Génesis 19 - Yura porciones de la biblia

Diospa Sodoma ikawu Gomorra ikawuri atu adaitidi

¹ Ma ñatapakeaidu ángel rawe Sodoma adu dukudiwu. Lot pexe ichapa kaĩti adu tsauwa idi. Ma atu wichita widinakawata baikiri wepepakekawãdi.

² Lotpa dukuwede rawe atu duiyana atu yuidi: “Ewẽ diaiwu raweta ewẽ pexe adu wukawe naduxu matu tae chukaxikakĩ. Wenamari wutaxikakĩ”, Lotpa atu wadi. Ángel raweta kebadiwu: “Shinachakayabawe. Wanira wetsa nu uxai”, wadiwu.

³ Naskawiyaiwawe Lotpa ewẽ pexe adu uxai wukawe atu wariawaitu awẽ pexe adu awe wudiwu. Awe dukuawuadu pan pusputiruba atu Lotpa inadi. Pidiwu.

⁴ Ángel rawe uxayuawubadu Sodoma ikawawe pexkuwuyaxu adiwuwawe Lot awẽ pexe dakiwadiwu.

⁵ Naskake Lot kedakata yuidiwu: “Wanime da yabeta dukuwede rawe mewẽ pexe adu weawu. Atu tsekawe nu atuwe inu”, Lot tsai ewapatu wadiwu.

⁶ Naskata Lot tsekeinakawata awẽ pexe weputi wepukuita.

⁷ Atu yuidi: “Ewẽ yurawawe, chaka shinayabakawe.

⁸ Ẽ wake raweya dukuwedewe ibisba rawe. Naa rawe ẽ batu tsekaxunu na ma apaiyai keskawaaxikakĩ. Da dukuwede rawe ewẽ pexe adu weawu aweskawayabakawe”, Lotpa atu wadi.

⁹ Nawuwawe kebadiwu: “Mi tsuame. Uri katawe. Mi duduayabawixu mia duku yuduime. Nu atu ata bia nu bibawai”. Askawakata Lot awẽ pexe weputi chakanawapaidiwu.

¹⁰ Ángel raweta Lot atũ puñama iwita weputi wepuakewuwãdiwu.

¹¹ Naskata naatiiwi ángel raweta pexkuwuya adiwuu atu wexuwadi weputi adu ikiyabanuwu.

¹² Naskata ángel raweta Lot ñukadiwu: “Dudu awetii mi kaiwuuyame. Mewẽ rayus ikaidu mewẽ wake rawe duduxu atu iyutawe.

¹³ Diospa ma tapia yurawawe atũ chakawu ana tedetiruba. Naskake duku nichia nu atu adaitinu”, ángel raweta Lot wadiwu.

¹⁴ Naskata Lotpa awẽ rais ipaixiwai rawe atu yui kai kadi: “Duduax nu kanu. Widiniwuwakawe. Epa Diospa dudua yurawu atu adaiti”, Lotpa yuiyaitu awẽ rais ipaixiwai raweta ikũira wadiwuba.

¹⁵ Ma pedayaidu ángel raweta Lot yuidiwu: “Duduxu mewẽ wake raweya mewẽ awĩya atu iyutawe dakaspakĩ nu atu adaitiyaidu”, ángelpa wadi.

¹⁶ Naskata Lot sabarakayaitu ángel raweta awẽ biwĩ tsubakata xawakawi tsekadiwu Diaiwu Diospamai ubisbaitu.

¹⁷ Pexe ichapa Sodoma aduxu ma atu tsekakata ángel wistichi atu yuidi: “Kushi wutakawe dayabaxikakĩ. Kachiuri ma uĩki naskatari mispa adu ma neteki. Ma dipaimaiki bachi ari wutakawe”, ángelpa Lot wadi.

¹⁸ Lotpa atu kebadi: “Baa ewẽ Diospa ẽ bia yui.

¹⁹ Ẽ dayabanu ea ma ubisba. Naskake ẽ bachi ari kapaiba. Nari kapai ẽ datiru”, Lotpa atu wadi.

²⁰ Naskawaitu Lotpa ángel yuidi: “Na chaiba pexe ichapaba nadu ea nichiwe ẽ dayabanu”, wadi.

²¹ Ángelpa kebadi: “Ma ẽ bia dikai. Na mia yuiyai ẽ bia axui. A pexe ichapaba ẽ adaitiba.

²² Naskake kushikui wutakawe. Na pexe ichapaba ma dukuabadu ẽ aweskawatiruba”, ángelpa wadi. Naskake na pexe ichapaba awẽ ade Sóar idi.

²³ Ma pedadu Lot Sóar adu dukudi.

²⁴ Naskayaidu Diospa dai arixu ui chii xuisaipa Sodomaya Gomorra ikawu atu adaitidi chakawuke.

²⁵ Atũ awarawuya atu adaitikuidi na Sodoma ikawu bai mispadu ikawuri.

²⁶ Lotpa awẽ awĩni kachiuri uĩpai kushikui saltadi.

²⁷ Peda wetsa na Epa Dioswe tsaikitadu Abraham kadi.

²⁸ Sodomaya Gomorrari uĩpaikĩ uĩya na baitiixu kuĩwawe tipu ikaitu. Horno kuĩ keskara idi.

²⁹ Naskadi Epa Dios Sodomaya Gomorra atu adaitikuidi na Lot ipaudi adua. Lot wisti dayabaitake Epa Dios Abrahamweta shinaitaxakĩ.

Moabitawunu amonitawu tsekei taediwu

³⁰ Lot Sóar adu ipai besedi. Naskax awẽ wake daetawa rawewe machiwa kidi mera iki kai kadi. Nadu idiwu.

³¹ Peda wetsa Lotpa awẽ wake daetawa iyuatu awẽ chiku yuidi: “Nuku epa adiwu. Da bai adu dukuwedeba nu awe wianapana na awĩwu itiruwu keskai.

³² Nuku epa paebaxu nu abanu aweta nu wake anu naskax nu rewuduya inu”, daetawa rawe idiwu.

³³ Naa yabeta paebakata awẽ wake iyuatu apawe iwiyaitu tapidiba.

³⁴ Ma peda wetsa awẽ iyuatu awẽ chiku yuidi: “Da yabeta nuku epawe ẽ iwaa. Da yabetari nu paebanu mi nawe uxata abaxikĩ. Naskaxu nu aweta wake nu anu”, idi.

³⁵ Yabe wetsa ana paebakata awẽ wake chipuketu apawe uxata abawiyaitu tapidiba.

³⁶ Naskaxu Lot awẽ wake rawe atu wake dadebadi.

³⁷ Awẽ wake iyuatu awẽ wake wisti adi. Awẽ ade Moab. Moab wakakĩ apaweta wake adike. Naskake moabitawu wadiwu. Datiãri naskarari.

³⁸ Awẽ wake chipuketuri wake wisti adi. Awẽ ade Ben-amí. Awẽ xidi apana wakakĩ awẽ wake datukuiweta wake aka. Amonitawawe atũ xidi.