Juan 12 - Yura porciones de la biblia

Awĩwawe Jesúspa awẽ taeki perfume nachidi

¹ Fiesta awẽ ade Pascua sababa ma seis peda ikaidu Jesús Betania kadi Lázaro ikadu. Naa Lázaro Jesúspa widibaitadu.

² Naduxu Jesúswe wuawawe ñatapake pichadiwu Jesúspa pinu. Mesadu Jesúswe Lázaro tsauwa idi. Lázaro awẽ chiku Martapa piti atu inadi.

³ Maríane trescientos gramos perfume wedi. Naa perfume awẽ ade nardona pei ichapa idi. Naa perfume Jesúspa awẽ taeki nachita awẽ wuũ tere adi. Naskaidu pexe mera perfume awẽ ini tuwedi.

⁴ Naskata Jesús adua tapibis awẽ ade Judas Iscariote na Jesús atu achibanupukuwaitu yuidi:

⁵ “Aweskakĩ atu peiuxũ inapaiyabame da perfume. Naa pei awara yupayaiwu nu atu inapana”.

⁶ Aduri yuikuidiba awayabawu duibixakĩ. Judas yubetsu idi na awayabawu atu awa inapaudiba pei kexewixu pei udepaudi.

⁷ Naskawaitu dikakĩ Jesúspa Judas yuidi: “María wekaxtiwayabawe. Ẽ sababashta daitu ma tapixu iki perfume nachia”, wadi.

⁸ “Awara yupayaiwu batuwe ipadakawu. Ẽ batuwe ipadakaba”, Jesúspa atu wadi.

Judío atũ diaiwuwawe Lázaro retepaixikakĩ shinadiwu

⁹ Betania adu Jesús dikakadi judíowu ichapawu Jesúski wediwu. Naskata Lázaro uduari wediwu na Jesúspa widibaita.

¹⁰ Naskata sacerdote diaiwuwawe shinadiwu Lázaro retepaikakĩ.

¹¹ Lázarouxũ judíowawe na sacerdotewu ana atuki chipudiayabaiwawe Jesús ikũira waaxikakĩ.

Jerusalén adu Jesús dukudi

¹² Yura ichapa Jerusalén wuawu idi fiesta awẽ ade Pascua ikaidu. Peda wetsa Jesúsriwi pexe ichapadu uwaitu dikadiwu.

¹³ Naskake epe pei tsubakaxu aki dukui wudiwu. Naskakadax ui ewapatu yurawawe yuidiwu: “Bitsisipa sharakui ui duku uduax rawanaibis Epa Dios nichia. Israeliwu nuku Diaiwukui ui dukuki sharakui”, wadiwu.

¹⁴ Jesús yuina awẽ ade burroki tsauinakawadi. Naskara Epa Dios awẽ tsai kedea idi:

¹⁵ “Beseyabakawe Jerusalén ikawawe matu diaiwu yuina awẽ ade burroki tsauwax ui”, naduri Epa Dios tsai kedea idi.

¹⁶ Taekui Jesús udua tapibiswawe tapipaudiwuba Jesús udua Epa Dios tsai kedea idi ma iwiyaitu. Ma Jesús daata ma widitadu a udua tapibiswawe shinatadiwu.

¹⁷ Jesúspa Lázaro daa baiyadua widiyaitu uĩtaxakakĩ yuidiwu.

¹⁸ Naskake Jesúski yurawu dukui wudiwu na tsua atiruba keskara akaitu dikakaxu.

¹⁹ Fariseowu awirasi yuinadiwu: “Ma nu uĩ nu aweskatiruba. Naatiiwi yurawu Jesúswe wukadi”, iki wetsediwu.

Dayaxakĩ Jesús awi yuidi

²⁰ Fiesta awẽ ade Pascua yura ichapawawe aki idibai wuitawu adu naduriwi yura xuku wetsawu griegowu idiwu.

²¹ Nawuwawe dukuwede awẽ ade Felipe bai Galilea pexe ichapa awẽ ade Betsaida adua ñukadiwu: “Diaiwũ Jesús nu uĩpai”, wadiwu.

²² Felipepa Andrés yui kai kadi. Naskata naa raweta Jesús yui wukadi wudiwu.

²³ Naskake Jesúspa atu yuidi: “Dukuwene awẽ Wake yurawawe idibaxuwaiwu ma ika”, awi yui Jesús idi.

²⁴ “Batu yuikuinu trigo exe bai adu wada wuaikabax wibiya itiruba. Askataba naa exe wuaika wibi ichapaya itiru. Naskariwiyai ẽ batu uduax dayabake tsua wetsa ẽ ibapaketiruba”, Jesúspa atu wadi.

²⁵ “Wetsara awẽ shinama da bai aduax ika naa wedunupukui. Wetsa awẽ shinama ipaiyaiba da bai aduax naa ipadaka.

²⁶ Watura ma wetsa na ẽ duiyai keskara ma naskaitu ea chirutiru. Na ẽ ikadu naa ipadaka. Ewẽ Epãri naa yuikĩ sharawatiru”, Jesúspa atu wadi.

