Génesis 1 - Yura porciones de la biblia

Dios naatiiwi udiwadi

¹ Diospa udiwakĩ taewadi dai yawi bai.

² Bai sharaba idi. Wakishiwane enewa wepua idi. Epa Dios awẽ Espíritu Santo enewa manaũ kawakedi.

³ Epa Diospa yuidi: “Chaxayai inu”, waadu chaxatadi.

⁴ Epa Dios uĩya sharakui idi. Chaxayai ita wakishiwa paxkanawadi.

⁵ Chaxayai adekĩ peda, wadi. Wakishiwa adekĩ yabe, wadi. Yabeta pedai taedi. Ma peda wisti ika idi.

⁶ Epa Diospa yuidi: “Daiwe”, waadu daidi. “Dai nexpakayaduax ede paxkanu”, wadi.

⁷ Naskawaxu dai Diospa udiwadi. Ede atiriwi dai mera ikaidu atiriwi amanauri idi.

⁸ Diospa uĩya dai sharakui uĩdi. Na adekĩ dai, wadi. Naskata yabeta pedadi. Ma peda rawe ika idi.

⁹ Naskata: “Dai nunamariduax nadu wisti enewa ichanu”, Diospa wadi. “Bai betu tsekenu”, waadu kushi naskatadi.

¹⁰ Epa Dios bai betu adekĩ bai, wadi. Enewa nadu wisti ichawu adekĩ enewa, wadi. Epa Dios uĩya shara idi.

¹¹ Diospa bai adu uĩya sharakui idi. Bai adu iwiwu ma ika idi. Wibiyawu wasiwu exeyawu idi.

¹² Bai adu charuwu wetsa keskarawu wuaita wasi exeyawu ita iwi wibitiruwu Diospa uĩya sharakui idi.

¹³ Ma peda tres ma ika idi.

¹⁴ Naskata Epa Diospa yuidi: “Dai mera chaxayaiwu inu Peda yawi yabe paxkanawaduwu. Naawuxu peda tapita wariya bechaka nu tapinu.

¹⁵ Dai meraxu bai adu chaxaiwu inu”, waadu naskadi.

¹⁶ Epa Diospa chaxayai ewapa rawe wadi. Wari pedata chaxanu uxe yabetari chaxanu exteweruri wadi.

¹⁷ Nama chaxanuwu Epa Dios dai adu netadi.

¹⁸ Chaxayai ita wakishiwa paxkanawadi. Pedata chaxata yabetari chaxanuwu. Epa Diospa uĩya sharakui idi.

¹⁹ Naskata ma peda cuatro ika idi.

²⁰ Naskata Epa Diospa yuidi: “Ede mera ikawu wetsa keskarawu inu. Enewawu mera ikawu ichanuwu. Peiyawuri wumakaya dai mera yuyatiruwu inu”. Diospa uĩya sharakui idi.

²¹ Naskawaxu Diospa ede meradua shima ewapanawawu kaitiru udiwata peiyawu udiwadi. Diospa uĩya sharakui idi.

²² Tsai shara iskara atu yuidi: “Ichapakexakawe yuina wetsa keskara edewu mera ikawu. Ewapanawawuriwi ichapa wakewuya ipaxanuwu. Peiyawu wetsa keskarawu inu. Peiyawawe wakewu bai adu ichapakexanuwu”, Diospa wadi.

²³ Yabeta pedadi. Ma peda cinco ma ika idi.

²⁴ Epa Diospa yuidi: “Bai adu ikawu yuina idawanabetiruwu dii mera yuina ikawuri ichapakexanuwu”, idi. Naskatari: “Yuina pitiruwu ita yuina pitiruwuba bai adu xaratiruwuri inu”, Epa Diospa waadu naskatadi.

²⁵ Epa Diospa udiwadi yuina pitiruwu ita yuina pitiruwuba bai adu xaratiruwuri. Epa Diospa uĩya sharakui idi.

²⁶ Naskata yuidi: “Dukuwede nu udiwanu duku keskara inu. Yuinawu atũ iwu inu”, Diospa wadi.

²⁷ Diospa dukuwede udiwadi awẽ shina keskara inu. Dukuwede udiwata awĩwu udiwadi.

²⁸ Epa Dios tsai shara iskara atu yuidi: “Ichapakexakawe. Ede mera ikawu shimawawe atũ iwu peiyawawe atũ iwuri na dai mera yuyatiruwuri yuinawawe iwuri bai adu xaratiruwuri nawuwawe iwu mi ipadaka.

²⁹ Ẽ bia bai inai. Iwi wibiyawu exeyawu naawu mi pitiru.

³⁰ Yuina wetsa keskarawu peiyawu xaratiruwu wasiwu inata badi peiwuri ẽ atu inai nawu pinuwu”, Epa Diospa Adán wadi.

³¹ Diospa uĩya sharakui idi. Ma peda seis ma ika idi.