Génesis 33 - Yura porciones de la biblia

Jacobwe Esaú dukunadiwu

¹ Esaú cuatrocientos dukuwedewuya uwaitu uĩkĩ Jacobpa Lía awẽ wakewuya paxkadi. Raquelri naskariwi adi. Awẽ yudubis raweri atũ wakewuya paxkadi.

² Naskata Jacobpa awẽ yudubis awĩwu rawe atũ wakewuya atu rewu tanabadi. Atu kachiuri Lía awẽ wakewuya atu wadi. Chipukui José awaya Raquel atu wadi.

³ Atu naskawata awẽ wemanane baikiri wepupakekawakakaĩdi siete veces awẽ uchiki aki dukuax. Naskaxu chaiba wadi.

⁴ Naskaitu uĩkĩ Esaúpa tebespata tsu adi naduax naa rawe eaikĩ watanadiwu.

⁵ Naskata Esaúpa awĩwuya atũ wakewuya uĩkĩ Jacob ñukadi: “Naawu tsuawume”, Esaú ikaitu awẽ uchi Esaú duikuiyana kebadi: “Naawu Diospa mewẽ uibati awẽ wakewu ea ina”, Jacobpa wadi.

⁶ Naskata Jacobpa uibati rawe atũ wakewuya Esaúki wekata wemanane baikiri wepupakewuwãwuwãdiwu.

⁷ Líari awẽ wakewuwe naskari adiwu. Raquelwe Joséri naskadiwu.

⁸ Esaúpa ñukadi: “Awa shinakĩ da yuina xukuwu ẽ uĩwerãda mia wubame”, waitu Jacobpa kebadi: “Ipaixuba nawuxũ ea sharawatiru raixu ẽ bia wuba”, wadi.

⁹ Tsai pachiwaxu Esaúpa awẽ extu Jacob yuikĩ iskawadi: “Ẽ bia yuina wiãiba. Ẽ yuinane ẽ yupaiba. Nawuya iwe”, wadi.

¹⁰ Jacobpa yuiriwadi: “Daawu bia inayai ea wixuwe. Mi dukuki idiba. Ẽ bia uĩyax naa ẽ Dios uĩyai keskara.

¹¹ Da ẽ bia wexua ea wixuwe. Dios ea sharakuiwaa. Naskake ẽ awa yupaiba”, Jacobpa naskawariawaitu Esaúpa widi.

¹² Naskata Esaúpa iskawadi: “Nu kanuwe. Ẽ bia rewu kaxui kanu”, wadi.

¹³ Naskata Jacobpa duiyana kebadi: “Ewẽ uchĩ ma mi tapibetsashta wakewu kushi wutiruwuba. Ewẽ oveja ita vacawuri wakeyawu ẽ atu kushi iyupana xukenakadax datiruwu.

¹⁴ Ea rewu kaxui kawe. Ewẽ yuinawu wenamashta wuwaiwudu ẽ atu kachiuri ẽ kai ewẽ wakewuya Seír adu biki dukui kai”, wadi.

¹⁵ Naskaitu Esaúpa yuidi: “Askake dukuwede awetiira ẽ bia nichixutanuwe”, Ikaitu Jacobpa kebadi: “Ana ẽ yurawu yupaiba mi nichiwaĩpana. Ẽ bia sidabapaiba”, wadi.

¹⁶ Naa pedata Esaú Seír adu dasudi.

¹⁷ Jacob Sucot ari kadi. Nari pexe wata awẽ yuinawuri nadu tapasxudi iwi texpaya. Naskake nadu adekĩ Sucot, wadi.

¹⁸ Jacob Padán-aram aduax aweskataba Canaán adu dukudi. Pexe ichapa awẽ ade Siquem adu pexe wadi.

¹⁹ Naduxu cien pei sapauxũ bai widi Hamorpa awẽ wakewuna. Siquempa apa Hamor idi. Nadu Jacobpa pexe wadi.

²⁰ Nadu ruwe petsaidadi naduxu Dios kiwĩxikĩ. Nadu Jacobpa adekĩ El-elohé-israel, wadi.