Juan 2 - Yura porciones de la biblia

Jesúspa uva ede vino udiwadi

¹ Ma peda tres ikadu wianaiwudu nadu Jesúspa awa idi pexe ichapa awẽ ade Caná bai Galilea adu.

² Jesús yawi awẽ auxũ tapibiswu naawuri atu yuiyawu idi. Ana adu vino idiba

³ “Ana dudu vinoba”, awã Jesús wadi.

⁴ Jesúspa kebadi: “Ewã aweskakĩ aduri mia akime na ea retexiwaiwu iyuabadu”.

⁵ Jesúspa awã atu yuidi na uibatiwu: “Na batu yuiyai keskakawe”, atu wadi.

⁶ Ruwe kiti ewapanawã seis nadu idi. Wisti rasi cincuenta sesenta litros idi. Judíowawe ede wipaudiwu atũ tae chukaxikakĩ atũ biwi chukaxikakĩ. Naskai ma weyabiswu ipaudiwu Epa Dios idibanu.

⁷ Naskata yudubiswu Jesúspa atu yuidi: “Ruwe kitiki ene wuspiwakawe”, atu waitu ruwe kitiki ene wuspiwadiwu.

⁸ “Atũ awara kexebis kechu weakata kawashara wuxutakawe”, Jesúspa atu wadi: Naskawadiwu.

⁹ Vino ede udia na ichanawu atu kexebistu ayawiki tapidiba waniax udiamaiki. Atu ayababiswawe tapiawu idi. Ichanawu atu kexebistu na raba awĩ wia kedadi.

¹⁰ “Naatiiwixu na vino sharakui ayakĩ taewatiruwu. Naa vino ayai weawawe ma ichapa ayawudu. Naskata na vino cuestaba atu inaketiruwu. Naskaweke da vino sharakui mi bekea atu ayabaxikĩ”.

¹¹ Pexe ichapa Caná bai Galilea aduxu Jesúspa tsuã atiruba keskara sharakui atu uĩbadi a udua tapibiswawe. Naskaitu ikũira wadiwu.

¹² Naskakata pexe ichapa awẽ ade Cafarnaúm nari wudiwu Jesús ikaidu awa udiwetsawu a udua tapibiswu. Naari awetiira peda idiwu.

Oración pexe aduxu Jesúspa atũ awarawu vendeyaiwu atu putãdi

¹³ Judíowawe fiesta wapaudiwu awẽ ade Pascua, ma sababa ikaidu Jesús pexe ichapa Jerusalén kadi.

¹⁴ Oración pexe adua peiuxũ atũ yuina idawu atu inapaudiwu Jesúspa atu wichidi. Vaca keskarawu ovejawu riwiwu. Naskata tsaukaxu wetsawawe atũ pei cambiawapaudiwu.

¹⁵ Jesúspa atu wichita nishi atu kushapaidi. Oración pexe aduxu yuinawu atu putadi. Ovejawu putata vacawuriwi putadi. Naskata yurawuriwi putadi. Mesa adu atũ pei sapa atu saakadi. Mesari atu putadi.

¹⁶ Na riwiwu peiuxũ inayaiwu atu yuidi: “Aweskawakĩ ewẽ Epã pexe adu ma mercado waame. Naatiiwi tsekakawe”.

¹⁷ Auxũ tapibiswawe kushi shinatadiwu na Dios tsai udua naskara kedeake: “Tsuã ea raewatiruba ẽ beei na chii keskara mewẽ pexeuxũ”.

¹⁸ Judíowawe atũ diaiwuwawe Jesús ñukadiwu: “Tsuã bitsisipauxũ mia duku iskawaime”, wadiwu.

¹⁹ Jesúspa atu kebadi: “Da oración pexe paũ ika awiana tres peda ẽ aki”, Jesúspa atu wadi.

²⁰ Judíowawe kebadiwu: “Cuarenta y seis wari da oración pexe adiwu. Tres peda mi atirume”, wadiwu.

²¹ “Oración pexe”, yuikĩ awẽ kaya yuidi.

²² Naa daax widixiwai auxũ tapibiswawe shinatadiwu na Jesúspa atu yuiwawaĩda. Naskata na Epa Diospa awẽ tsai kedea ikũira wadiwu na Jesúspa atu yuibis.

Jesúspa yurawu atu unadi

²³ Fiesta awẽ ade Pascua Jerusalén Jesús iyuadu yura ichapawawe tsuã atiruba keskara uĩkakĩ ikũira wadiwu.

²⁴ Naskaweke Jesúspa atu ikũira wadiba mamai atũ shina tapinaaxu.

²⁵ Tsuã yuiyabaweke Jesúspa yurawawe atũ shina tapita atũ uĩti tapinaadi.