रोमी 9 - मध्य पुरविया थारूपरमेस्वरके चुनल जाती 1 हमर कहल बात सत छै, झुठ नै, कथिलेत हम खिरिस्टके लोक चियै। पबितर आत्माके अधिनमे रहल हमर बिबेक हम झुठ नै बोलैचियै कैहके साक्छी दैछै। 2 हमर परेम करल इजराएली लोकसबके लेल हमर हिरदयमे एकदम सोक आ पिरा छै। 3 यदि हमर आपने जातिके इजराएली लोकसब मुक्ती पाबैछै त, हम खिरिस्टके सराप सहैले आ ओकरसे अलगो हैले तयार चियै। 4 उसब इजराएली चियै आ परमेस्वर ओकरासबके आपन बेटा-बेटीसब बनेल्कै। उ आपन महिमा ओकरासबके परकट करल्कै। ओकरासबसङे करार बानहल्कै, बेबस्था देल्कै आ आराधना करैले सिखेल्कै। उसब ओकर परतिग्या पाबल्कै। 5 इजराएलीसब नाम चलल पुरखासबके बेटा-बेटीसब चियै, येसु खिरिस्ट सेहो अहै जातीसे जलम लेल्कै। उ त सब जातीसबमे राज करैबला परमेस्वर चियै। ओकर परसन्सा सबदिन हैतरहे! आमेन। 6 इजराएलीसब खिरिस्टमे बिस्बास नै करल्कै कहतेमे, परमेस्वर ओकरासबसङे करल परतिग्या बिफल भेलै से बात नै चियै। कथिलेत इजराएलके कुलमे जलमल सब लोकसब त परमेस्वरके लोकसब नै चियै। 7 अबराहमके सन्तान कहतेमे सब ओकर बेटा-बेटी नै मानल जाइछै। कथिलेत परमेस्वर अबराहमके कहल्कै से बात पबितर धरमसास्तरमे एहेन लिखल छै, “इसहाकसे जलमल बेटा-बेटिए तोहर सन्तान हेतौ।” 8 अकर मतलब, अबराहमके सब सन्तान परमेस्वरके बेटा-बेटी नै चियै, महज परमेस्वर देबौ कैहके परतिग्या करल बेटा-बेटी मातरे अबराहमके सन्तान चियै। 9 कथिलेत परमेस्वर अनङ कैहके परतिग्या करने छेलै, “दोसर बरिस अहै समयमे हम घुइमके एबौ आ तोहर घरबाली सारा एकटा बेटा जल्मेतौ।” 10 अतबे मातरे नै, रिबेका सेहो जौवा बेटासब जलमेल्कै, उ दुनु जनाके बाबु अपनासबके पुरखा इसहाक भेलै। 11 जौवा बच्चा जलमैसे पहिने आ उसब असल या खराब काम करैसे पहिने परमेस्वर एक गोरा चुनल्कै। अनङ परमेस्वरके चुनैबला काम ओकर काम-काज देखके नै महज आपन उदेस्य अनुसार हैछै से साफ-साफ देखाइछै। 12 जौवा बच्चा गरभमे रहते बखत रिबेकाके अनङ कहनेछेलै, “जेठ बेटा छोट बेटाके सेबा करतै।” 13 यि बात पबितर धरमसास्तरमे जौवा भाइके बारेमे एहेन लिखल छै, “याकुबके हम परेम करलियै, महज एसाबके घिरना करलियै।” 14 परमेस्वरके करल कामसबके बिसयमे अपनासब कथि कहबै त? कि परमेस्वर अनियायी छै? बिलकुल नै! 15 कथिलेत परमेस्वर मोसाके अनङ कहल्कै, “जकरा हम किरपा करैले चाहबै, तकरा हम किरपा करबै आ जकरा हम दया करैले चाहबै, तकरा हम दया करबै।” 16 ओहैसे परमेस्वर लोकके ओकर इक्छा आ बलबुतासे नै बोलाइनेछै महज परमेस्वरके किरपामे भर परैछै। 17 कथिलेत पबितर धरमसास्तरमे मिसर देसके एक गोरा रजा फारोके बारेमे अनङ लिखल छै, “तोहरमे हम आपन सक्ती देखाइले आ पुरे सन्सारमे आपन नाम घोसना करैके उदेस्यसे हम तोरा रजा बनाइने चियौ।” 