လုကာ 23 - Marmagyi1 သိုဘာဇေ ဂျူးဆောသာ့ရ် ဘေကူးနဲ ကိုယ်တော်ယေရှုရတ် ရောမရာဇာပိလတ်ရ်အတ်ရေ နီဇာယတ်နန့် 2 အီသေ ဧကရာဇ်ရတ် အခွန် နိုသည်ဘတ်လိုက် မာနဂို့ရိ ဇေဂူးန်သေ အူဖာရ်ဂေါ်ရတ်သပ် မေရှိယဟောသတ် ရာဇာအို့ဂို့အို့ယေဘို့လိ ဟိုယေးနန့် မာနုချ်အောကောလောရတ် ဟောရက်ပ်ရက်ဆားမားသေ ဖိုရီဘတ်လိုက် ဂေါ်ရတ်သပ် အာင်ရ ဒေကိ" ဟိုးယ် ပိလတ်ရ်မောသည့် ကိုယ်တော်ရတ် ဒူချ်ဘာဇယေး။ 3 ပိလတ်ယေး ကိုယ်တော်ရှုရတ် "သူယ် ဂျူးဇာသီရ် ရာဇာနား" ဘို့လိ ဖော်စောရ်ဂို့ကျဲရရ် ကိုယ်တော်ယေ "သူယ်ဟောသတ် အဲနိကျအို့ယေ" ဟိုးယ် ပြန်လို့ အော်ဒလ်ဂို့ကျဲ။ 4 ပိလတ်ရာဇာယေ ပုရောဟိတ်ဒေါမ့်ရ်အောကောလ် မာနုချ်အောကောလောရ် အိကျေ ဖိရိယတ်နန် "အီသေသူးန် ဒူချ်အတ်ခါးနို့ အိုင့်နာဖိုက်ရ်" ဘို့လိ ဟိုယေး။ 5 သိုယ် အိသေးရာဘေကူးနဲ "အီသေ ဂါလိလဲဇာငှာသူးန်လို့သီး ယုဒဒတ်ချ်သိုနို့ မာနုချ်အောကောလောရတ် အူဇာရ်အောဖားန် ဂိုရိယတ်နန့် ယာ အတ်ရတ်ယိုး အယတ်နန့် ဂေါ်ရတ်သပ်" ဟိုးယ် သော်ရောဂို့ရိ ဒူချ်ဘာဇာ့ယေး။ 6 အဲနိကျ ဟောသတ်အဲယူ(န်) ပိလတ် ဖုနေရရ် "အီသေ ဂါလိလဲရ် မာနုချ်ကိ" ဘို့လိ ဖော်စောရ်ဂို့ကျဲ။ 7 သိုဘာဇေ ကိုယ်တော်ယေ ဟေရုဒ်အုပ်စိုးဂေါ်ရတ်သပ် ဂါလိလဲနယ်သူးန်သတ် ဟိုသကျဲရရ် ကိုယ်တော်ရတ် ဟေရုဒ်ရ်အတ်ရေ ဒီရသည့်ယေး။ အန်းစောလော်မားသတ် ဟေရုဒ်ယိုး ဂျေရုဆလင်တောမ့်နောမားသတ် အချဲ။ 8 ဟေရုဒ်ယေး ကိုယ်တော်ယေရှုရ် အကြောင်း ဖုနိဘာဇေ လော်သိုက်သိုဟောသတ် ဒေရီအောရ်ဇသတ် ကိုယ်တော်ရတ် လော်သာယေးရရ် ဘီရှိ ကုချီအို့ယေး။ အိသေး ကိုယ်တော်ယေရှု ဂိုကျဲသတ် အော်ဘက်ဖ်ဟော်နောအတ်ခါးန် ဒေကိဘတ်လိုက် စိုည်ရိုယေး။ 9 အပ်သလိုက် ဟေရုဒ်ယေး ကိုယ်တော်ရတ် မေးခွန်းဘီရှိဂို့ရိ ဖော်စောရ်ဂို့ရိလေးယိုး