तितस 3 - मध्य पुरविया थारूअसल कामके खातिर हरदम तैयार रह 1 सासक आ अधिकारीसबके अधिनमे रैहके ओइसबके बात माने परैछै कैहके आपन बिस्बासीसबके सिखा। भलाइके सब काममे हरदम तैयार रहेपरैछै कैहके सम्झा-बुझ्हा। 2 उसब ककरो बदनाम नै करे, लराइ-झगरा नै करे महज सब लोकसबसङे मिलजुइल असल बेबहार करे। 3 कथिलेकी अपनोसब एकबेर मुरुख, ककरो कहल नै मानैबला आ भुलमे परल छेलियै। बहुतो तरहके देहके खराब इक्छासब आ भोगबिलासमे फसल छेलियै। अपनासब दुस्ट आ डाहके जिबन बिताबै छेलियै। अपनासब दोसरके घिरना करैत रहियै त उहोसब अपनासबके घिरना करैछेलै। 4 महज जब अपनासबके मुक्ती दैबला परमेस्वरके दया आ परेम आपनसबमे परकट भेलै, 5 तब उ अपनासबके बचेल्कै। अपनासब कोनो धरम-करम करलाके कारन नै महज ओकर दया आपनसबमे भेलाके कारन बचेल्कै। ओकर पबितर आत्मासे अपनासबके पाप धुवाके अपनासबके नया जलम आ नया जिबन देल्कै। 6 परमेस्वर पबितर आत्माके मुक्तीदैबला येसु खिरिस्टसे परसस्त कैरके अपनासबमे राइख देल्कै। 7 जै कारन ओकर अनुगरहसे धरमी भ्याके अपनासब असा करल अनन्त जिबनके हकदार बैन सकी। 8 यि बातसब साँचोके चियै। हम चाहैचियै कि अइ बातसबमे जोर दिय, ताकि जे परमेस्वरमे बिस्बास करने छै उसब असल काममे धियान देबे। कथिलेकी यि सब लोकसबके लेल असल आ फाइदाके बात चियै। 9 महज बेरथके बात, बंसाबली, फुट लाबैबला आ धरम-नियमके झगरासबसे दुरे रह। कथिलेत यि काम नै लागैबला आ बेरथके बात चियै। 10 मन्डलीमे फुट आनैबलाके एक दुइ बेर चेता, यदी उ नै मानैछौ त ओकरसङे कोनो समबन्ध नै राख। 11 यि बात तु जान्बे करैचिही कि एहेन लोक भरस्ट आ पापी हैछै। ओकरासबके आपने पाप ओइसबके दोसी बनाइछै। अन्तिम सुझाव आ आसिरबाद 12 जब हम, अरतिमास या त तुखिकसके तोहरलग पठेबौ, तु हमरा जल्दीसे भेटैले निकोपोलिस सहरमे आबिहे। कथिलेकी जार मास हम ओतै बिताबैके इक्छा कैने चियै। 13 तु वकिल जेनस आ अपोल्लोसके जाइबला सफरमे सकैजतहेक सहायता करिहे। खाँचो परैबला सब चिजके मदत करिहे। 14 आपन लोकसब असल काममे लागल रहे, ताकी आवसयक परल समयमे सहायता देबे सके आ बेरथमे जिबन नै जिये। 15 अते हमरसङे भेल सब लोकसब तोरा गोरलगी पठाइनेछौ। हमरासबके परेम करैबला ओते भेल खिरिस्टीयन भाइ-भैयासबके सेहो गोरलगी कैहदहै। परमेस्वरके अनुगरह तोरा आ औरो सब गोरासङे रहे। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.