रोमी 6 - मध्य पुरविया थारूपापमे मिरतु महज खिरिस्टमे जिबन 1 परमेस्वर अपनासबके पापसब छमा करैछै आ अपनासबके उपर अनुगरह देखाबैछै। तैल्याके अपनासब पाप कैरते रह कहबै त? 2 अहँ, ओनङ करनाइ ठिक नै छै। पापेके खातिर अपनासब मरल चियै, तब कनङके पाप करैत जियैले सक्बै? 3 अपनासब येसु खिरिस्टमे बप्तिस्मा लैतखिना ओकरेसङे एक भ्याके मरलियै कैहके कि तोरासबके थाह नै छौ? 4 ओहैसे अपनासब सेहो ओकरसङे बप्तिस्मा दुवारा मैरके गारलगेलियै। जहिनङ सक्तिसाली परमेस्वर पिता आपन महिमा दुवारा येसु खिरिस्टके मरलसे जिबित करल्कै। आब अपनोसब पुरन्का जिबन जियैले छोइरके लया जिबनमे खिरिस्टसङे जिएपरतौ। 5 यदि ओकर मिरतुमे अपनासब ओकरसङे एके भेलचियै त, ओकर पुनरुथानमे सेहो पक्का अपनासब ओकरमे एक हेबै। 6 हमसब यि जानैचियै कि अपनासबके पुरन्का स्वभाब ओकरसङे कुरूसमे टाङलगेलछै, ताकी अपनासबके पापी स्वभाब नास हेबे आ आबसे पापके दास नै हेबी। 7 कथिलेकी मरल लोक पापके सक्तीसे स्वतन्तर हैछै। 8 महज यदि अपनासब खिरिस्टसङे मरल चियै त, ओकरसङे जिबित सेहो हेबै कैहके बिस्बास करैचियै। 9 अपनासब जानैचियै कि, खिरिस्ट मरलसे जिबित भेलछै आ उ फेनसे कहियो नै मरतै। ओकरमे मिरतुके कोनो सक्ती किछो करैले नै सक्तै। 10 पापके बन्धनसे छुटकरा करैके खातिर खिरिस्ट सबदिनके लेल एकेबेर मरलै। आब जे जिबन खिरिस्ट जियैछै, उ जिबन परमेस्वरके लेल जियैछै। 11 तहिनङ कैरके तुहुसब आपन-आपन पापके खातिर मरल महज येसु खिरिस्टसङे परमेस्वरके लेल जिबित भेल समझ। 12 अहैलेल देहके अभिलासा अनुसार चलैले नै परे कैहके तोरासबके मरनसिल देहमे पापके अधिन करैले नै दहै। 13 आपन देहके अंगसबके दुस्टताके साधनके रुपमे पाप करैले नै सोप, महज मिरतुसे जिबनमे आनल लोकसबके जखा अपनाके परमेस्वरमे सोप आ परमेस्वरके असल कामके लेल आपन देहके अङसबके सोप। 14 पाप तोरासबमे अधिन नै करे, कथिलेकी तुसब बेबस्थाके अधिनमे नै, महज परमेस्वरके अनुगरहमे बचल चिही। धारमिकताके दास 15 माइनले हमसब बेबस्थाके अधिनमे नै चियै, महज परमेस्वरके अनुगरहके अधिनमे चियै त, कि पाप करबै? कदापी नै। 16 तुसब जकर आग्यापालन करैचिही ओकर दास हैचिही से तोरासबके थाह छौ। तुसब पापके दास भ्याके ओकर आग्यापालन करबिही त मरबिही, महज परमेस्वरके आग्यापालन करबिही त, तुसब ओकर अगा धरमी ठहरबिही। 17 परमेस्वरके धन्यबाद हेबे, तुसब एकचोटी पापके दास छेल्ही महज तुसब अखुन आपन परमेस्वरसे सिखाल सिक्छा हिरदयसे पालन करैचिही। 18 तुसब पापसे छुटकारा पाइबके असल काम करैबला परमेस्वरके दास भेलचिही। 19 तोरासबके मानबिय स्वभाबके कमजोरीके कारनसे हम तोरासबके बुझैबला हिसाबसे मालिक आ दासके उदाहरन देके कहैचियौ। एक समयमे खराब इक्छासे बहुत घिनलागैबला पाप आ दुस्ट काम करैले तुसब आपन जिबनके दास जखा सोपने छेल्ही। आब पबितर हैले तोरासबके जिबन परमेस्वरके लेल असल काम करैबला दास जखा सोप। 20 जखैन तुसब पापके दास छेल्ही, तखैन परमेस्वरके अधिनमे नै रैहके जे मन लागैछेलौ सेह्या करैछेल्ही। 21 जे कामसबसे तुसब अखैन लाज मानैचिही तै कामसबसे तोरासबके कथि फैदा भेलौ? कथिलेत ओइ कामसबके परिनाम त मिरतु चियै। 22 आब तुसब पापके बन्धनसे छुटकरा पाइबके परमेस्वरके दास भेलचिही। ओइसे तोरासबके पबितर बनाइतौ आ तुसब अनन्त जिबन पाबबिही। 23 कथिलेत पाप करैबलाके बैन मिरतु चियै, महज फोक्टेमे देल परमेस्वरके बरदान त अनन्त जिबन चियै जे अपनासबके परभु येसु खिरिस्टमे देनेछै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.