Luke 22 - Musselmani Burmese1 ထို့နောက် ပသခါပွဲတော်ဟုခေါ်သော တဆေးမဲ့မုန့်ပွဲတော်အချိန် နီးကပ်လာ၏။ 2 ဂျူးပုရောဟိတ်အကြီးအကဲများနှင့် ကျမ်းတတ်ဆရာတို့သည် လူထုကို ကြောက်ရွံ့ကြသည်ဖြစ်၍ ကိုယ်တော်ယေရှုကို မည်ကဲ့သို့သော အကြောင်းရှာ၍ တိတ်တဆိတ်သတ်ရမည့်နည်းလမ်းကို ရှာဖွေနေကြ၏။ 3 ထို့နောက် သာဝကတစ်ဆယ့်နှစ်ပါးတွင် အပါအဝင်ဖြစ်သည့် ယုဒရှကာရုတ်ထံသို့ မာရ်နတ်သည် ဝင်ရောက်ပူးကပ်လေ၏။ 4 ထို့နောက် ယုဒသည် ဂျူးပုရောဟိတ်အကြီးအကဲများနှင့် ဗိမာန်တော်အရာရှိများထံ ချဉ်းကပ်၍ ကိုယ်တော်ယေရှုအား သူတို့လက်ထဲသို့ မည်ကဲ့သို့ အပ်နှံရမည်ကို ဆွေးနွေးတိုင်ပင်လေ၏။ 5 ထိုသူတို့သည်လည်း ဝမ်းမြောက်ကြ၍ ယုဒအား ငွေပေးရန် သဘောတူလိုက်လေ၏။ 6 ယုဒလည်း သဘောတူသဖြင့် လူစုလူဝေး မရှိသောအချိန်တွင် ကိုယ်တော်ယေရှုကို ဖမ်းဆီးရန် အခွင့်အခါကောင်းကို စောင့်နေလေတော့၏။ 7 ထို့နောက် တဆေးမဲ့မုန့်ပွဲတော်တည်းဟူသော ပသခါပွဲတော်အတွက် သိုးသူငယ်ကို ပူဇော်ရသောနေ့သို့ ရောက်လာ၏။ 8 ထို့ကြောင့် ကိုယ်တော်ယေရှုက ပေတရုနှင့် ယောဟန်အား “ပသခါပွဲတော်ကို ငါတို့အတူတကွ စားဖို့ရန် သွား၍ ပြင်ဆင်ကြလော့” ဟုမိန့်ဆိုတော်မူ၏။ 9 သူတို့ကလည်း “ကိုယ်တော်၊ အကျွန်ုပ်တို့ကို မည်သည့်အရပ်၌ ပြင်ဆင်စေလိုပါသနည်း” ဟုမေးလျှောက်ကြသဖြင့် 10 ကိုယ်တော်က “မြို့ထဲသို့ ဝင်သည့်အခါ ရေအိုးထမ်းလာသော လူတစ်ယောက်သည် အသင်တို့အား ကြိုဆိုလိမ့်မည်။ ထိုသူနောက်သို့ လိုက်၍ သူဝင်သွားသော အိမ်ကို ဝင်ကြလော့။ 11 ထို့နောက် အိမ်ရှင်အား ‘ကျွန်ုပ်တို့၏ ဆရာက တပည့်တော်တို့နှင့်အတူ ပသခါပွဲတော်ညစာ သုံးဆောင်ရမည့်အခန်းသည် မည်သည့်နေရာတွင်ရှိသနည်းဟု အသင့်ကို မေးခိုင်းလိုက်ပါသည်’ ဟုဆိုကြလော့။ 12 ထိုအခါ အိမ်ရှင်က သင်တို့ကို အပေါ်ထပ်သို့ ခေါ်၍ ကျယ်ဝန်းသော အခန်းတစ်ခန်းကို ပြပေလိမ့်မည်။ ထိုအခန်းတွင် ပွဲတော်အတွက် ပြင်ဆင်မှုကိုပြုကြလော့” ဟုမိန့်တော်မူ၏။ 13 ထို့နောက် ပေတရုနှင့် ယောဟန်တို့သည်လည်း ထွက်ခွာသွားကြကာ ကိုယ်တော်မိန့်တော်မူသည့်အတိုင်း တွေ့ရှိကြသဖြင့် ပသခါပွဲတော်အတွက် ကောင်းမွန်စွာ အသင့်ပြင်ဆင်ကြလေ၏။ 14 