ကိုယ်တော် အတ်ခါးနို့ ဖြေနောဂေါ်ရတ်။ 10 သိုဘာဇေ ပုရောဟိတ်ဒေါမ့်ရ်အောကောလ် ကျမ်စီနန့်သတ် မာချ်ထော်ရ်အောကောလ် အူရိ ကိုယ်တော်ရတ် သော်ရောဂို့ရိ ဒူချ်ဘာဇယေး။ 11 ဟေရုဒ်လို့ယ် အိသဲရ်မေလီထားရိအောကောလ် ကိုယ်တော်ရတ် သတ်ချတ်ရာဇ် အော်ဂေါ်လာသီဂိုရိ ကိုယ်တော်ရတ် မောဂါ့ဟော်ရော်ရတ် ဂါသည်ယာယတ်နန့် ပိလတ်ရာဇာရ်အတ်ရေ အာဘာရ် ဒီရသည့်ယေး။ 12 ဟေရုဒ်လို့ယ် ပိလတ်သက်ရ အာဂေ ချိုးသူးရ်အို့လေယိုး အဲသည့်န် ဘိုသူး အို့ဂိယိုးယ်။ 13 ပိလတ်ရာဇာယေ ပုရောဟိတ်ဒေါမ့်ရ်အောကောလ်၊ ဂျူးဘာချာရေးဆောသာ့ရ်အောကောလ်အတ်သပ် မာနုချ်အောကောလောရတ် သော်လာဂိုရိ 14 "အီသေ အူဇာရ်အောဖားန် ဂေါ်ရတ်သပ်ဟိုးယေးနန့် သော်ရ အာင့်ရ်အတ်ရေ ဒါကီအိုက်နောစ်။ သို့ သော်ရရ်မောသည့် အိသေးရေ ဖော်စောရ်လို့ယိသည့်သို့ သော်ရ ဟိုယောသတ်အဲနိကျ ဒူချ်ဂိုကျဲသတ် နိုသည်ကိရ်။ 15 ဟေရုဒ်ယိုး အိသေးသူ(န်) ဒူချ်သော်ဝိုက် နာဖာရ်ဇသတ် အိသေးရေ ကေစုဒူချ်နိုသည်ယေးနန့် အာင့်ရ်အတ်ရေ အာဘာရ် ဒီရယေး။ အီသေသူးန် မော်ရာဖိုရီဗျိုးသတ် ဒူချ်အတ်ခါးနို့ နိုက်သေ ဒါဟားဇာ့ရ်။ 16 အပ်သလိုက် အိသေးရေ ကြိမ်ဒဏ်သည်ယေးနန့် အေရီဒတ်ဖတ်လားယိုးမ်" ဘို့လိ ဟိုယေး။ 17 ပိလတ်ယေး အဲနိကျဟောသတ်သပ် ဖို့ယောရ်သည်နော်မားသတ် မာနုချ်အတ်ဇောနောရတ် အေရီသည်ယာဖော်ရေသပ် ဖတ်ချားဒ့ရစ်အို့ယေ။ 18 သို့ မာနုချ်ဘေကူးနဲ "အိသေးရေ မာရီ ဗာရဗ္ဗရတ် အေရီသော်" ဟိုးယ် ဖောင့်ကတ်ဘေကူးနဲ ဂူဇူရီယတ်နန့် ဟိုယေး။ 19 အန်းသေ ဗာရဗ္ဗယေး တောမ့်နောမားသတ် အို့ယေးသေ ပုန်ကန်ဂိုရိ မာနုချ်မိုက်ကျဲသတ် မာနုချ်အို့ယေးနန့် ဇံယားလောမားသတ် ဖော်ရာဖိုကျဲ။ 20 ပိလတ်ယေး ကိုယ်တော်ယေရှုရတ် အေရီသည်သည်သို မော်နန်ဟောသတ်အပ်သလိုက် မာနုချ်အောကောလောသူးန် ဘာချာရေးဆောသာ့ရောသူ(န်) အာဘာရ် ဖော်စောရ်လို့ယေး။ 