18 ओहैसे परमेस्वर जकरा दया करैले चाहैछै, तकरा दया करैछै आ जकर मनके कठोर बनाबैले चाहैछै, तकर मनके कठोर बनाइछै। कुमहार आ ओकर बरतन 19 तोरासबमेसे कोइ कोइ भरसक अनङ कहैत हेब्ही, “ओहेन चियै आ सब बात परमेस्वरके इक्छा अनुसार हैछै त, कथिले परमेस्वर लोकसबके दोस लगाबैछै?” 20 हे लोकसब, परमेस्वरके मुहे-मुहे लागैबला तुसब के चिही? कि माटिके बरतन बनाबैबलाके “हमरा कथिले एहेन बनेलियै” कहैछै से? 21 कुम्हार आपन सानल माटिसे आपन इक्छा अनुसार बरतन बनाइछै। कि माटिके एकटा ढेरिसे कोनोके एकदमसे काम लागैबला छनगर आ कोनोके साधारन काम लागैबला बनाबैके कुम्हारके आपन इक्छाके बात नै चियै से? 22 तहिनङे लोकसबसङे कनङ बेबहार करबै कहैबला बात त परमेस्वरके आपन इक्छाके बात चियै। आपन रिस आ सक्ती देखाइके ओकर आपन इक्छाके बात हैतोपरभी, उ नासके लेल तैयार करल लोकसबके सङे एकदम धिरज कैरके रहलै। 23 उ अहैलेल अनङ करल्कै कि आपन दया करल लोकसबके महान महिमा देखाइले चाहल्कै। ओकर दया करल आ महिमाके लेल सुरुवेसे तैयार करल लोकसब हमसब चियै। 24 ओकर बोलाबट पाबैबला लोकसब हमसब चियै। उ हमरासबके यहुदी मेसे मातरे नै महज गैर-यहुदी जातीसबसे सेहो बोलाइनेछै। 25 परमेस्वरके कहल बात होसे नामके अगमबक्ता अनङ लिखने छै, “जे लोकसब हमर परजा नै छेलै तकरासबके हम आपन परजा कैहके बोलेबै। जकरा हम परेम नै करनेछेलियै, तकरा हम आपन पिरिय कैहके बोलेबै।” 26 तब “जै ठाममे यहुदी बाहेक औरो लोकसबके एहेन कहलगेलै, ‘तुसब हमर परजा नै छेल्ही’, ओहै ठाममे ‘आब जिबित परमेस्वरके बेटा-बेटी कहाइबिही।’” 27 यसैया नामके दोसर अगमबक्ता इजराएलीसबके बारेमे एहेन कहल्कै, “इजराएलीसबके बेटा-बेटीसबके संख्या समुन्दरके बालु जखा बहुत हेतै तैयो बाकी रहल कमे लोकसब मातरे बच्याल जेतै। 28 कथिलेत परभु पिरथिबीमे आपन दन्ड दैबला काम जल्दिए आ पक्का पुरा करतै।” 29 यसैया अगमबक्ता यि बात पहिने भबिसबानी करने छेलै, “यदि सरबसक्तिमान परमपरभु अपनासबके लेल सन्तान बाकी नै राखने रहतियै त, अपनासब सदोम आ गमोराके लोक जखा नास हेतियै।” इजराएली लोकसबके अबिस्बास 30 हमर कहैके बात यि चियै कि, गैर-यहुदीसब बेबस्था पालन कैरके परमेस्वरके नजरमे धरमी ठहरैले कोसिस नै करल्कै तैयो बिस्बास दुवारा धरमी ठहरलै। 31 महज इजराएलीसब बेबस्था पालन कैरके परमेस्वरके नजरमे धरमी ठहरैले बहुत कोसिस करल्कै तैयो धरमी ठहरैले नै सक्लै। 32 कथिले नै सक्लै? कथिलेत इजराएलीसब बिस्बास नै कैरके धरम-करमसे मातरे परमेस्वरके नजरमे धरमी ठहरैले ताकल्कै। तैल्याके बिस्बास नै करैबला आ धरम-करम मातरे करैबलाके लेल येसु खिरिस्ट ठेस लागैबला पथल भेलै। 33 खिरिस्टके बारेमे परमेस्वरके कहल बात पबितर धरमसास्तरमे अनङ लिखल छै, “देख, हम सियोनमे एकटा ठेस लागैबला पथल राखने चियै आ जैमे बहुतो लोक ठेसके खैसपरतै, महज ओकरमे बिस्बास करैबलासब लाजमे नै परतै।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.