ပသခါပွဲတော်စားရန် အချိန်ကျလာသောအခါ ကိုယ်တော်သည် သာဝကများနှင့်အတူ စားပွဲဝိုင်းတွင် ထိုင်လေ၏။ 15 ထို့နောက် ကိုယ်တော်က သူတို့အား “ငါဒုက္ခဝေဒနာမခံရမီ ဤပသခါပွဲကို သင်တို့နှင့်အတူ စားသုံးရန် ငါအလွန်အလိုရှိ၏။ 16 သင်တို့အား ငါဆိုသည်ကား ဘုရားရှင်သည် နောက်ဆုံးသောအချိန်၌ နေရာတိုင်း၊ လူတိုင်းကို အုပ်စိုးမည့်အချိန် မရောက်မီအထိ ငါကိုယ်တော်သည် နောက်ထပ် ပသခါပွဲတော်ကို စားသုံးတော့မည်မဟုတ်” ဟုမိန့်တော်မူ၏။ 17 ထို့နောက် ကိုယ်တော်သည် ခွက်ကိုယူ၍ ဘုရားဂုဏ်တော်ကို ချီးမွမ်းပြီးလျှင် “ဤခွက်ကိုယူကြလော့၊ အချင်းချင်းခွဲဝေသောက်ကြလော့။ 18 သင်တို့အား ငါဆိုသည်ကား၊ ဘုရားရှင်သည် နေရာတိုင်း၊ လူတိုင်းကို အုပ်စိုးမည့်အချိန် မရောက်မီအထိ နောက်ထပ်ဤစပျစ်ရည်ကို ငါသောက်လိမ့်မည်မဟုတ်” ဟုမိန့်ဆိုပြီးလျှင် 19 ကိုယ်တော်သည် မုန့်ကိုယူ၍ ဘုရားရှင်၏ဂုဏ်တော်ကို ချီးမွမ်းပြီး မုန့်ကိုဖဲ့၍ တပည့်တော်တို့အား ပေးလျှက် “ဤမုန့်သည် သင်တို့အတွက် ငါပေးသော ငါ၏ကိုယ်ခန္ဓာဖြစ်၏။ ငါ့ကို အောက်မေ့သတိရရန် စားသုံးကြလော့” ဟုမိန့်တော်မူ၏။ 20 ထိုနည်းတူ စားသုံးပြီးမှ ကိုယ်တော်သည် ခွက်ကိုကိုင်၍ “ဤစပျစ်ရည်သည် ဘုရားရှင်၏ပဋိညာဉ်အသစ်တည်ရန် သင်တို့အား ငါသွန်းလောင်းပေးသော ငါ၏အသွေးပုံဆောင်ခြင်းဖြစ်၏။ 21 သို့ရာတွင် ငါ့ကို ရန်သူတို့လက်သို့ အပ်နှံမည့်သူသည် ယခုငါနှင့်အတူ စားသောက်နေ၏။ 22 လူ့သားတော်သည် ဘုရားရှင်အလိုတော်ရှိသည့်အတိုင်း သေရမည်ဖြစ်သော်လည်း လူ့သားတော်ကို သစ္စာဖောက်မည့် ထိုသူသည်ကား အမင်္ဂလာရှိသောသူဖြစ်၏” ဟုမိန့်တော်မူ၏။ 23 ထိုအခါ တပည့်တော်တို့သည် မိမိတို့တွင် မည်သူသည် ထိုသို့ပြုရန်ကြံရွယ်နေသနည်းဟုအချင်းချင်းမေးမြန်းနေကြလေ၏။ 24 ထို့နောက် တပည့်တော်တို့သည် မိမိတို့အထဲ၌ မည်သူသည် အကြီးမြတ်ဆုံးပုဂ္ဂိုလ်ဖြစ်သည်ဟု မှတ်ယူရမည်ကို အချင်းချင်း အငြင်းပွားနေကြသဖြင့် 25 ကိုယ်တော်က “တိုင်းတစ်ပါးသားရှင်ဘုရင်များသည် သူတို့၏ ပြည်သူလူထုအပေါ် အာဏာရှင်ဆန်ဆန် အုပ်ချုပ်တတ်ကြသော်လည်း သူတို့ကိုယ်သူတို့ အများအကျိုးဆောင်သောသူဟူ၍ လူတို့ကို ခေါ်ဝေါ်စေကြပြီး