Génesis 25 - Yura porciones de la biblia

Abraham dake baiwadiwu

¹ Naskadu Abraham awĩ wetsa widi. Awẽ ade Queturá.

² Naweta seis wake adi. Nawawe atũ adewu Zimrán Jocsán Medán Madián Isbac Súah nawu idiwu.

³ Sebáweta Dedán atũ apa Jocsán idi. Dedánpa awẽ xukuwu tres idi. Xuku wetsa asureowu xuku wetsari letuseowu xuku wetsari leumeowu idi.

⁴ Madián awẽ wakewu Efá Éfer Hanoc Abidá Eldaá. Nawu Abraham awẽ awĩ wetsa Queturáweta adi.

⁵ Apa Abraham awẽ awarawu awẽ wake Isaacpa widi.

⁶ Abraham dayuxuba awĩ wetsaweta wake aka atu awara wetsa atu inadi. Naskata na wari ubis ari atu nichidi Isaacwe iyabanuwu.

⁷ Abraham ciento setenta y cinco wari akax dadi.

⁸ Wari ichapa Abraham iyubixaki adiwuax isinitaba dadi. Dai mera ikawu adu kadi.

⁹ Ma daadu Isaacweta Ismaelpa baiwadiwu bawa kidi awẽ ade Macpelá. Nadu chaibashta bai wetsã awẽ ade Mamré wari uwaikiri idi. Naa bai Efrónna idi. Efrón Sóharpa awẽ wake. Sóhar hitita idi.

¹⁰ Naa bai Abraham peiuxũ widi hititawuna. Nadu awĩ Sara baiyadu awĩwe pataxabedi.

¹¹ Abraham ma daitadu Epa Diospa Isaac sharawadi. Naskata pozo awẽ ade Na Epa Dios Ipadakatu Naatiiwi Uĩ nadu Isaac idi.

Ismaelpa awẽ rewuduwu

¹² Ismaelpa awẽ apa Abraham awẽ awa Agar. Naa Agar egipciowawe awĩwu xawu idi. Sarapa awẽ uibati.

¹³ Ismaelpa awẽ wakewu atũ adewu. Iyua awẽ ade Nebaiot chipuke awẽ ade Quedarnu Adbeelnu Mibsánu

¹⁴ Mismánu Dumánu Masánu

¹⁵ Hadarnu Temánu Jeturnu Nafísnu Quedmánu nawu idiwu.

¹⁶ Ismaelpa awẽ wakewu doce idiwu. Atũ adewuuxũ atũ bai tapidiwu. Nawu atũ diaiwu idiwu.

¹⁷ Ismael ciento treinta y siete wariya akax dadi. Awẽ xidi ikawu ari kadi.

¹⁸ Awẽ rewuduwu Havilá bai yawi Sur bai nexpakaya nadu ipaudiwu. Nadu chaibashta Egipto bai. Naduri Ismaelpa rewuduwu ikadu wai Asiriaki dukua idi.

Jacobwe Esaú kaĩdiwu

¹⁹ Jacobwe Esaú kaĩdiwu. Abrahamwe awẽ wake Isaac udua nu dikanu.

²⁰ Isaac cuarenta wari ma aki ikadu Rebecawe wianadi. Betuelpa awẽ wake Rebeca Labánpa chiku idi. Nawu Arameowu Padán-aram bai adu ipaudiwu.

²¹ Rebecapa wake atiruba idi. Naskake Isaacpa Epa Dios kiwĩdi wake apaikĩ. Kiwĩyaitu dikaxu Isaac Diospa axudi. Rebecapa wake dadedi.

²² Awã xakĩ meraduax na dadea rawe beenaiwudu: “Aweskai iskakadime”, idi. Rebecapa shinadi. Naskaxu Epa Dios ñukadi.

²³ Naskaiwawe Diospa awa kebadi: “Mewẽ xakĩ meraduax bai xuku rawe aduax yurawu beenakadi kaĩyukadaxba. Wetsa bitsisipakui iixiwi. Wetsa bitsisipawiax askara iixiwiba. Chipuketu na iyua uibati keskara waaxiwi. Naa rawe chipu paxkanaxikadi”, wadi.

²⁴ Ma aki uxe ikadu Rebeca wake rawe kaĩdi.

²⁵ Na kaĩ taea awẽ radi chaxta idi. Awẽ yuratiixu radiya. Naskake awẽ ade Esaú wadiwu. “Esaú”, wakakĩ Radi ichapaya.

²⁶ Naskata udiwetsa kaĩdi. Meke wistichi Esaú awẽ tae chichuku ñatax tsekedi. Naskake awẽ ade Jacob wadiwu. Jacob wakakĩ Tae chichuku ñatax tsekea wapaudiwu. Isaac sesenta wari ma aki ikadu Rebeca wake rawe kaĩdi.

Esaúpa iyuatu witiru bidibetsadi

²⁷ Wake rawe yusidiwu. Esaú yuina retebiskui ipaudi. Udiwetsa Jacob dii mera diibisba. Tapas mera wisti ipaudi.

²⁸ Naskaitu awẽ apa Isaacpa Esaú duikuipaudi yuina reteaitu uĩkĩ. Rebecapa iyua duiwikĩ askakai wapaudiba. Chipuke Jacob duikuipaudi.

²⁹ Peda wetsa Jacobpa pichayaidu Esaú dii mera katadi. Xukenai dukudi.

³⁰ Dukuta Esaúpa Jacob piti ñukadi: “Kushi piti wete ushi ea inawe. Ma ẽ wudikui”, wadi. Naskake Esaú awẽ ade wetsa Edom wapaudiwu. Edom wakakĩ Ushi wapaudiwu.

³¹ Naskake Jacobpa kebadi: “Ea inakĩ taewawe na apã iyua inakĩ taewatiru keskawakĩ poroto ushi wete ẽ bia inanu”, Jacobpa wadi.

³² “Ea piti inawe. Ewẽ epã ea inapaiyai awabaki”, Esaúpa Jacob wadi.

³³ Naskaweke: “Ea yuikuiwe iskaratiã mia inaimaiki iyua inatiru keskawakĩ ea inakĩ taewawe”, Jacobpa wadi. Esaúpa kebadi: “Ikũ ẽ bia inai”, wadi.

³⁴ Jacobpa Esaú pan inata poroto ushi wete inadi. Ma pita ayata Esaú widinakawata kai iskakaĩdi. Esaú awi duikaspanadi na kaĩdiadu.