Génesis 43 - Yura porciones de la biblia

Benjamín bai Egipto adu iyudiwu

¹ Bai Canaán aduax yurawu wudiaiwudu.

² Egipto bai aduxu trigo weitawu ma keyuadu Jacobpa awẽ wakewu atu yuidi: “Awiana Egipto adu wukaxu trigo witakawe peiuxũ”, Jacobpa atu wadi.

³ Naskaweke Judápa kebadi: “Epã diaiwu Egipto aduatu duku yuikuita: ‘Matu chipuke ma eweyabake maariwi utiruba’, duku waita.

⁴ Mi dukuya nuku extu nichiyaitu peiuxũ nu trigo wikatiru.

⁵ Askataba dukuya mi nichiyabaitu nu katiruba. Diaiwu Egipto adu ikatu duku yuikuita: ‘Matu extu eweyabax ma uĩtiruba’, duku waita”, apa Jacob wadi.

⁶ Naskake Israelpa yuidi: “Aweskai ma aduri ikitame. Aweskakĩ: ‘Nu extu wetsaya’, ma ikitame”, Israelpa atu wadi.

⁷ Awẽ wake ranane kebadiwu: “Duku udua nuku kaiwuu uduari ichapa duku ñukariwaita. ‘Matu epa dayuabame. Ma extu wetsayame’, duku waitu nu tapitaba duku yuiyaitu: ‘Matu extu ewetakawe’, duku waita”, wadiwu.

⁸ Judápa awẽ apa Israel yuidi: “Nu dayupaiba dukuya Benjamín nichiwe. Ẽ kexeikai. Naskax nu datiruba mi ikaidu nuwu nuku kaiwuuri.

⁹ Ẽ bia yuikui. Ẽ kexesharaikai. Ẽ ana dudu eweyabaitu Benjamín aweskarake na uduax ẽ ubiskuipakedaka.

¹⁰ Nu sabarakayabaitaxakĩ ma nu kai rawea ikerada”, Judápa apa Jacob wadi.

¹¹ Naduri dikakĩ Israelpa yuidi: “Awara wetsakai nu atiruba. Nuku bai adua awara shara wuspiwakawe matu chabiupuki diaiwu Egipto adua wuxutaxikakĩ inakuitaxikakĩ. Bálsamo wukata mirra wuda wukata ini wetsa keskarawu wukata wibi kerexriwi nawu wuxutakawe.

¹² Pei rawe wuxutakawe na inata na batu inayabea. Tapixuba dadeyabea itiruki.

¹³ Matu extu iyutakawe na dukuwene uĩnu.

¹⁴ Epa Dios bitsisipa axuwaidu na dukuwene batu ubisbanu matu extu cárcel meradua tsekanu. Benjamínriwi. Naskax ẽ wakebais iki”, Jacob idi.

¹⁵ Pei rawe wikata awarawu inaxikĩ Benjamín iyukata Egipto dukukata José adu iyudiwu Benjamín.

¹⁶ Naskadu Benjamín ariwi atuwe kaitu Josépa uĩdi. Awẽ pexe adua awarawu kexebis yududi iskawadi: “Da dukuwedewu ewẽ pexe adu iyutakawe. Vaca retewe ẽ atu pibanu mananawari eweta pinuwu”, wadi.

¹⁷ Josépa yuiya keskawadi. Dukuwedewu Josépa pexe adu atu iyudiwu.

¹⁸ Josépa pexe adu atu iyuwaitu uĩkadi ratekuidiwu. Iskadiwu: “Na peiuxũ duku nasuitawu naawu uduax nu atũ uibati iki duku achikadi nuku yuinawuya”, idiwu.

¹⁹ Pexe kaĩti adu dukudiwu. Naskata Josépa awẽ pexe adua awarawu kexebis chaiba wukaxu awe tsaidiwu.

²⁰ Naskata yuidiwu: “Diaiwũ wetsatiã peiuxũ trigo nu wiwaĩta.

²¹ Na nu uxai aduxu nuku chabiupu wepekĩ nuku pei nu wichita. Naa pei nu bia nasuiyua.

²² Awiana nu pei nu wea trigo wiixikĩ. Nu tapiaba tsuãra nuku chabiupu mera nuku pei dadexuita”, Josépa awẽ udiwetsawawe wadiwu.

²³ Na pexe adua awarawu kexebistu atu yuidi: “Rateyabakawe. Matu epa awẽ Diospa matu Diosri matu pei awiana matu chabiupu mera dadexuita. Na ma peiuxũ inaita naa ma ẽ wiita”, atu wadi. Yuikĩ adaitita atuki Simeón ewedi.

²⁴ Naskata Josépa awẽ pexe mera atu iyudi. Naskata atu ede wixudi atũ tae chukanuwu. Atũ asnowuri pibaxudi.

²⁵ Naskaxu José badadiwu pexe meraxu mananawari naweta piixikakĩ. Naskata José awarawu kaxpa inaxikakĩ itipiniwadiwu.

²⁶ Naskake José pexe adu dukuwaitu na weawu José inadiwu. Inakuikata baikiri wepexupakewuwãdiwu.

²⁷ Josépa atu ñukadi: “Ma sharame. Ma ea yuita matu epa adiwushta dayuabame”, atu wadi.

²⁸ Baikiri wepepakewuwakata kebadiwu: “Mewẽ uibati nuku epa shara iyua”, awẽ udiwetsawawe José wadiwu.

²⁹ Awẽ extu Benjamín apaweta awa na rawe aka idi Josépa uĩkĩ naskake atu ñukadi: “Daame matu extu ma ea yuita. Bia Epa Dios sharawapainu”, Josépa wadi.

³⁰ Josépa awẽ extu uĩ idibayana ana siaikĩ tedetiru idiba. Naskata awẽ kede mera kata siaidi.

³¹ Ma siaita wechukubedi. Naskata kaĩta: “Atu piti inakawe”, Josépa awẽ uibatiwu wadi.

³² José mesa wetsa aduxu pinu inadiwu. Egipciowawe mesa wetsa aduxuri pinuwu inadiwu. José awẽ udiwetsawu mesa wetsa aduxuri pinuwu inadiwu. Egipciowawe hebreowuweta pitiruwuba idi: “Nu atuweta piax nu chakatiru”, ikaxu egipciowawe shinadiwu.

³³ Josépa atu yuiya na iyua tsaubakĩ taewadiwu akachiuri wetsa tsaubadi wetsari tsaubadiwu. Naatu askawawudiwu. Chipukui chipuke tsaubadiwu. Wetsa keskarakata uĩnanadiwu.

³⁴ Josépa awẽ uchiwu atu pibadi awẽ mesaduxu. Awẽ chipuke Benjamín ewapakui inata udiwetsawu askawadiba. Atuweta ayai José idibakuidi.