Génesis 17 - Yura porciones de la biblia

Diosweta Abrampa shinadiwu wushki wichi xatepakexanuwu

¹ Abrampa awẽ wari ma noventa y nueve ikadu Dios aki dukuta yuidi: “Ẽ Dios bitsisipa. Ea ikũira wapaxawe chakataba.

² Dukuraweta na nu shinakuiyai mewẽ kaiwuu uduax ichapanawã kaĩpakedakawu ichapakui inupukukadi”, Epa Diospa wadi.

³ Naa dikai Abram baikiri wepepakekawãdi aũ duiyana. Naskayaitu Diospa yuidi:

⁴ “Dukuraweta na nu shinakuiyai ẽ bia yuikui. Bai wetsa ari ikawu mi atũ apa ipadaka.

⁵ Naskake ana mi Abram ikiba. Datiã mi Abraham iki. Yura bai wetsa ikawu ichapawawe mi atũ apa ipadaka.

⁶ Mewẽ kaiwuunuax ichapanawã kaĩpakedakawu ichapakui inuwu ẽ anupukui. Naskatari mi uduax diaiwuu kaĩkata bai wetsa ikawu ichapa kainupukukadi.

⁷ Dukuraweta na nu shinakuiyai mewẽ kaiwuunuax ichapanawã kaĩpakedakawuwetari ẽ anupukui. Ẽ mewẽ Dios iixiwi mewẽ kaiwuu uduax ichapanawã kaĩpakedakawu ẽ atũ Diosri ipadaka.

⁸ Da bai Canaán adu mi ika na mi yura wetsa keskara. Ẽ bia inata mewẽ kaiwuunuax ichapanawã kaĩpakedakawu ẽ inananupukui atuna ipaxanu”, Epa Diospa wadi.

⁹ Diospa Abraham yuidi: “Dukuraweta na nu shinakuiyai naskawe. Mewẽ kaiwuunuax ichapanawã kaĩpakedakawu naskanuwu.

¹⁰ Dukuraweta na nu shinakuiyai mewẽ kaiwuu uduax ichapanawã kaĩpakedakawu dukuwedewawe atũ wushki wichi xatepakexanuwu.

¹¹ Matu wushki wichi ma xatepakedaka. Dukuraweta na nu shinakuiyai naskapakedakawu.

¹² Datiã werunawakewu kaĩyawudu ma kaĩtadu ma ocho peda ikadu atũ wushki wichi xatepakedaka. Na atu peiuxũ wibis atũ wakewuri mi xatetiru.

¹³ Naskax dukuraweta na nu shinakuiyai matu werunawakewu kaĩyadu naatiiwixu atũ wushki wichi ma xatepakedakawu. Da ewẽ shina naskapakedaka.

¹⁴ Dukuraweta na nu shinakuiyai ikũira wataba awẽ wushki wichi xateaba batuwe itiruba”, Epa Diospa atu wadi.

¹⁵ Naskatari Diospa awiana Abraham yuidi: “Datiã mewẽ awĩni awẽ ade Sarai ikiba. Awẽ ade Sara iki.

¹⁶ Sarauxũ wake wisti ẽ bia inaxiwi. Naa ẽ awara shara inanupukui. Bai wetsa ari ikawu atũ diaiwunu kaiwuunuax ichapanawã kaĩpakedakawu atũ awa ipaxanu”, Epa Diospa Abraham wadi.

¹⁷ Abraham baikiri wepepakekawã shinayana: “Adiwu cien wariya wakeyatiruba. Ewẽ awĩ Sarariwi ma noventa wari aka”, ikax witsadi.

¹⁸ Naskake Dios yuidi: “Mewẽ awara sharawuya Ismaelna ipainu”, Abrahampa Dios wadi.

¹⁹ Naskaitu Epa Diospa Abraham kebadi: “Mewẽ awĩ Saraweta mi wake wisti ma awaidaka. Ma kaĩyadu adekĩ Isaac”, ma waaxiwi. “Dukuraweta na nu shinakuiyai awẽ kaiwuunuax ichapanawã kaĩpakedakawu ẽ naskari wapadaka.

²⁰ Ismael uduax mia kiwĩyaitu ẽ bia dika. Naariwi ẽ awara shara inanupukui. Wake ichapaya ita awẽ kaiwuunuax ichapanawã kaĩpakedakawu. Naskatari doce diaiwu bitsisipa bai wetsa ari ikawu atũ apa Ismael inupukui.

²¹ Wari wisti iixiwaitu Sara ma wakeya iwaidaka. Dukuraweta na nu shinakuiyai ẽ axunupukui Isaacweta”, Epa Diospa Abraham wadi.

²² Abrahamwe tsaita naduax Dios kadi.

²³ Naa pedata Abraham awẽ wushki wichi xatedi. Naskata awẽ wake Ismaelnari adi awẽ uibatiwunari na peiuxũ wibiswuri nawawe atũ wichi wushki xatediwu. Na Epa Dios yuiya keskadiwu.

²⁴ Abraham noventa y nueve wariya idi.

²⁵ Awẽ wake trece wari ma ika idi wushki wichi xatediwu.

²⁶ Naskadu naa pedata na raweta wushki wichi xatediwu.

²⁷ Naatiiwi dukuwede na Abraham pexe aduxu kaĩdiwu yawi bai wetsawu awẽ kaiwuuyabaweke atu peiuxũ widi naawaweri naatiiwi Abrahamweta atũ wushki wichi xatediwu.