Juan 15 - Yura porciones de la biblia

Ẽ uva awẽ kaya datukui

¹ Jesúspa atu yuidi: “Ẽ uva awẽ kaya datukui. Ewẽ Epa urubis.

² Uva awẽ puña wẽtsa wibiyabaitu xatetiru. Aka uva wibiyaitu urutiru wibi ichapaya inu.

³ Maawawe ewẽ tsai dikakĩ matu chaka ma puta.

⁴ Iki paxkayabakawe na ẽ batuwe ika keskai. Uva awẽ puña wibitiruba awẽ kayayabake. Maariwi naskara. Naskake iki paxkayabakawe”, Jesúspa atu wadi.

⁵ “Ẽ uva awẽ kaya keskara. Maawu awẽ puña keskarawu. Ma iki paxkabisba. Ẽri batuki paxkabisba. Ẽ yabake awa ma atiruba.

⁶ Duwe usiyabake na ea dikakaspai chii ere mera ẽ putatiru na uvapa awẽ puña ma betuadu kuwatiru keskawakĩ”.

⁷ “Maawu iki ma paxkayabake ewẽ tsai ma ikũirakui waxu. Ma kiwĩta awara ma ñukaitu Epa Dios batu axutiru.

⁸ Ewẽ Epa awẽ tsai ma ikũirakui wake batuki idibatiru. Naskake maawu ewẽ ẽ udua tapibiswu ma itiru.

⁹ Ewẽ Epa Diospa ea duikui ẽri batu duikui. Na ẽ batu duiyai keskakawe.

¹⁰ Na ẽ batu yuiyai ma naskaitu ẽ batu duipakedaka na ewẽ Epã ea duiyai keskawakĩ. Ewẽ Epa na ea yuduwai keskai”.

¹¹ “Naduri ẽ batu yui ewe ma idibakuinu na ẽ ikai keskai.

¹² Duduri ẽ batu yui bawirasi duinanakawe. Na ẽ batu duiyai keskai.

¹³ Wetsawe rawexu aũ duikuikĩ nu a uduax datiru.

¹⁴ Ẽ batu yuduwai keskaitu ma ewe rawebis ma itiru.

¹⁵ Ẽ batu adekĩ uibatiwu ẽ batu waiba uibati awẽ diaiwawe akai tapitiruba. Ẽ batu adekĩ ewe rawebiswu ẽ batu wai. Ewẽ epa ea yuibis keskara ẽ batu tapiba”.

¹⁶ “Maawawe ea kañawadiba. Askataba na ẽ batu kañawaitii ẽ batu katubis. Na iwi puña wibi ichapaya itiru keskai ma naskanu ẽ batu nichibis. Naskake ewẽ adeuxũ awara ewẽ Epa ma ñukaitu batu inatiru.

¹⁷ Na ewẽ tsai bitsisipa ẽ batu yui. Bawirasi duinanakawe”, Jesúspa atu wadi.

Yurawawe Jesúsya auxũ tapibiswu atu duikaspakadi

¹⁸ “Naatiiwi yurawawe batu duikaspakadi. Naskakakĩ ea duikaspakĩ taewadiwu.

¹⁹ Ma ea ikũira wayabake batu duikeradawu awirana duinanai keskakadi. Naskaweke ma atu keskaraba. Ẽ batu kañawakĩ batu katudi atu keskara ma inuba. Naskake naa ea ikũirawaawubawawe batu duikaspakadi”, Jesúspa atu wadi.

²⁰ “Ẽ batu yuibis keskara shinakawe. Yudubistu awẽ diaiwu winutiruba. Ea ubiskuibaxikadi. Baturi ubiskuibanupukukadi. Na ẽ batu yuiyai ma ea ikũira wake baturi yurawawe batu ikũira waaxikadi.

²¹ Ma ea ikũira wake na ea abiswu keska batu waaxikadi ea nichidi tapitsiwakaxu.

²² Ẽ atuki uyabadike atũ chakawu uduax chakawu ikerada. Naskaweke datiã atũ chaka uduax atuki ẽ raeiba.

²³ Ea duikaspakakĩ ewẽ Epari duikaspakadi.

²⁴ Epa Diospa ea axuwaidu na tsuã atiruba keskara ẽ batu uĩbabis. Naskake ea duikaspakata ewẽ Epari duikaspakadi.

²⁵ Na ẽ udua atũ tsai kedediwu keskakui. Ea baitsikui duikaspadiwu”.

²⁶ “Espíritu Santo ikũkui euxũ ewẽ Epã nichinupukui. Na ikũirawaawutii atu uduax rawanaibis uwaidu ẽ udua atu yuikuinupukui.

²⁷ Maawaweri ẽ udua ma yuikuinupukui na ẽ akĩ taewaitu ma uĩbis”, Jesúspa auxũ tapibiswu atu wadi.