Génesis 22 - Yura porciones de la biblia

Abrahampa Dios dikakuidi

¹ Awetiira wari ata Diospa Abraham kedadi uĩpaikĩ akimaikixu. Naskaxu yuidi: “Abraham”. Abrahampa kebadi: “Ẽ dudu”, wadi.

² Naskata Epa Diospa Abraham yuidi: “Mewẽ were wisti iyutawe naa mi duikuibis wisti bai awẽ ade Moria. Naduxu retetawe kuwaxu ea inaxikĩ”, Diospa wadi.

³ Ma pedaiyuwaidu Abraham widinakawã itipinidi kaaxikĩ. Awẽ awarawu wuuxikĩ awẽ asnouxũ. Karu xatedi awarawu reteta kuwaxu inaxikĩ Dios. Naskax kadi. Awẽ uibati rawe iyuta awẽ wakeri Isaac iyudi na Diospa yuita keskai.

⁴ Naskadu Abraham tres peda ikadu chaikixu uĩdi na kai adu.

⁵ Abrahampa awẽ uibati rawe yuidi: “Dudu netekawe asnowe. Ewẽ wakewes katanu. Narixu nu Dios nu awara shara inatanu. Batuki chipu nu dasuikai”, atu wadi.

⁶ Abrahampa awẽ wake Isaac karu pewebadi: Naatu chipu widi chii yawi kedupeweti. Na rawe wudiwu.

⁷ Isaacpa Abraham ñukadi: “Epã”, Abrahampa kebadi: “Ea yuiwe”, wadi. “Wanime oveja awẽ wake na nu Dios reteta kuwaxu inai. Dudu karu ita chii”, Isaacpa wadi.

⁸ Abrahampa kebadi: “Diospa duku oveja wake inai nu kuwaxu inanu”, wadi. Na rawe wudiwu.

⁹ Ma Abraham awẽ wakewe dukukata na Diospa yuitadu Abrahampa taewadi ichawakĩ ruwewu petsaidaxikĩ amanauri karu kuwaxikĩ. Awẽ wake Isaac dexata karu mamakaya wadi.

¹⁰ Kedupeweti wita awẽ wake ma retexikĩ ikaidu

¹¹ Epa Dios awẽ ángelpa dai arixu yuidi: “Abraham. Abraham”, ángelpa tsai ewapatu tsai adi. “Ẽ dudu”, Abrahampa wadi.

¹² Ángelpa yuidi: “Mewẽ wake wisti reteyabawe. Ẽ uĩya mia ikũira waa. Ea mia wishkuaba mewẽ wake wisti ea inaxikĩ”, wadi.

¹³ Naskata Abrahampa uĩdi iwi puña adu carnero awẽ maxu ñatana idi. Naskata achidi carnero reteta kuwaxu inaxikĩ Dios. Awẽ wake Isaac retepaiwikĩ carnero retexu inadi.

¹⁴ Naskaxu Abrahampa nadu adedi Na nu yupayai Diospa duku inatiru. Iskaratiã naatu adetiruwu: “Epa Diospa awẽ bachi arixu na nu yukayai duku inatiru”.

¹⁵ Dai arixu Epa Diospa awiana Abraham kedadi. Naskaxu yuidi:

¹⁶ “Mia dikakuike mewẽ wake wisti mia wishkuaba ẽ yuikui”, Epa Dios idi.

¹⁷ “Ẽ bia yuikui awara bia inaxikĩ. Mewẽ wakeuxũ mewẽ kaiwuunuax ichapanawã kaĩpakedakawu. Na exteweruwu keskara tsuã tanawatiruba naskara bishpu keskarariwi idakawu. Nawuwawe atũ duikaspabiswu atũ bai iwuwadakawu.

¹⁸ Miamai dikakuike na baitiixu ikawu awarawu shara wĩpadakawu mewẽ wakewuxu mewẽ kaiwuu uduax ichapanawã kaipakedakawuxuri”, wadi.

¹⁹ Abraham awẽ wakewe awẽ uibati rawe adu dasudiwu. Naatiiwi Beerseba adu wudiwu.

Nahorpa awẽ wakewu

²⁰ Awetiira uxe ma akadu wetsã Abraham yuidi: “Mewẽ wakawa Milcá datiã wakewuya. Mewẽ extu Nahor awẽ wakewu.

²¹ Naskaxu awẽ wakewu adedi. Iyuatu awẽ ade Us. Chipu Buzwe Quemuel kaĩdiwu. Na Quemuel awẽ wake Aram.

²² Awẽ wakewu wetsa awẽ ade Quésed wetsa Hazó wetsa Pildás Idlaf Betuel”, awẽ wakewu.

²³ Na Betuel Rebecapa apa idi. Naawu na ocho wakewu Milcápa Nahor Abrahampa awẽ extu inadi.

²⁴ Nahor awẽ awĩ wetsa Reumá ariwi werunawakewu kaĩdi. Atũ ade Teba Gáham Tahas Maacá idiwu.