Juan 11 - Yura porciones de la biblia

Lázaro dadi

¹ Naskata dukuwede awẽ ade Lázaro Betania ika isiniki idi. Pui raweya awẽ ade María wetsa Marta naa raweri pexe ichapa Betania adua idiwu.

² Lázaro awẽ pui María naatu ini sharapa Jesúspa awẽ taeki nachixu awẽ wuũ tere anupukui idi.

³ Lázaro pui raweta Maríaweta Martapa Jesús tsai wubadiwu: “Diaiwũ, na bewe rawebis mi duibis isiniki”, wadiwu.

⁴ Naa dikai Jesúspa yuidi: “Isima Lázaro daiba. Askataba Epa Dios awẽ bitsisipa batu uĩbai tsuã atiruba keskara aki. Ẽriwi batu uĩbatiru ewẽ bitsisipa Epa Dios ẽ awẽ Wake”, Jesús idi.

⁵ Jesúspa Marta duikuita udiwetsa María duikuita Lázarori duikui idi.

⁶ Lázaro isinikaitu dikai Jesús nadu uxarawedi.

⁷ Naskata auxũ tapibiswu Jesúspa atu yuidi: “Nu Judea bai adu nu wunukawe”, Jesúspa atu wadi.

⁸ A udua tapibiswawe yuidiwu: “Maestrõ, judíowawe da raba bia ruwẽ retepaitawu. Awiana nadu mi kapaime”, wadiwu.

⁹ Jesúspa atu yuidi: “Na peda wisti wari chaxaidu yura utis itiruba warimai waitapia chaxayaitu.

¹⁰ Askataba yura yabeta wakira kai utis itiru waritsi chaxayaitu”, Jesúspa atu wadi.

¹¹ Naskata awiana atu yuidi: “Duwe rawebis Lázaro uxa. Naskaweke ẽ mui kai”, Jesúspa atu wadi.

¹² A udua tapibiswawe yuidiwu: “Diaiwũ Lázaro uxax kayatiru”, wadiwu.

¹³ Lázaro dake Jesúspa atu yuidi. Auxũ tapibiswawe shinawu. Jesúspa Lázaro uxake duku yui wadiwu.

¹⁴ Naskake Jesúspa atu yuikuidi: “Lázaro ma daa”, atu wadi.

¹⁵ “Sharakapashta ẽ adu ikitaba Lázaro daadu. Naskara shara maawawe ea ikũira waadu. Nu uĩnu wukawe”, Jesúspa atu wadi.

¹⁶ Na Tomás Dade Rawe wabiswu Jesús udua tapibis. Naatu atiriwi Jesús udua tapibiswu atu yuidi: “Duriwi nu awe wunukawe”, atu wadi.

Jesúspa atu uĩ kai kadi Marta yawi María shinabetsayaiwudu

¹⁷ Ma Lázaro baiwaitawudu cuatro peda ikadu Jesús dukudi.

¹⁸ Pexe ichapa awẽ ade Betania Jerusalén chaiba tres kilómetros idi.

¹⁹ Naskata judíowawe Martaya María atu shinabai wukadi wuitawu idi atũ uchi Lázaro daadu.

²⁰ Jesús dukuwaitu dikai Marta aki dukui kai kadi. María kadiba. Awẽ pexe adu netedi.

²¹ Martapa Jesús yuidi: “Diaiwũ dudu mi ikadu ewẽ uchi dakeraitaba.

²² Ẽ tapia na mi awara apaiyai Epa Dios bia axui”, Martapa wadi.

²³ “Mewẽ uchi widi sababashta”, Jesúspa wadi.

²⁴ Martapa yuidi: “Ma ẽ tapibis na baitiu adaitiyaidu na dabiswu naatiiwi widiyaiwudu ewẽ uchi widinupukui”, Martapa Jesús wadi.

²⁵ Naskayaitu Jesúspa yuidi: “Dawiyaiwawe ẽ atu ibapaketiru. Naa ea ikũira waa dawiake ẽ widibatiru ewe ipaxanu.

²⁶ Dayukaxuba ea ikũira waawu naawu dadakawuba. Naa mi ikũira waime”, Jesúspa wadi.

²⁷ Martapa kebadi: “Diaiwũ ẽ bia ikũira wabis mi Mesías. Mi Epa Dios awẽ Wake mi yurawu uduax mi udi”, Martapa Jesús wadi.

²⁸ Naskawata Martapa awẽ chiku María kedaxu tsuã dikayabaidu yuidi: “Ma Rabí dukuxu bia kedaba”, wadi.

²⁹ Naa dikai María kushi widinakawãdi. Jesúski dukui kai kadi.

³⁰ Jesús Betania adu ikiyuaba idi. Na Marta awe wichinadu Jesúswe nadu idi.

³¹ María kushikui kaitu uĩkadi judíowawe beewaĩdiwu. Nawawe shinawu baiawu adu kaax siaikikai raixu judíowu awe shinabetsaitawawe.

