Génesis 26 - Yura porciones de la biblia

Isaac Guerar bai adu kadi

¹ Abraham iyuadu na idi keskai Canaán bai aduax yurawu wudidiwu. Naskake Isaac Guerar adu kadi. Filisteowawe atũ diaiwu Abimélec idi.

² Guerar aduax Epa Dios aki dukuta Isaac yuidi: “Egipto adu kayabawe. Na ẽ bia yuiyai adu netewe.

³ Ẽ bia awara shara inanupukui. Da bai ẽ bia inata mewẽ kaiwuu uduax ichapanawã kaĩpakedakawuri. Na mewẽ epa Abraham ẽ axudi keskawaaxiwi.

⁴ Mewẽ kaiwuu uduax ichapanawã kaĩpakedakawu tsuã tanawatiruba na exteweruwutii inu. Da bai ẽ batu inaxiwi. Naskatari na baitiixu ikawu mewẽ kaiwuunuax ichapanawã kaĩpakedakawu awara shara ẽ atu inanupukui.

⁵ Na ẽ Abraham yuiyai keskakuipaudi ewẽ tsai bitsisipa ikũira wapaudi”, Epa Diospa wadi.

⁶ Naskake Isaac Guerar adu netedi.

⁷ Guerar adu ikawawe Isaac ñukadiwu: “Rebeca mewẽ awame”, waiwawe. Isaacpa besekĩ atu yuidiba: “Ewẽ pui”, atu wadi. “Rebecauxũ ea retetiruwu”, ixu Isaacpa shinadi Rebeca awĩwu sharakui idi.

⁸ Guerar adu wari ichapa iyupaudiwu. Isaac awẽ awĩ Rebeca pishkuxu iba ibawaitu diaiwu Abimélecpa filisteowawe atũ diaiwawe pexe xui aduxu uĩdi.

⁹ Abimélecpa Isaac kedabaxu yuidi: “Ikũ Rebeca mewẽ awĩ. Aweskai ‘Ewẽ pui’, mi ikitame”, waitu Isaacpa kebadi. “Ipaixuba Rebecauxũ ea retetiruwu raixu ẽ shinaita”, Isaacpa Abimélec wadi.

¹⁰ Abimélecpa yuidi: “Aweskakĩ mia duku iskawaitame. Dudua yura wetsa mewẽ awĩwe ike mia duku chakawakerada”, wadi.

¹¹ “Tsuãra da dukuwede wekaxtiwata awĩ wekaxtiwake ẽ atu retebawaidaka”, Abimélecpa awẽ yurawu atu wadi.

¹² Naa warĩ Diospa Isaac awara sharawu awiana inadu awẽ wadawu ichapaya wuaixudi.

¹³ Naskax Isaac awarawu ichapaya idi. Ana awane yupadiba.

¹⁴ Awẽ ovejawu ichapaya idi. Awẽ vacawu ichapaya idi. Naskatari awẽ yudubiswu ichapa idi. Naskaitu filisteowawe awarawu ichapayake wiãpaipaudiwu.

¹⁵ Apa Abraham iyuadu na awẽ yuduxubiswawe bai pewekaxu pozo wadiwu filisteowawe wepukata mai wuspiwadiwu.

¹⁶ Naskata Abimélecpa Isaac yuidi: “Nu awayaba. Mi awane yupaiba. Duduax katawe”, wadi.

¹⁷ Naskawaitu dikai Isaac Guerar adu kata bachi raweta xatsukame nadu yuina wichi tapasta nadu idi.

¹⁸ Abraham iyuxu atu pozo wabadi. Ma daitadu filisteowawe mai wuspiwakata wepudiwu. Na Isaacpa awẽ yudubiswawe apediwu pozo. Na apã adedi naduri Isaacpa adedi.

¹⁹ Peda wetsa Isaacpa awẽ yudubiswawe pozo wapaikakĩ ede shara wichidiwu.

²⁰ Guerar ikawuwe Isaacwe yudubiswawe atuwe setenadiwu: “Da ede nukuna”, idiwu. Naskake Isaacpa ede adekĩ Setenawu, wadi.

²¹ Naskata pozo awiana apeawudu naa uduax awiana setenadiwu. Naskaxu Isaacpa pozo adekĩ Duikaspanadiwu, wadi.

²² Isaac naduax chaikui kadi naduxu pozo wadi. Ana setenayabaiwawe uĩkĩ pozo adekĩ Ana tsuã duku wekaxtiwaiba, wadi. “Diaiwu Diospa duku sharawaa. Naskake ana nu chakaiba”, Isaac idi.

²³ Naduax Isaac Beerseba adu kadi.

²⁴ Isaacki Epa Dios naa yabeta aki dukuta yuidi: “Mewẽ epa Abrahampa ẽ awẽ Dios. Beseyabawe. Ẽ bewe ika. Abrahamuxũ ẽ bia awara shara inaxiwi. Naskatari mewẽ kaiwuu uduax ichapanawã kaĩpakedakawu ichapa idakawu”, Diospa wadi.

²⁵ Naskata Isaacpa awẽ yuina wichi tapasdi ruwe petsaidadi naduxu Dios idimaxuxikĩ. Naskatari awẽ yudubiswawe bai pukikaxu pozo wadiwu.

Isaacweta Abimélecpa shinadiwu

²⁶ Peda wetsa Guerar aduax Abimélec udi Isaacwe tsaiki ui. Soldadowawe atũ diaiwu Ficol Abimélecwe udi. Naskata Ahuzat Abimélec tsai shinababisri udi.

²⁷ Naskake Isaacpa ñukadi: “Aweskai ma ewe tsaikiyuame. Matu bai aduxu ea ma duikaspata ea ma putadi”, Isaacpa Abimélec wadi.

²⁸ Nawuwawe kebadiwu: “Mi Epa Dioswe ika. Na shina iskara nu beweta shinapai duku chakawayabawe.

²⁹ Nu bia wekaxtiwaba. Askataba nu bia sharawabis. Naskake nu bia yui Epa Dios bia awa shara inawuikai”, Abimélecpa Isaac wadi.

³⁰ Naskata Isaacpa atu fiesta waxudi: Nawawe pikata ayadiwu.

³¹ Peda wetsa ma widiniwuwakata tsai shinadiwu. Naskata Isaacpa atu yuidi: “Ma atuwe rawetiru piixikĩ wukawe”, atu wadi.

³² Isaacwe yudubiswawe naa pedata yui wekadi wediwu pukikakĩ ede wichidiwu.

³³ Isaacpa adekĩ Sebá, wadi. Naskake datiã pexe ichapa awẽ ade Beerseba, wadiwu.

³⁴ Ma Esaú cuarenta wari ika idi Juditwe wianadiwu. Hitita adu ika Beerí awẽ wake idi. Naskatari awĩwu wetsawe wianadi awẽ ade Basemat. Hitita adu ika Elónpa wake idi.

³⁵ Naa awĩwu raweta Isaacya Rebeca atu wekaxtiwadiwu.