သူတို့သည် ကောင်းမြတ်သောခေါင်းဆောင်များဖြစ်သည်ဟု ထင်စေလိုကြ၏။ 26 သို့သော် သင်တို့အချင်းချင်းမူကား ထိုသူတို့ကဲ့သို့ မဖြစ်သင့်။ သင်တို့ထဲက ကြီးမြတ်သောသူသည် အသိမ်ငယ်ဆုံးသောသူကဲ့သို့ဖြစ်ရမည်။ ခေါင်းဆောင်သည်လည်း အစေခံကဲ့သို့ နှိမ့်ချ၍ နေထိုင်သင့်သည်။ 27 စားပွဲတွင်ထိုင်နေသောသူနှင့် ထိုသူ့အတွက်အစားအသောက်များကို ပြင်ဆင်ပေးရသူတို့တွင် မည်သူက ပို၍ကြီးမြတ်သနည်း။ စားပွဲ၌ထိုင်နေသောသူက ပို၍ကြီးမြတ်သည်မဟုတ်လော။ သို့သော် ငါကိုယ်တော်သည် သင်တို့ကြားတွင် အစေခံသူသဖွယ်ဖြစ်၏။ 28 ဖြားယောင်းသွေးဆောင်မှုများကို ငါခံခဲ့ရသောအချိန်များ၌ သင်တို့သည် ငါကိုယ်တော်နှင့်အတူ ရပ်တည်ခဲ့ကြသည့်သူများဖြစ်ကြ၏။ 29 ထို့ကြောင့် ငါ၏ခမည်းတော်သည် ငါ့အား အုပ်စိုးပိုင်ခွင့်ကို ပေးအပ်တော်မူသည်နည်းတူ ငါသည်လည်း သင်တို့ကို အုပ်စိုးပိုင်ခွင့်ကိုပေး၏။ 30 သင်တို့သည် ငါ၏နိုင်ငံတော်တွင် ငါ၏စားပွဲ၌ စားသောက်ကြရကာ ပလ္လင်ပေါ်ထိုင်၍ အစ္စရေးမျိုးနွယ်စု တစ်ဆယ့်နှစ်စုကို အုပ်ချုပ်စိုးစံကြရလိမ့်မည်” ဟုမိန့်တော်မူ၏။ 31 တဖန် ကိုယ်တော်က “ရှိမုန်၊ ရှိမုန်၊ နားထောင်လော့၊ လယ်သမားသည် စပါးစေ့နှင့် အခွံကို ခွဲခြားသကဲ့သို့ မာရ်နတ်သည်လည်း သင်တို့တစ်ယောက်စီကို စမ်းသပ်ခွဲခြားရန် အခွင့်ရလေပြီ။ 32 သို့သော် သင်၏ယုံကြည်မှုခိုင်မြဲနေစေရန်အတွက် ငါဆုတောင်း၏။ သင်၏အသိတရားပြန်လည်ရရှိသောအခါ သင်သည် အခြားတပည့်တော်ညီအစ်ကိုများကိုလည်း ယုံကြည်မှုခိုင်မြဲစေရန်အလို့ငှာ ကူညီအားဖြည့်ပေးရမည်” ဟုမိန့်ဆိုလေ၏။ 33 ထိုအခါ ပေတရုက “ကိုယ်တော်၊ အကျွန်ုပ်သည် ကိုယ်တော်နှင့်အတူ ထောင်ထဲသို့ဖြစ်စေ၊ သေရွာသို့ဖြစ်စေ လိုက်ပါရန် အသင့်ရှိပါ၏” ဟုလျှောက်တင်သဖြင့် 34 ကိုယ်တော်က “ပေတရု၊ သင့်အားငါဆိုမည်ကား ယနေ့ ကြက်မတွန်မီပင် သင်သည် ငါ့ကို မသိဟု သုံးကြိမ်တိုင်တိုင် ငြင်းဆိုလိမ့်မည်” ဟုမိန့်တော်မူ၏။ 35 ထို့နောက် ကိုယ်တော်က တပည့်တော်တို့အား “ငါသည် အသင်တို့အား ပိုက်ဆံ၊ လွယ်အိတ်နှင့် ဖိနပ်တို့ကို မယူစေဘဲ စေလွှတ်ခဲ့သည့် အချိန်တွင် သင်တို့၌ တစ်စုံတစ်ရာ ချို့တဲ့မှုရှိခဲ့သလော” ဟုမေးတော်မူလျှင် တပည့်တော်တို့က “မရှိပါ” ဟုလျှောက်တင်ကြ၏။ 36 ထိုအခါ ကိုယ်တော်က “ယခုမူကား ငွေအိတ်ရှိလျှင် ယူကြ။ လွယ်အိတ်ကိုလည်း ယူကြ။ ဓါးမရှိလျှင်လည်း အဝတ်အထည်အချို့ကို ရောင်း၍ ဓါးကို ဝယ်ကြလော့။ 37 သင်တို့အား ငါဆိုသည်ကား ‘ထိုသူသည် ရာဇဝတ်သားအဖြစ် သတ်မှတ်ခံရ၏’ ဟုကျမ်းစာပိုဒ်တွင် ငါ၏အကြောင်းကို ဖော်ပြထားသည့်အတိုင်း ပြည့်စုံလာတော့မည်ဖြစ်သည်” ဟုမိန့်တော်မူ၏။ 38 ထိုအခါ တပည့်တော်တို့က “ကိုယ်တော်၊ ကြည့်ပါ။ အကျွန်ုပ်တို့တွင် ဓါးနှစ်လက် ရှိပါ၏” ဟုလျှောက်တင်သဖြင့် ကိုယ်တော်က “လုံလောက်ပြီ” ဟုမိန့်တော်မူ၏။ 39 ထို့နောက် ကိုယ်တော်သည် ပြုတော်မူလေ့ရှိသည့်အတိုင်း သံလွင်တောင်ပေါ်သို့ ကြွတော်မူလေ၏။ တပည့်တော်တို့သည်လည်း သူ၏နောက်တော်သို့ လိုက်လာကြလေ၏။ 40 ထိုနေရာသို့ရောက်သောအခါ ကိုယ်တော်က တပည့်တော်တို့အား “ဖြားယောင်းသွေးဆောင်ခြင်းမခံရစေရန် အလို့ငှာ ဘုရားရှင်ထံတော်တွင် ဆုတောင်းကြလော့” ဟုမိန့်တော်မူ၏။ 41 ထို့နောက် ကိုယ်တော်သည် သူတို့ထံမှ ခဲတစ်ပစ်စာခန့် အနည်းငယ်ဝေးသောနေရာသို့ သွား၍ ဒူးထောက်လျှက် 42 “အို အဖဘုရား၊ အဖဘုရား အလိုတော်ရှိလျှင် အကျွန်ုပ်ထံ၌ ဤကဲ့သို့ဆိုးရွားသောအရာများ မဖြစ်ပါရစေနှင့်။ သို့သော်ငြားလည်း အကျွန်ုပ်၏အလိုအတိုင်း မဟုတ်ပါဘဲ၊ အဖဘုရား၏အလိုအတိုင်းသာ ဖြစ်စေတော်မူပါ” ဟုဆုတောင်းတော်မူ၏။ 43 ထိုအခါ ရွှေမြို့တော်မှ နတ်ဒေဝါတစ်ပါး လာရောက်၍ ကိုယ်တော်ကို အားပေးလေ၏။ 44 ကိုယ်တော်သည် ပြင်းစွာသောဝေဒနာကို ခံစားလျှက် အာရုံစူးစိုက်၍ ဆုတောင်းတော်မူရာ ကိုယ်တော်ထံမှ စီးကျလာသော ချွေးသီးချွေးပေါက်တို့သည် သွေးစက်များသဖွယ် မြေကြီးပေါ်သို့ ကျတော်မူလေ၏။ 45 ကိုယ်တော်သည် ထိုသို့ဆုတောင်းတော်မူပြီးလျှင် တပည့်တော်တို့ထံသို့ ပြန်လာသောအခါ တပည့်တော်တို့သည် ဝမ်းနည်းမောပန်းပြီး အိပ်ပျော်နေကြသည်ကို တွေ့သောအခါ 46 ကိုယ်တော်က တပည့်တော်တို့အား “သင်တို့ အဘယ်ကြောင့် အိပ်နေကြသနည်း။ ထကြလော့၊ သူတစ်ပါး၏ ဖြားယောင်းသွေးဆောင်မှုသို့ မကျရောက်စေရန် ဆုတောင်းကြလော့” ဟုမိန့်တော်မူ၏။ 47 ကိုယ်တော် ဤသို့မိန့်တော်မူနေစဉ်မှာပင် သာဝကတစ်ဆယ့်နှစ်ဦးထဲမှ တစ်ဦးဖြစ်သည့် ယုဒသည် လူအုပ်ကြီးတစ်စုကို ဦးဆောင်၍ ကိုယ်တော့်ထံသို့ ခေါ်ဆောင်လာခဲ့ပြီး သူသည် ကိုယ်တော့်ကို နမ်းရှုံ့ခြင်းငှာ ချဉ်းကပ်လေ၏။ 48 ကိုယ်တော်က သူ့အား “သင်သည် လူ့သားတော်ကို နမ်းရှုံ့ခြင်းဖြင့် သစ္စာဖောက်မည်လော” ဟုမေးလေ၏။ 49 တပည့်တော်တစ်ဦးက ထိုအခြင်းအရာကို မြင်သောအခါ “ကိုယ်တော်၊ အကျွန်ုပ်တို့ သူတို့အား ဓါးဖြင့်တိုက်ခိုက်ရမည်လော” ဟုမေးလျှောက်လေ၏။ 50 ထို့နောက် ထိုသူသည် အကြီးဆုံးပုရောဟိတ်၏နောက်လိုက်တစ်ဦးအား ဓါးဖြင့်ခုတ်လိုက်ရာ ညာဖက်နားကိုထိ၍ ပြတ်သွားလေ၏။ 51 ကိုယ်တော်က “ဤမျှနှင့်ရပ်လော့” ဟုမိန့်တော်မူပြီး ထိုပြတ်ကျသွားသော အစေခံ၏နားရွက်ကို လက်တော်နှင့်တို့ထိ၍ မူလအတိုင်းဖြစ်စေတော်မူ၏။ 52 ထို့နောက် ကိုယ်တော်က သူ့ကို ဖမ်းဆီးရန်လာကြသော ဂျူးပုရောဟိတ်အကြီးအကဲများ၊ ဗိမာန်တော်အစောင့်တပ်သားများနှင့် ဂျူးလူမျိုးခေါင်းဆောင်များအား “သင်တို့သည် ဓားပြကိုဖမ်းသကဲ့သို့ ငါ့ထံသို့ အဘယ်ကြောင့် တုတ်၊ ဓါးများကို ကိုင်ဆောင်၍ ရောက်လာကြသနည်း။ 53 ငါသည် နေ့တိုင်းဗိမာန်တော်၌ ရှိနေစဉ် သင်တို့ အဘယ်ကြောင့် ငါ့ကို မဖမ်းဆီးကြသနည်း။ သို့ရာတွင် ဤအချိန်၌ကား သင်တို့၏အချိန်ဖြစ်၍ မာရ်နတ်သည်လည်း သူ၏ယုတ်ညံ့သောအမှုအရာတို့ကို လုပ်ဆောင်သည့်အချိန်တည်း” ဟုမိန့်တော်မူ၏။ 54 ထို့နောက် သူတို့သည် ကိုယ်တော်အား ဖမ်းချုပ်၍ အကြီးဆုံးပုရောဟိတ်၏အိမ်တော်သို့ ခေါ်ဆောင်သွားသောအခါ ပေတရုသည် ခပ်လှမ်းလှမ်းမှ နောက်ယောင်ခံ၍ လိုက်သွားလေ၏။ 55 ခြံဝင်းအတွင်း၌ လူအချို့သည် ဝိုင်းထိုင်ပြီးမီးလှုံနေကြစဉ် ပေတရုသည် သူတို့၏ကြား၌ ထိုင်လေ၏။ 56 အစေခံအမျိုးသမီးတစ်ယောက်သည် ပေတရုထိုင်နေသည်ကို မြင်သောအခါ သူ့ကို လက်ညှိုးထိုးပြ၍ “ဤသူသည် ယေရှုနှင့် အပေါင်းအပါဖြစ်၏” ဟုဆိုလေ၏။ 57 ထိုအခါ ပေတရုက “အချင်းအမျိုးသမီး၊ အကျွန်ုပ်သည် ဤသူကို မသိပါ” ဟုငြင်းဆို၏။ 58 ခဏကြာသော် လူတစ်ယောက်သည် ပေတရုကိုမြင်သဖြင့် “သင်သည်လည်း ထိုသူအစုတွင် အပါအဝင်ဖြစ်၏” ဟုဆိုသဖြင့် ပေတရုက “အကျွန်ုပ်သည် ဤသူတို့အဖွဲ့ထဲမှ မဟုတ်ပါ” ဟုငြင်းဆိုပြန်၏။ 59 