Juan 14 - Yura porciones de la biblia

Jesús wai tapia keskara Apa adu nu dukutiru

¹ “Shinachakayabakawe. Dios ikũira wakawe. Eari ikũira wakawe.

² Ewẽ Epa ikadu pexe ichapa. Nadu nu itiru. Askarayabake ẽ batu pexe itipiniwaxuikai. Nadu ma kanu ẽ batu wakeradaba.

³ Ẽ kaxu ẽ batu itipiniwaxuikai. Awiana uxũ ẽ batu iwiyuxiwi na ẽ ikadu batu iyuxikĩ ma ewe ipaxanu.

⁴ Na wai tapia ẽ kai ari maawawe ma tapia”, Jesúspa yuikĩ apa adu kaaxikĩ atu wadi.

⁵ Tomáspa Jesús kebadi: “Diaiwũ, na mi kai ari nu tapiaba. Na waitapiari nu tapiaba”, wadi.

⁶ Jesúspa kebadi: “Ẽ uduax ewẽ Epa adu ma dukutiru. Ẽ na waitapiakui keskara. Yurawu ẽ uduax ipatiruwu”, atu wadi.

⁷ “Ea ma tapixu ewẽ Epari ma tapinupukui. Datiã ma ea uĩ. Ewẽ Epari ma uĩnupukui”.

⁸ Felipepa kebadi: “Diaiwũ mewẽ Epa duku uĩbawe. Naskax nu idibanu”, wadi.

⁹ Naskaitu Jesúspa kebadi: “Ea ma tapiyuabame. Ea ma tapixu ewẽ Epari ma tapikerada. Aweskakĩ mewẽ Epa ea Uĩbawe ea mia waime”, Jesúspa Felipe wadi.

¹⁰ “Ea ma ikũira waiba ewẽ Epawe naa wisti nu. Na tsai ẽ batu yuibis ewẽ shinama ẽ batu yuiba. Ewẽ Epa awẽ shina ẽ yuibis”, Jesúspa atu wadi.

¹¹ “Ẽ batu paraiba. Ea ikũira wakawe. Ewẽ Epawe nu naa wisti. Askara ma ikũira wayabaxu na tsuã atiruba keskara ẽ akaitu ea ikũira wakawe.

¹² Ẽ batu yuikui. Tsuãra ea ikũira waxu na ẽ akai keskara anupukui ewẽ Epa adu ẽ kayuadu. Naskake na ẽ atiru winubata aaxikadi.

¹³ Awara ewẽ adeuxũ ewẽ Epa ma ñukaitu ẽ batu axunupukui naskaitu yurawawe ‘Epa Dios shara’, wanuwu.

¹⁴ Awara wetsa ewẽ adeuxũ ma ea ñukaitu ẽ batu axutiru”, Jesúspa atu wadi.

Jesúspa Espíritu Santo nichixiwi

¹⁵ Awiana Jesúspa atu yuidi: “Maawawe ea duikĩ ewẽ tsai bitsisipa ma ikũira wapadaka.

¹⁶ Ewẽ Epa ẽ yuinupukui Espíritu Santo batu nichixunu naatu batu uĩti sharawaxunu naa batuwe ipaxanu.

¹⁷ Na bai adu ikawawe Espíritu ikũkui ikũira watiruwuba uĩkataba tapitsiwakaxu. Maawawe ma tapia. Naskake nawe ma ipadaka”, Jesúspa atu wadi.

¹⁸ “Ẽ ma kaadu na kaiwuuba keskara ma iixiwiba. Awiana ẽ dasuxiwi batuwe iixikĩ.

¹⁹ Da bai aduxu ea ikũirawaawubawawe ea ana ma uĩyuuxiba. Naskaweke maawawe ea uĩxiwi. Ẽ dayuxiwi. Awiana ẽ widixikĩ.

²⁰ Ma dawiax awiana ẽ dasua ma ea tapinupukui ewẽ Epawe ẽ ika. Ma ewe ika. Ẽriwi batuwe ika.

²¹ Ewẽ tsai bitsisipa dikayaitu naatu ea dui. Ẽriwi ẽ duinupukui ewẽ Epãri. Naa ẽ tapibaxiwi”, Jesúspa atu wadi.

²² Judas Iscariote atũba, Judas wetsã Jesús ñukadi: “Diaiwũ aweskakĩ duku wisti mia duku uĩbaime. Naatiiwi yurawu mi atu uĩbaibame”, Judaspa Jesús wadi.

²³ Jesúspa kebadi: “Ea duita ewẽ tsai ikũira wake naa ewẽ Epa duinupukui. Ewẽ Epawe awe ipaxakĩ nu unupukui”, Jesús idi.

²⁴ “Ea ikũira waabatu ewẽ tsai duiba. Na tsai ma dikai ewenaba. Ewẽ Epana. Na ea nichidituna”.

²⁵ “Ẽ batuwe iyuxu naawu ẽ batu yui.

²⁶ Ewẽ Epã Espíritu Santo yurawu awara shara tapibatiru nichinupukui ewẽ adeuxũ. Naatu awarawu batu tapibaidu na ẽ batu tapibabis ma shinanupukui”.

²⁷ “Ewẽ wipi shara ẽ batu inawaĩdikai. Yura chakawu inatiru keska ẽ batu waiba. Shinachakayabakawe. Naskatari beseyabakawe”.

²⁸ “Ẽ yuiyaitu ma ea dika ẽ kaax awiana ẽ unupukui batuwe ikiyui. Ea ma dui ma idibatiru ewẽ Epa adu ẽ kaitu. Ewẽ Epã naatu ea winua.

²⁹ Ikabadu ẽ batu yui. Naskata awara aweskaraitu ea ikũira wakawe”.

³⁰ “Yurawawe ikũira waawu uwaidu awẽ ade Satanás. Ana ẽ batuwe tsainupukuiba. Satanáspa ea winuaba.

³¹ Yurawawe tapinuwu ewẽ Epa ẽ duiyaitu naskatari ea yududi kayakawikui ẽ axuwaitu uĩnuwu. Naskata nu wunukawe”, Jesúspa atu wadi.