diospa awẽ Wake idibaxukakĩba Apari idibaxutiruwuba na nichidi.

²⁴ Ẽ batu yuikuinu. Na ewẽ tsai dikayai na ea nichidi ikũira waawu Epa Dioswe ipadaka. Na ubiskuiyaiwu mera naa yurawu wudakawuba. Askataba naa yura chakabixakĩ ana awa chaka shinatiruba. Awẽ shina kayakawikui shinatiru.

²⁵ Ẽ batu yuikuinu. Iskaratiã na daawawe ewẽ tsai dikakadax Epa Diospa awẽ Wake dikayaiwu naawu ipadakawu.

²⁶ Epa Dios dua yurawu naatiiwi diawu. Naskake awẽ Wakeriwi awẽ bitsisipa inadi yurawu naatiiwi widitiru.

²⁷ Ẽ Dukuwene awẽ Wake. Naskake ea awẽ bitsisipa inadi ẽ atu yura chakabiswu yuinu chii ere mera wuyabanuwu yura sharabiswu ewẽ Epa ikadu awe ipaxanuwu.

²⁸ Naskara ẽ batu yuiyaidu rateyabakawe. Naskaweke inupukui na dabiswawe ewẽ tsai dikanupukukadi.

²⁹ Na baibis aduax widinupukukadi. Na awara sharawakata dikasharakuibiswu naawu Dios adu ipadakawu. Na awara chakawabiswu na baibis aduax widikata wukadax chii ere meraduax ubiskuipakedakawu”, Jesúspa atu wadi.

Diospa Jesús nichidi apaiyai keskara wabaxikĩ

³⁰ Jesúspa atu yuidi: “Ewẽ shinama ẽ awa atiruba. Yura sharawumaikixu uĩta chakawumaiki. Na ewẽ Epã ea yudua ẽ atiru. Ẽ atu chakamaikixu uĩta sharamaikixu uĩyai na Ewẽ shinama ẽ awa atiruba. Na ea nichiditu ea yudua ẽ atiru.

³¹ Ewẽ shinama ẽ udua ẽ batu yuiyaitu akai awa itiruba.

³² Wetsã ẽ udua yuiyaitu na ikũkui. Datu yuitiru ikũkui ẽ yuiyaitu.

³³ Juan Bautista ñukatanuwu ma nichiyabea. Naatu ẽ udua atu yuikuiyabea.

³⁴ Yura wetsã ẽ udua tsai yuinuwu ẽ yupatiruba. Da ẽ batu yuiyai maawawe ikũira wanu ẽ batu yui ma weduyabanu.

³⁵ Juan lámpara chaxayai keskara idi. Maawu awẽ chaxayaiki ma idibabis awetiira peda wisti.

³⁶ Juanpa ẽ udua yuikuibis ewẽ Epa Dios awẽ tsai Juan winukuiya. Ewẽ Epã ea nichidi awẽ yudu apaiyai keskara ẽ axunu. Ẽ awara akai keskara uĩxu ma tapitiru Epa Diospa ea nichidi na ea yudubadai ẽ naatiiwi axunu.

³⁷ Epa Diospa ea nichidi. Naatu ẽ udua yuikuidi. Maakai Epa Diospa awẽ tsai dikabisba. Naskatari ma uĩbisba.

³⁸ Epa Diospa ea nichiwidike ma ea ikũira waiba. Naskax awẽ tsai shara matu shina mera dadeaba.

³⁹ Maawawe Epa Dios awẽ tsai kedesharabis: ‘Ẽ Dioswe ipaxakĩ’, raixu. Naskaweke Epa Dios awẽ tsai ẽ udua yuibiswuweke maawawe ea ikũira wapaiba. Ẽ batu ibapakesharaxapana.

⁴⁰ Maawawe ea ikũira wapaiba ipaxakakĩba.

⁴¹ Yurawawe ea udua yuisharanuwu ẽ yupaiba.

⁴² Ẽ batu tapikuiya. Maakai Epa Dios duiba.

⁴³ Epa Diospa ea nichidi ẽ batuki unu. Ẽ batuki uwiake ma ea ikũira wapaiba. Yura wetsa awikui batuki uwaitu ma iwitiru.

⁴⁴ Aweskawaxu ma ea ikũira watirume. Yura wetsawawe batu uduax yuisharanuwu naa ma duibis. Diospa batu yuisharaidu ma duiba. Naskakĩ ma Dios tsai ma dikakaspai.

⁴⁵ Ẽ batu ewẽ Epa ñuaxuiba. Askara shinayabakawe. Awara ma chakawake Epa Diospa Moisés tsai bitsisipa inadi. Naa ma ikũira wabis naatu matu chakawu ewẽ Epã ñuaxuxiwi.

⁴⁶ Moisés ẽ udua yuikĩ kededi. Moiséspa awẽ tsai ikũira waxu eari ma ikũira wakerada.

⁴⁷ Naskaweke Moiséspa tsai kededi mi ikũira waiba. Naskaxu na ẽ yuiyai eari ma ikũira waiba”, Jesúspa atu wadi.