တဖန် တစ်နာရီခန့်အကြာတွင် အခြားသူတစ်ဦးက “ဤသူသည် ဂါလိလဲပြည်သားဖြစ်ပြီး ယေရှုနှင့် အပေါင်းအပါဖြစ်ခဲ့သည်မှာ အသေအချာပင်ဖြစ်၏” ဟုခိုင်ခိုင်မာမာဆိုလေ၏။ 60 သို့ရာတွင် ပေတရုက “အချင်းလူ၊ သင် ပြောသောအကြောင်းအရာကို အကျွန်ုပ်မသိ” ဟုငြင်းဆိုပြန်၏။ ထိုသို့ပြောဆိုနေစဉ်အချိန်၌ပင် ကြက်တွန်လေ၏။ 61 ထိုအခါ ကိုယ်တော်က ပေတရုအား လှည့်ကြည့်တော်မူ၏။ ပေတရုသည် ကိုယ်တော်မိန့်မှာခဲ့သည့် “ယနေ့ည ကြက်မတွန်မီပင် သင်သည် ငါ့ကိုမသိဟု သုံးကြိမ်တိုင်တိုင် ငြင်းပယ်လိမ့်မည်” ဆိုသောစကားကို အမှတ်ရသဖြင့် 62 အပြင်သို့ ထွက်ပြီး သည်းထန်စွာ ငိုကြွေးလေတော့သည်။ 63 ကိုယ်တော်ယေရှုကို စောင့်ကြပ်သူတို့သည် ကိုယ်တော်အား လှောင်ပြောင်ကြပြီး ရိုက်ပုတ်ကြ၏။ 64 ကိုယ်တော်၏မျက်လုံးများကို အဝတ်ဖြင့်စည်းထားကြပြီး “သင့်ကို မည်သူရိုက်ပုတ်သနည်းဆိုသည်ကို ဟောကြည့်ပါ” ဟုဆိုကာ 65 နည်းအမျိုးမျိုးဖြင့် ကိုယ်တော်အား ညှဉ်းပန်းနှိပ်စက်၍ စော်ကားပြောဆိုကြလေ၏။ 66 မိုးလင်းသောအခါ ဂျူးပုရောဟိတ်အကြီးအကဲများ၊ ကျမ်းတတ်ဆရာများနှင့် ဂျူးလူမျိုးခေါင်းဆောင်တို့သည် တရားလွှတ်တော်၌ ကိုယ်တော်အား စစ်ဆေးမေးမြန်းကြလေ၏။ သူတို့က ကိုယ်တော်အား 67 သင်သည် ကယ်တင်ရှင်မေရှိယဖြစ်သည်ဆိုသည်မှာ ဟုတ်သလော၊ မဟုတ်သလောဖြေပါ” ဟုဆိုကြ၏။ ထိုအခါ ကိုယ်တော်က “သင်တို့အား ငါပြောလျှင်လည်း သင်တို့သည် မယုံကြည်ကြ။ 68 သင်တို့ကို ငါမေးလျှင်လည်း သင်တို့ပြန်မဖြေကြ။ 69 သို့သော် ယခုအချိန်မှစ၍ လူ့သားတော်သည် တန်ခိုးတော်အနန္တ၊ ဂုဏ်တော်အနန္တနှင့် ပြည့်စုံတော်မူသော အဖဘုရားရှင်၏လက်ယာဘက်တွင်ထိုင်၍ အုပ်ချုပ်စိုးစံမည်ဖြစ်၏” ဟုမိန့်တော်မူ၏။ 70 ထိုအခါ သူတို့က “ဤသို့ဆိုလျှင် သင်သည် ဘုရားရှင်၏သားတော်လော” ဟုမေးကြသဖြင့် ကိုယ်တော်က “သင်တို့ဆိုသည့်အတိုင်းပင်ဖြစ်၏” ဟုပြန်လည်ဖြေကြားလေ၏။ 71 ထိုအခါ သူတို့ကလည်း “ဤသူကိုယ်တိုင် ထိုသို့ပြောဆိုသည်ကို ငါတို့ကြားကြရပြီဖြစ်၍ အခြားမည်သည့်သက်သေမျှမလိုအပ်တော့ပေ” ဟုဆိုကြလေ၏။ |
This translation of the Musselmani Burmese Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.