³² María Jesúski dukuxu baikiri titipakekawã yuidi: “Diaiwũ mi duduke ewẽ uchi dakeraitaba”, wadi.

³³ Maríawe judíowu wasĩ siaikaiwawe uĩ Jesúspa awẽ uĩti aduax shinabetsata atu ubisbadi.

³⁴ “Wani baiwaitawume”, Jesúspa atu ñukadi. “Diaiwũ uĩkawe”, Jesús judíowawe wadiwu.

³⁵ Jesús siaidi.

³⁶ Naskaitu judíowu iskadiwu: “Daatu duibis uĩkawe”, idiwu.

³⁷ Atiriwi awirasi tsaidiwu: “Daatu wexu kayawabis. Lázaro dapanaba aweskawapaiyabame”, judíowu idiwu.

Jesúspa Lázaro widibadi

³⁸ Jesús awiana shinabetsayana atu baiwabiswu adu kadi. Kidi ruwewãne wepua idi.

³⁹ “Ruwe tsekakawe”, Jesúspa atu wadi. Marta daitatu awẽ pui yuidi: “Diaiwũ Lázaro ma daita pisia. Ma cuatro peda ma ika”, Martapa wadi.

⁴⁰ Jesúspa kebadi: “Ẽ bia yuiyaitu mi dikabame. Ea ikũira waxu Epa Dios awẽ bitsisipa mi uĩtiru”, Jesúspa Marta wadi.

⁴¹ Naskata kidi ruwe wepua tsekadiwu. Naskaidu Jesúspa dai ari uĩyana yuidi: “Epã aichu ẽ biki idibadi. Ma mi ea dika.

⁴² Ma ẽ tapia mi ea dikabis. Yurawawe tapinuwu ẽ bia yui ea ikũira wanuwu mia nichidi”, Jesúspa apa Dios wadi.

⁴³ Naduri yuita tsai ewapatu: “Lázaro naduax widikerãwe”, Jesúspa Lázaro wadi.

⁴⁴ Naskawaidu Lázaro kaĩkerãdi aũ rakuitawuya. Awẽ wemanaki wepua idi. Naskaxu: “Aũ rakuitawu pekakawe katanu”, Jesúspa atu wadi.

Aweskawaxu Jesús retetirume

⁴⁵ Naskadu na judíowu María shinabai wuitawawe Jesúspa Lázaro widiyaitu uĩkakĩ ikũira wadiwu.

⁴⁶ Naskake yura atiriwawe Jesúspa Lázaro ma dawĩyaitake widibada fariseowu yui wukadi wudiwu.

⁴⁷ Naskake naa dikakadi fariseoweta sacerdotewawe atũ diaiwuwawe awẽ diaiwu datukuiwu ñukaxikakĩ kedakata ichanakaxu shinadiwu: “Jesús nu aweskawaime. Tsuã atiruba keskara awawaĩdi”, idiwu.

⁴⁸ “Nu aweskawayaba naatiiwixu Jesús ikũira wakadi. Naskaiwawe romanowawe wekaxu nuku oración pexe chakanawaaxikadi nuku yurawu retekata”, idiwu.

⁴⁹ Sacerdote atũ diaiwu Caifáspa atu yuidi: “Maawawe awa tapiaba”, atu wadi.

⁵⁰ “Ma tapiabame dukuwede wisti naatiiwi yurawu uduax daaxiwi naatiiwi daxinuwuba. Naskara shara batuna”, Caifáspa atu wadi.

⁵¹ Caifáspa awẽ shinama atu yuidiba. Epa Diospa tapibadu atu yuidi. Naamai sacerdote diaiwukuike yuidi na iixiwai Jesús judíowu uduax daaxiwi.

⁵² Judíowu wisti uduax daaxiba Epa Diospa awẽ wakewu bai wetsari ikawu nadu wisti atu ichanawaaxikĩ.

⁵³ Naa pedata judío diaiwuwawe shinadiwu Jesús retewaixakakĩ.

⁵⁴ Judíowawe retepaiyaiwudu ma tapia idi. Judío yurawu ichapa ikadu Jesús ana kataba bai judío aduax Jesús tsua ikabari kadi. Na chaiba awẽ ade Efraín awẽ a uduax tapibiswuwe nadu netedi.

⁵⁵ Judíowawe atũ fiesta Pascua ma chaiba ikaidu atũ bai aduax yura ichapa Jerusalén adu wudiwu Pascua iyuabadu itipinixikakĩ.

⁵⁶ Naskata judíowawe Jesús wedadiwu oración pexe adua awirasi ñukananadiwu: “Awa ma shinaime. Jesús fiesta Pascua ikaidu uime”, idiwu.

⁵⁷ Naskakaxu sacerdotewu atũ diaiwuweta fariseowawe atu yuikĩ iskawadiwu: “Watura wetsã Jesús wichixu duku yuikawe nu achinu”, atu wadiwu.