21 သို့ အိသေးရာ "အိသေးရေ လက်ဝါးကပ်တိုင်မားသတ် သူလော။ အိသေးရေ လက်ဝါးကပ်တိုင်မားသတ် သူလော" ဟိုးယ် ဂူဇူရီ ဂူဇူရီ သိုက်ကေ။ 22 အန်းစောလော်သ် ပိလတ်ယေး "အိသေး ဟိုနီကျာ ဒူချ်အောကောလ် ဂိုကျဲသတ်။ အိသေးရေ သေဒဏ်သည်ဗျာလိုက် ဒူချ် အိုင့် နိုသည်ကိရ်။ အပ်သလိုက် အိသေးရေ ဒူချ်သည်ယေးနန့် အေရီဒတ်ဖားလိုက်" ဟိုးယ် အာဘာရိုး ဟိုယေး။ 23 သို့ မာနုချ်အောကောလို့ကိုယ်တော်ယေရှုရတ် သေဒဏ်သည်ဗျာလိုက်ဘို့လိ ဒေါမ့်ရ်ဂို့ရိ ဂူဇော်ရတ်ရ်။ 24 ဖီစား မာနုချ်အောကောလ် ကူးဇဲသေအဲနိကျ ပိလတ်ရာဇာယိုး သည်ယေးနန့် 25 အိသေး မာနုချ်အောကောလတ် အေရီသည်သိုဟောသတ် မာနုချ်မက်ရိ ဇံယားလ်ဖို့ကျဲသတ် ဒူချ်သော်မာနုချ် 'ဗာရဗ္ဗ'ရတ် အေရီသည်ယေးနန့် ကိုယ်တော်ယေရှုရတ် အိသဲရာသူးန် ဇေနီကျာဂိုသို့ဟောရ် အဲနိကျ ဂိုရိဘတ်လိုက် အိသေးရာရတ် ဒတ်ဖတ်လားယေး။ 26 မေလီထားရိအောကောလ် ကိုယ်တော်ရတ် ဒါကီနီဇာဗျိုးချောမားသတ် ကုရေနေဇာငှာသူးန် ရှိမုန်ဟောသတ်အိသေး ဘီလော်သူးန်အယတ်သတ် ဒေခဲရရ် အိသေးရေ ဒို့ရိယတ်နန် ကိုယ်တော်ရ် ဖီစောသည့် လက်ဝါးကပ်တိုင်ရတ် လော်ဝါသည် ဇိုက်သိုဟိုယေး။ 27 မာနုချ်ဘီရှိဂို့ရိ ကိုယ်တော်လိုက် ဘူခ်ဘာဂျာယတ်နန့် ဟာင်သေသတ် မာယာဖွာအောကောလတ် ကိုယ်တော်ရ် ဖီစောသည့် ဇာယေး။ 28 ကိုယ်တော်ယေ အိသေးရာရ်အိကျေ ဖိရိယတ်နန် "ဂျေရုဆလင်ရ် မာယာဖွာကောလ်၊ အာင့်လိုက် နာဟာင်သည်စ်။ သော်ရလိုက်သတ် သော်ရရ်ပူဇိအောကောလောလိုက် ဟာင်သည်စ်။ 29 ဘက်ဇာမာယာဖွာ၊ ဖွာဖတ်ရော်သ်နောဝင်သတ် ဖတ်ထ်အတ်သပ် ဒူသ်နားဟဘာသတ် ဖွာအဲယူ(န်)မှ ကံကောင်းရေ" ဟိုးယ် မာနုချ်ဘီရှိဂို့ရိ ဟိုဗျိုးသတ် သည်(န်)အောကောလ် အာဗျိုး။ 30 အဲသည်နော်မားသတ် မာနုချ်အောကောလတ် မူရအောကောလောရတ် 