²⁷ “Datiã ubiskuiyaitu ẽ beei ẽ awe ikime. Ẽ yuitiruba: ‘Epã ea kexewe ẽ ubiskuiyabanu’, ẽ watiruba eemai ubiskuiyuiyudixakĩ.

²⁸ Epã mewẽ bitsisipa yurawu atu uĩbawe”, Jesús apawe tsaidi. Naskayaidu dai meradua tsaidi: “Ma ẽ atu uĩbada. Awiana ẽ atu uĩbanu”, Epa Dios idi.

²⁹ Naa dikakadi yura ichapawawe: “Dai tere iki”, idiwu. Atiriwawe: “Ángel Jesúswe tsaiki”, idiwu.

³⁰ “Na tsai dai meradua ma dikai ea tapibapaiba. Batu tapibada”, Jesúspa atu wadi.

³¹ “Datiã yura chakawu Epa Dios atu ubiskuibadi. Naskatariwi yura chakawawe atũ diaiwu Satanás Epa Dios putaxiwi.

³² Cruzki ea bastawudu ea ikũira wanuwu ẽ atu yuixiwi”, Jesúspa atu wadi.

³³ Naskaxu Jesúspa atu tapibadi na cruzki bastawudu daaxiwai.

³⁴ Yurawawe kebadiwu: “Ma nu tapia Epa Dios tsai adu kedeya Epa Dios nichia ipadaka. Aweskai Dukuwene awẽ Wake: ‘Cruzki bastaxikadi’, mi ikime. Naa Dukewene awẽ Wake tsuame”, wadiwu.

³⁵ Jesúspa atu yuidi: “Ẽ batuwe iki chaiba na ẽ peda keskara. Naskake ẽ ana batuwe dudu iyuiba. Ẽ batu yuiyaitu dikakuikawe weduxikakĩba. Pedayabaidu wakish itiru. Naskake yura utis itiru. Tsuã wakish mera uĩtiruba waĩ kai utis itiru.

³⁶ Na chaxayai ikũira wakawe. Ẽ kayuabadu ea ikũira wakawe. Dioski paxkayabaxikakĩ”, naduri atu yuita udekaidi Jesús kadi.

Judíowawe Jesús ikũira wadiwuba

³⁷ Yurawawe uĩyaiwudu tsuã atiruba keskara ewapakui Jesúspa awiyaitu tsuã ikũira wadiba.

³⁸ Naa Epa Dios tsai yuibis Isaíaspa. Naskara kededi naskakuidiwu: “Diaiwũ tsuã nuku tsai ikũira waame. Watu mewẽ bitsisipa mi uĩbadame”, Isaíaspa kedei.

³⁹ Tsuãrikai ikũira watiruba naskara Isaías kededi idi:

⁴⁰ “Epa Diospa atu dikatapitibawadi dikayabanuwu atũ weruri na wepua keskara idiwu. Atũ chaka putayabanuwu naskata ikũira wayabanuwu ẽ atũ chakawu suayuabadu iki weabanuwu”, Isaíaspa kededi.

⁴¹ Jesúspa awẽ bitsisipa inupukui keskara Isaías uĩkĩ taewadi. Naskake naduri a udua yuidi.

⁴² Naskaweke Judío ichapawawe Jesús ikũira wadiwu atiriwi diaiwuwaweri. Awa yuidiwuba fariseowuki besekakĩ duku putayabanuwu raikadax atũ ichanati pexe meraxu.

⁴³ Epa Dios tsai dikapaidiwuba yurawawe atũ tsai dikapaidiwu.

Jesús yurawu udua rawanaikiyuiyudi

⁴⁴ Jesúspa tsai ewapatu atu yuidi: “Na ea ikũira waawu ea wisti ikũira waawuba. Ewẽ Epã na ea nichidiri ikũira waawu.

⁴⁵ Naskatari ea ma uĩkĩ na ea nichidiri ma uĩ”, Jesúspa atu wadi.

⁴⁶ “Ẽ na peda keskara da bai adu chaxaiyui ẽ udi. Na ea ikũira waawu wakishiwadu ipadakawuba.

⁴⁷ Ewẽ tsai dikaiyai naskawixu ea ikũira waiba ẽ atu chakawatiruba. Naskatari chakawaiyui ẽ udiba. Da bai adu ikawu atu udua rawanaikiyui ẽ udi.

⁴⁸ Ẽ Jesús ikũira waiba. Naskatari awẽ tsairi ẽ dikapaiba ixu shinai na tsai ẽ batu yuibis keskara dikayabax Dios ari kataba ubiskuipakedakawu mera kaaxiwi. Naskake ẽ batu yuiyaitu ma ea dikayabax ma bai keyuaidu ma ubiskuipakedaka”, Jesúspa atu yuidi.

⁴⁹ “Ewẽ Epa Diospa ea yuiya keskara nadurikui ẽ batu yuibis. Ewẽ shinama ẽ batu yuiba. Ewẽ Epa Dios na ea nichidiuxũ ẽ batu yuibis.

⁵⁰ Ewẽ Epã awẽ tsai bitsisipa ikũira wabis naa ipadaka. Naskake ewẽ Epa ea yududi ẽ batu tapibabis”, Jesúspa atu wadi.