Génesis 35 - Yura porciones de la biblia

Jacob pexe ichapa Betel adu dasudi

¹ “Betel adu itawe”, Diospa Jacob wadi: “Naduxu Dios ruwe petsainaxutawe na ẽ biki dukudi adu Esaúki besekaĩdi mi ichuax idi adu”, Diospa Jacob wadi.

² Naskata Jacobpa awẽ kaiwuu na awe ibiswu atu yuidi: “Na ma udiwaxu ikũira waa putakawe. Dashikawe. Matu saweti weda sawekawe.

³ Betel adu nu wunukawe”, atu wadi. “Narixu ẽ ruwe petsaidikanu naduxu ẽ Dios idimaxuxikĩ. Ewẽ uchiki ẽ besekaĩdi kaidu naatu ea sharawaxudi. Naatu ea kexesharadi waĩ ẽ kaidu”, atu wadi.

⁴ Yura keskara wakaxu na ikũira wapaudiwu Jacob inadiwu. Atũ pachu adu sawekata netabiswu nawu inawudu Jacobpa baiwadi iwi awẽ ade encina nama pexe ichapa awẽ ade Siquem chaiba.

⁵ Jacobpa awẽ yurawuwe kaidu Epa Dios yura chaiba ikawu atu besenawadi. Naskake Jacobpa awẽ wakewu tsuã beewaĩdiba.

⁶ Jacob awẽ yurawuwe pexe ichapa awẽ ade Luz nadu dukudiwu. Awẽ ade wetsa Betel idi. Na bai adu Canaán idi.

⁷ Ruwe petsaidaxu nadu adedi El-betel, wadi. Betel wakĩ “Epa Dios awẽ Betel”, idi. Nadu Epa Dios aki dukudi awẽ uchiki besekaĩdi ichuadu.

⁸ Naduax Rebeca awẽ uibati Débora dadi. Iwi awẽ ade encina nama bai wadiwu Betel chaiba. Naskake nadu adedi Elón Bacut.

⁹ Padán-aram aduax Jacob dasuadu Epa Dios aki dukudi. Naskata Epa Dios shina shara inadi.

¹⁰ Iskara tsaima Diospa Jacob yuidi: “Datiã mewẽ ade Jacob. Ana mewẽ ade Jacob ikiba. Mewẽ ade Israel iki”, Epa Diospa Jacob wadi. Naskata Diospa awẽ ade wetsa axudi.

¹¹ Chipu Diospa yuidi: “Ẽ Dios bitsisipa. Wake ichapa mewẽ kaiwuunuax ichapanawã kaĩpakedakawu. Mi uduax yura xuku wetsa ipaxanuwu. Naskatari mewẽ kaiwuu uduax ichapanawã kaĩpakedakawu ichapa diaiwu ipadakawu.

¹² Na bai ẽ Abraham inadi naskatari ẽ Isaac inadi naa bai ẽ bia inai. Mewẽ kaiwuunuax ichapanawã kaĩpakedakawu ẽ bia inanupukui”, Epa Diospa Jacob wadi.

¹³ Naduax Epa Dios Jacobwe tsaita kadi.

¹⁴ Naduxu Jacobpa ruwe widiniwuwãdi naniti keskara naa Dioswe tsaika aduxu. Naniti keskaraki xidi nachita vinori nachidi naduxu Dios idimaxuxikĩ.

¹⁵ Dioswe tsaikadu nadu Jacobpa adedi Betel, wadi.

Raquel dadi

¹⁶ Betel aduax wuwaiwudu pexe ichapa Efrata chaibakiduax Raquel wake kaĩ isikui beedi.

¹⁷ Wake wibistu Raquel wake akaidu yuidi: “Beseyabawe. Werunawake wetsa mi aki”, wadi.

¹⁸ Ma daki awẽ wake adedi Ben-oní, wadi. Naskaweke awẽ apã adedi Benjamín, wadi.

¹⁹ Ma Raquel daadu pexe ichapa Efrata wai kaa adu baiwadiwu. Datiã nadu awẽ ade Belén.

²⁰ Raquel baiyadu Jacobpa naniti keskara widiniwuwãdi. Datiã Raquel baiyadu ma tapinabea.

²¹ Naskadu Israel kadi. Eder winuwaĩta awẽ yuina wichi nadu tapasdi.

²² Naduxu Israelpa awĩ wetsa Bilhá Rubén ikaitu naa dikai Jacob sidakuidi.

Jacobpa awẽ wakewu doce idiwu

²³ Israel wakeya idi Líaweta aka. Awẽ wakewu Rubén iyua idi. Akachiuridua Simeón idi. Awẽ wakewu wetsa Leví wetsari Judá wetsari Isacar atũ chipuke Zabulón idi.

²⁴ Israel Raquelweta wake rawe adi. Awẽ wake iyua José awẽ wake wetsa awẽ ade Benjamín.

²⁵ Raquel awẽ uibati awẽ ade Bilhá nawetari Israel wake rawe adi. Awẽ wake iyua Dan wetsa Neftalí.

²⁶ Lía awẽ uibati awẽ ade Zilpá nawetari Israel wake rawe adi. Awẽ wake iyua Gad wetsa Aser. Naawu Jacobpa awẽ wakewu bai Padán-aram aduax kaĩdiwu.

Isaac dadi

²⁷ Jacob apã pexe adu dasudi. Apa Isaac ipaudi pexe ichapa awẽ ade Mamré awẽ ade wetsa Arbá wetsari Hebrón. Nadu Abraham Isaac ipaudiwu adu.

²⁸ Isaac dai ciento ochenta wari akax dadi.

²⁹ Adiwukuiyax dadi awẽ xidiwuwe iki kai kadi. Ma daadu Esaúweta Jacobpa baiwadiwu.