तितस 1 - मध्य पुरविया थारू1 हम पावल परमेस्वरके सेबक आ येसु खिरिस्टके परेरित यि चिठी लिखरहलचियै। परमेस्वरके चुनल लोकसबके बिस्बासमे बलगर बनाइले आ ओइसबके सतके ग्यान दैले परमेस्वर हमरा पठेल्कै। उ ग्यान परमेस्वरके इक्छा अनुसार जिबन जियैले सहायता करैछै। 2 उ बिस्बास आ ग्यान अनन्त जिबन पाबैके आसमे अरल छै, यि जिबन कहियो झुठ नै बोलैबला परमेस्वर सन्सार सिरिस्टी हैसे पहिने अपनासबके दैले परतिग्या करने छेलै। 3 ठिक समयमे उ आपन बचन परगट करल्कै। जे बचन सुनाबैले अपनासबके मुक्तीदैबला परमेस्वरके आग्यासे हमरा जिम्मा देने छै। 4 तितस, हमे तोरा यि चिठी लिखैचियौ। साँचोके तु हमर आपने बेटा जखा चिही कथिलेकी तोहर आ हमर बिस्बास एके चियौ। परमेस्वर पिता आ अपनासबके मुक्तीदैबला येसु खिरिस्ट तोरा अनुगरह आ सान्ती देबे। केरेटमे तितसके काम 5 हमर अरह्याल बमौजी ओतेका रहल बाकी काम पुरा करैले आ हरेक सहरसबमे एल्डरसब छानैके लेल हम तोरा केरेट टपुमे छोइर देलियौ। 6 मन्डलीके एल्डरसब निरदोस जिबन बिताइबला आ एकेटा घरबाली भेल लोक रहैके चाही। ओकर बेटा-बेटी बिस्बासी, असल चरितर आ कहल मानैबला हैकेचाही। 7 मन्डलीके बिसपसब परमेस्वरके कामके रेखदेख करैबला भेलाके कारन निरदोस रहे परतै। उ लोक जिदी, झटसे खिसियाइबला, मतबाली, लराइ-झगरा करैबला आ धनके लोभ करैबला नै हैकेचाही। 8 महज उ लोक मेजवानके स्वागत-सत्कार करैबला, भलाइके काममे मन लगाइबला, ग्यानी, इमान्दार, पबितर आ आपनके बसमे राखैबला हैकेचाही। 9 ओकरा सिख्याल बिस्बासयोग्य बचनमे अस्थिर रहेपरतै ताकि औरोकेभी यि सतके बचनसे उत्साह देबेसकेबला हेबे आ यि सतके बचनसे बिरोध करैबलासबके सेहो गल्ती देखाइबला हेबे। तितसके चेताबनी 10 कथिलेकी बहुतो एहेन लोकसब रहै जेसब अगुवासबके अधिनमे रहैले नै मानै, बेरथके बात करै आ दोसरके धोखा दैछै। खास कैरके त खतना हैकेचाही कहैबलासब ओहेन हैछै। 11 ओकरासबके मुहमे जाबी लगाइए परतै कथिलेत उसब पैसा-कौरी कमाबै खातिर झुठ सिक्छा सिख्याके सब घर परिबारमे उधपात मचाइने छै। 12 ओकरासबके एक गोरा अगमबक्तो एहेन कहनेछै, “केरेटके सबलोक हरदम झुठ बोलैबलासब, जङलके दुस्ट जानबरसब लखा स्वभाब भेल आ कोरहिया दलिदर लोकसब छै।” 13 यि कहल बात साँचोके चियै। अहैलेल ओइसबके करासे चेताइनाइ जरुरी छै, ताकि उसब बिस्बासमे बौकार हेबे। 14 उसब यहुदीसबके बनोतरी बात-कथा नै सुनौक आ जे लोकसब सतके इन्कार करैछै, ओइसबके आग्या मान्बे नै करौक। 15 सुध मन भेल लोकसबके लेल सब चिज सुध रहैछै। महज पतित आ अबिस्बासीसबके लेल कोनोभी चिज सुध नै रहैछै, कथिलेकी ओइसबके मन आ सोचबिचार असुध रहैछै। 16 उसब परमेस्वरके जानैछै कैहके दाबी करैछै महज ओइसबके बेबहारसे उसब परमेस्वरके इन्कार करैछै से बात देखाइछै। उसब घिनलागैबला आ अटेरी हैछै आ कोनो असल काम करे लाएकके नै छै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.