रोमी 7 - मध्य पुरविया थारूबियाहके उदाहरन 1 हे भाइ-भैयासब, हम यि बात बेबस्था जानेबलासबके कहैचियौ। लोक जिबित रहेतक मातरे बेबस्थाके अधिनमे रहैछै कि तोरासबके थाह नै छौ? 2 उदाहरनके लेल, कोनो एकटा बियाह भेल जनी बेबस्था अनुसार ओकर घरबला जिबित रहेतक आपन घरबलासङे रहैछै, महज यदि ओकर घरबला मैरजाइछै त, बेबस्थाके बन्धनसे सोतन्तर हैछै। 3 ओहिनङे, यदि ओकर घरबला जिबिते रहतै आ उ दोसर पुरुखसङे बियाह करैछै त, उ बेबिचार करैछै। महज ओकर घरबला मैरजाइछै त, ओइ बेबस्थामे उ बान्हल नै रहैछै आ दोसर पुरुखसङे बियाह करतै त उ बेबिचार नै करैछै। 4 अहैलेल हे हमर भाइ-भैयासब, तुसब खिरिस्टसङे बेबस्थाके लेल मरल चिही त तुसब सेहो खिरिस्टेसङे मरलसे जिबित भ्याके एक भेलचिही, ताकी अपनासब परमेस्वरके लेल असल काम करैले सकी। 5 अपनासब एक समय देहके पाप स्वभावमे जिबन बिताइत रहियै। ओइ बखत पापी स्वभाव बेबस्थाके बिरोधमे अपनासबके बहुत पाप करैले लगेल्कै आ मिरतुके भागिदार बनेल्कै। 6 महज अपनासबके अधिनमे राखैबला बेबस्थाके लेल मैरके आब ओइसे छुटकरा पाबनेचियै, ओहैसे अपनासब पुरन्का लिखल बेबस्था अनुसार सेबा नै करैचियै, महज पबितर आत्माके देल लया बिधी अनुसार परमेस्वरके सेबा करैचियै। बेबस्था आ पाप 7 ओनङ चियै त हमसब आब कथि कहबै? कि बेबस्था पाप चियै त? ओनङ नै चियै। बेबस्था नै रहतियै त पाप कथि चियै से हम थाहे नै पाबतियै, कथिलेत “तु लोभ नै कर” कैहके बेबस्था नै कहने रहतियै त लोभ नै करैके हैछै कैहके हम थाहे नै पाबतियै। 8 महज यि आग्याके कारनसे पाप मौका पाइबके हमरा सबपरकारके लोभ करैले लगेल्कै। कथिलेत बेबस्था नै रहतियै त पाप अपनासबके जिबनमे कोनो अधिकार नै करतियै। 9 एक समय हम बेबस्था नै जाइनके आपन हिसाबसे जिबन बिताइ छेलियै, महज बेबस्थाके कहल बात बुझलाके बाद हम पाप करिये रहलचियै कैहके थाह पाबलियै आ पापके कारनसे हम मैरगेलियै। 10 जे बेबस्थाके उदेस्य जिबन देनाइ छेलै ओहे बेबस्था हमर लेल मिरतु आनल्कै। 11 कथिलेत पाप बेबस्था दुवारा मौका पाइबके हमरा छल करल्कै आ ओहैके हथियार बनाके हमरा मारल्कै। 12 बेबस्था अपनेमे पबितर छै। ओहैसे ओकर आग्यासब पबितर, नियाय सङहत आ असल छै। 13 कि असल बेबस्था हमरा मिरतुदन्ड देल्कै त? पक्का नै! पापे त असल बेबस्थाके हथियार बनाके हमरा मिरतुदन्ड देल्कै। तैल्याके पाप बेबस्था दुवारा साँचेके घिनलागैबला पाप छै कैहके देखाइछै। लोकके दुइ किसीमके स्वभाब 14 अपनासबके यि बात थाहेछै कि बेबस्था त आत्मिक चियै कथिलेकी यि परमेस्वरसे आबल छै। महज हम देहके पाप स्वभाब अनुसार चलैबला आ दास जखा पापमे बेचलगेल लोक चियै। 15 हम कोन काम करैचियै, अपने उ नै बुझैचियै। कथिलेत हम जे असल काम करैले चाहैचियै, उ हम नै करैचियै, महज जे खराब काम करैले नै चाहैचियै, उ हम करैचियै। 16 ओहैसे हमर इक्छा नै करल खराब काम करैचियै त, हम बेबस्था असल छै कैहके सहमत चियै से देखाबैछै। 17 ओहैसे हमर करल खराब काम हम नै करने चियै, यि त हमर भितरमे रहल पापके करल काम चियै। 18 हमर कहैले चाहैबला बात यि चियै कि हमरमे अरथात हमर पाप स्वभाबमे कोनो असल चिज बास नै करैछै, कथिलेत असल काम करैले हमर इक्छा हैतोपरभी यि करैले नै सकैचियै। 19 कथिलेत असल काम जे हम करैले चाहैचियै, उ हम नै करैचियै, महज दुस्ट काम, जे हम करैले नै चाहैचियै, वह्या हम करैत रहैचियै। 20 हम जे करैले नै चाहैचियै वह्या करैचियै त, उ काम करैबला हम नै महज हमर भितरमे बास करैबला पाप चियै। 21 हमर जिबनमे एकटा नियम काम करने छै कैहके थाह पाबलियै। जब हम भलाइके काम करैले चाहैचियै, तब दुस्ट इक्छा सेहो हमरसङे रहैछै। 22 कथिलेत हमर मन परमेस्वरके बेबस्थामे आनन्दित हैछै। 23 महज हमर देहमे कोनो दोसर नियम काम करैत थाह पाबैचियै। उ पापके नियम हमर आपन मनसे चाहना करल नियमके बिरोधमे उठैछै आ हमरा पापके दास बनाइछै। 24 हम केहन दुखी लोक चियै! पाप आ मिरतुके कैदमे रहल देहके हमरा के छुटकरा करेतै? 25 हम परमेस्वरके धन्यबाद दैचियै। येसु खिरिस्ट दुवारा परमेस्वर हमरा छुटकरा दैछै। तैल्याके आपन हिरदयमे परमेस्वरके बेबस्था पालन करैचियै महज हमरमे भेल पाप स्वभाब हमरा पापके नियमके अधिनमे राखैछै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.