'အာင်ရရ်အူဝါရေ ဘက်ငိဖော်ရော်' ဘို့လိ၊ တောင်ကုးန်အောကောလောရတ် 'အာင်ရရတ် ဇာ့ဘိုက်အတ်ရ်' ဘို့လိ ဟိုဗျိုး။ 31 အိုက်လ်အိုးယ်ရိုးယေးသေ ဂါစောဒိခါးန် ဒူချ်နှိုက်သေး အာင့်သူးန်အို့သို့ အေနီကျာ ဒူကိုးအို့လေး ဖုဝိုက်ရိုးယေးသတ် ဂါစောဒိခါးန် ဒူချ်သော်အို့ယေးသတ် သော်ရသူးန် ဟိုနီကျာ အို့ဗျိုး" ဟိုးယ် အော်ဒလ်ဂို့ကျဲ။ 32 ဒူချ်သော်မာနုချ် အာရောဒူဇော်နို့ ကိုယ်တော်ရ်ဖောင့်ကတ် သေဒဏ်သည်ဗျာလိုက် ဒါကီအိုက်နဲ။ 33 ဦးခေါင်းခွံနာ(မ်)အဆတ်သပ် တောင်ကုန်းအူဝါရေ ဖိုစဲရရ် ကိုယ်တော်ရတ် လက်ဝါးကပ်တိုင်မားသတ် သူလိ ဇိုလိုယ်မာကျဲ။ ကိုယ်တော်ရ် အတ်ဒ့ဟောသည့် အတ်ဇော်(န်)သော်ရေ ဒူချ်သော်မာနုချ် ဒူဇော်နော်ရတ်ယိုး ကိုယ်တော်ရ် ဒိုင်ဒ့ဟောသည့် အတ်ဇော်(န်)၊ ဘာင့်ဒ့ဟောသည့် အတ်ဇော်(န်) လက်ဝါးကပ်တိုင်မားသတ် သူလိ ဇိုလိုယ် မာကျဲ။ 34 အန်းစောလော်သ် ကိုယ်တော်ယေ "ဘာဖ်ဘောဂဝင့်န်၊ အိသေးရာ ဂေါ်ရတ်သပ်အဲယူ(န်) ဟိုနားဖားရတ်သတ်အပ်သလိုက် အိသေးရာရတ် မာသ်ဂေါ်ရော" ဟိုးယ် ဘော်ရ်ကူးဇဲ။ မေလီထားရိအောကောလ် ကိုယ်တော်ရ် ဟော်ရော်ရတ် ဇော်ဝါကတ်လိုက် ဘော်ရော်ခ်ဂိုကျဲ။ 35 မာနုချ်အောကောလ် သိယာယတ်နန့် ဆိုက်ရိုးယေးသတ်အန်းသေ ဂျူးဆောသာ့ရ်အောကော်လ် ကိုယ်တော်ယေရှုရတ် သတ်ချတ်ရာဇ်ယတ်နန့် "အိသေး မိုင်ရှဲရတ် အူဖာရ်ဂိုရိ အိသေး ဘောဂဝင့်နန့် ဘိုက်စဲသတ် အူဖာရ်ဂေါ်ရတ်သပ် မေရှိယအို့လေး ဇေရ်ဂူးန်သေ အူဖာရ်ဂေါ်ရောခ်" ဘို့လိ ဟောရ်။ 36 မေလီထားရိအောကောလို့ ကိုယ်တော်ရတ် သတ်ချတ်ရာဇ်ယတ်နန့် ဝိုင်ချဉ်ရတ်ဟားဘိုက် 37 "သူယ် ဂျူးဇာသီရ် ရာဇာဟားထိအို့လေ ဇေရ်ဂူးန်သေ အူဖာရ်ဂေါရ်" ဘို့လိ ဟိုယေး။ 38 'အီသေ ဂျူးအောကောလောရ် ရာဇာ' ဟိုးယ် လေကိအဲကျဲသတ် ဆိုင်းဘုတ်ရတ် အိသဲရ်အူဝါသည့် ထာကီအေကျဲ။ 39 လက်ဝါးကပ်တိုင်မားသတ် ထာကီအေကျဲသတ် ဒူချ်သော်မာနုချ် အတ်ဇောနန့် ကိုယ်တော်ရတ် "သူယ် အူဖာရ်ဂေါ်ရတ်သပ် မေရှိယအို့လေး သော်ရ်ဂူးန်သူယ် အူဖာရ်ဂိုရိ အာင်ရရတ်ယိုး အူဖာရ်ဂေါ်ရော" ဘို့လိ သတ်ချတ်ရာဇ် ဟိုယေး။ 40 သို့ ဒူချ်သော်မာနုချ် အာရ်ဇော်နန် အိသေးရေ "သူယ် အီသေလိုယ်အေဒီလာ ဒူချ်ခံဂေါ်ရဖို့ရိယတ်နန့်သို့ ဘောဂဝင့်နောရေ နော်ဒေါ်ရော်နား။ 41 အာင်ရ ဒူချ်ဂိုရိ ဒူချ်ခံဂေါ်ရဖောရတ်သတ် ထိုက်တန်ရေ။ သို့ အီသေ ကေစုဒူချ် ဂိုကျဲသတ်နှိုက်" ဘို့လိ ဟိုယေး။ 42 သိုဘာဇေ အိသေးအာဂိုသည့် ကိုယ်တော်ရတ် "ယေရှု၊ သူယ် ရာဇာအို့ယေးနန့် အုပ်စိုးဂိုရိဗျသတ် တိုင်မော်မားသတ် အာင့်ရတ် အူဖာရ်ဂိုရိဘတ်လိုက် မော်နော်သ်ဂိုကျိုး" ဟိုးယ် လျှောက်ဂိုကျဲ။ 43 အန်းစောလော်သ် ကိုယ်တော်ယေ "သော်ရတ် အိုင့် ဟားထိဟိုသည့်၊ သူယ် အာဇီယာလိုသီ အာင့်ရ်ဖောင့်ကတ် ပရဒိသုဘုံမားသတ် သကိဘီ" ဟိုးယ် အော်ဒလ်ဂို့ကျဲ။ 44 အန်းစောလော်မားသတ် သည်နော်ရ်ဒုကျအို့လေယိုး အာ့ဇုနာသီနို့ဘာဇတ်ဝါးန်လို့သီး ဒူနီယာသိုနို့ အာဆာ(န်) အာင်သရ်အိုးယ်ရိုးယေး။ 45 ဘေလော်ရ်ဖောရ် နာသကိယတ်နန့် ဗိမာန်တော်မားသတ် အဆတ်သပ် မော်ဟာ့ဇာငှာရတ် ဂုရိအဲကျဲသေ ကန်လန်ကာအိယာ(န်) ဒူယားန်အို့ဂိယိုးယ်။ 46 အဲတိုင်မော်မားသတ် ကိုယ်တော်ယေ ဒေါမ့်ရ်ဂို့ရိ "ဘာဖ်ဘောဂဝင့်နောရ် အာ့သော်မားသတ် အာင့်ရ်ဝိညာဉ်ရတ် အပ်ဂိုဂျိ" ဘို့လိ ဟိုယေးနန့် ဖော်ရာ(န်) အေရီဒတ်ဖတ်လားယေး။ 47 အဲယူ(န်)ဒေခဲသတ် တပ်မှူးယေး ဘောဂဝင့်နောရ် ဂူနော်ရတ် ချီးမွမ်းဂိုရိ "အေမာနုချ်အီဘဲ အူဇူဂင်မ်မာနုခ်ျ" ဘို့လိ ဟိုယေး။ 48 အဲအနိဌာရုံမြင်ကွင်းရတ် ဆာဗျတ်လိုက် သော်လာအို့ယေးနန့် အချဲသတ် မာနုချ်အောကောလတ် ကိုယ်တော်ရ်အဲယူ(န်)ဒေကိယတ်နန့် ဘီရှိမော်နော်မားသတ် ဒူကိုးဖားယေးနန့် ဂေါရောမားသေ ဇာယိုးယ်။ 49 သို့ ကိုယ်တော်ယေရှုရ် ဘိုသူးအောကောလ်၊ ဂူရှိအောကောလ်၊ ဂါလိလဲသူးန်အချဲသတ် မာယာဖွာကောလတ် ဒူရေးဂို့ရိ ဇာငှာအတ်ခါးနောမားသတ် သိယာယတ်နန့် စိုည်ရိုယေး။ 50 အဲတိုင်မော်မားသတ် ယုဒဒတ်ချ် အရိမဿဲဇာငှာသူးန် ယောသပ်ဟောသတ် မာနုချ်အတ်ဇောနန့် အတ်ဆတ်။ အိသေး ဂင်မ်မာနုချ်အတ်ဇော(န်) အို့ယေးနန် ဂျူးလွှတ်တော် ဒိုက်ယောရ် မာနုချ်အတ်ဇော(န်) အို့ယေ။ 51 အိသေး ကိုယ်တော်ယေရှုရတ် မာရီဘတ်လိုက် ဂိုကျဲသတ် လွှတ်တော်ဒိုက်အာရ်ဂုနောရ် ဆုံးဖြတ်ဂိုကျဲသတ်အဲယူ(န်)လို့ယ် ဂိုကျဲသတ်အဲယုနော်ရတ် ရာဇီနောဂေါ်ရတ်။ သိုဘာဇေ အေဒူနီယာမားသတ် ဘောဂဝင့်နောရ် ချားချော်(န်) အာဗျတ်လိုက် စိုည်ရိုယေးသတ် မာနုချိုးအို့ယေ။ 52 အိသေး ကိုယ်တော်ရ် ဂါရတ် ဆော်လာဗျတ်လိုက် ပိလတ်သူးန် ကုဇေရရ် ပိလတ်ယေး မာသ်ဂိုကျဲ။ 53 အပ်သလိုက် အိသေး ကိုယ်တော်ရ် ဂါရတ် လက်ဝါးကပ်တိုင်သူးန် လာမာသ်လာမာယတ်နန့် ဂင်မ်အာချာလိုယ် မော်ရယေး။ သိုဘာဇေ ဒေါမ့်ရ်ချိလ်အို့ဂို ဂုရိအဲကျဲသေ ဟိုနိကျရတ် နောရေသတ် စီသာနော်ဝင်မားသတ် ကိုယ်တော်ရ် ဂါရတ် ဂင်ဂို့ရိ အေကျဲ။ 54 အဲသည့်န်သေ ချူးကုရ်ဘက်ရ်အို့ယေးနန့် ဖူနီမာသည်န်အာဗျတ်လိုက် ဟာင်ဆတ်အို့ယေး။ 55 ဂါလိလဲဒေသသူးန် ကိုယ်တော်ရ်ဖောင့်ကတ် အချဲသတ် မာယာဖွာကောလို့ စီသာမားသတ်ယိုး၊ ကိုယ်တော်ရ် ဂါရတ် အေကျဲသတ်ယိုး ဒေခဲ။ 56 သိုဘာဇေ အိသေးရာ ဂေါရောသ်ဇာယေးနန့် ကိုယ်တော်ရတ် ဖူဇီဗျတ်လိုက် ဆီမွှေးရတ်သပ် နံသာတံအောကောလ် သိုယာရ်ဂေါ်ရတ်ရ်။ သို့ယတ်နန့် အိသေးရာ ပညတ်တော်အရ ဖူနီမာသည့်န် အနားလို့ယေး။ |
This translation of the Marmagyi Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.