रोमी 5 - मध्य पुरविया थारूसान्ती आ आनन्द 1 ओहैसे हमसब खिरिस्टमे बिस्बास करलाके कारन परमेस्वरके अगा धरमी ठहरलचियै आ अपनासबके परभु येसु खिरिस्ट दुवारा परमेस्वरसङे अपनासबके मिलाप भेलछै। 2 खिरिस्ट हमरासबके बिस्बास दुवारा परमेस्वरके अनुगरहमे लाबने छै। यह्या अनुगरहके हमसब अखुन अनुभव करैचियै आ परमेस्वरके महिमामे सहभागी हैके आसमे आनन्द मनाबैचियै। 3 अतबेक नै, हमसब आपन दुख-कस्टमे सेहो आनन्द मनाबैचियै कथिलेत हमसब जानैचियै कि दुख-कस्टसे सहनसिलता उतपन कराबैछै, 4 सहनसिलतासे अपनासबके असल चरितर बनाइछै आ असल चरितरसे आसा उतपन करैछै। 5 अहै आसाके कारन हमसब निरास नै हेबै कथिलेत परमेस्वर अपनासबके पबितर आत्मा देने छै आ पबितर आत्मासे परमेस्वर अपनासबके हिरदयमे आपन परेम भरनेछै। 6 हमसब अपनेसे मुक्तीके लेल कुछो करैले नै सकैबला भेलाके कारनसे खिरिस्ट अपनेसे ठिक समयमे हमरासबके लेल मरलै। 7 धरमी लोकके लेल मरैले चाहैबला लोक पाबैले कठिनछै। असल लोकके लेल कोइ-कोइ मरैले साहस करियोसकैछै। 8 महज अपनासब पापी भेल बखत खिरिस्टके अपनासबके लेल बलिदान द्याके परमेस्वर अपनासबके लेल महान परेम देखेल्कै। 9 खिरिस्ट बलिदान भ्याके आपन लहुसे अपनासबके परमेस्वरके अगा धरमी ठहरेनेछै। ओहैसे खिरिस्ट दुवारा औरो बेसिसे अपनासबके परमेस्वरके करोधसे बचेतै। 10 कथिलेत अपनासब परमेस्वरके सतरु भेल बखत ओकर बेटाके मिरतु दुवारा अपनासबके आपनसङे मिलापमे आनल्कै। अपनासब ओकर सङी भेलाके कारनसे उ आपन बेटाके जिबनसे अपनासबके बचाइतै। 11 अतबेक नै, महज अपनासबके परभु खिरिस्ट दुवारा अपनासब परमेस्वरमे आनन्द मनाबैचियै कथिलेत ओकरे दुवारा अपनासबके परमेस्वरसङे मिलाप भेलछै। आदम दुवारा मिरतु आ खिरिस्ट दुवारा जिबन 12 सिरिस्टीके पहिन्का लोक आदम दुवारा सन्सारमे पाप एलै आ ओकरे पापसे मिरतु एलै। अहिनङ कैरके लोकसबमे मिरतु फैलगेलै कथिलेत सबकोइ पाप करने छेलै। 13 परमेस्वर बेबस्था दैसे पहिने सन्सारमे पाप छेलै। महज बेबस्था नै भेलाके चल्ते पापके कोनो हिसाबो नै लैछेलै। 14 तैयो आदमके समयसे लेके बेबस्था लिखैबला मोसाके समयतलिक मिरतु सब लोकसबमे राज करल्कै। लोकसब आदम जखा त पाप नै करल्कै तैयो उहोसब मरलै। आदमके करल पापके नतिजा सब लोकसब पाबल जखा खिरिस्टके करल कामके नतिजा सेहो सब लोक पाबतै। अनङ आदम त पछा आबैबला खिरिस्टके नमुना छेलै। 15 परमेस्वरके फोक्टेके बरदान आदमके पाप जखा नै चियै। कथिलेत एकटा लोक आदमके पापके कारनसे बहुत लोक मरलै। महज एकटा लोक येसु खिरिस्टके बरदान दुवारा परमेस्वर बहुतो लोकके औरो बेसिसे अनुगरह देल्कै। 16 परमेस्वरके फोक्टेमे देल बरदान आ एक गोरा लोकके करल पापमे फरक छै। आदमके करल एकटा पापके कारन सब लोकसब दोसी ठहरलै आ सजायके भागिदार भेलै। महज लोकसब बहुतो पाप करल्कै तैयो परमेस्वरके अनुगरहसे ओकरासबके धरमी ठहरेल्कै। 17 एकेटा लोक आदमके करल पापके कारन सब लोकसब मरैछै। महज असल बात यि चियै कि, परमेस्वर परसस्त अनुगरह आ धारमिकताके बरदानसे लोकसबके धरमी ठहराइल्कै। अनङ उसब एकेटा लोक येसु खिरिस्ट दुवारा जिबन पाबतै। 18 अहिनङ कैरके हमसब देखैचियै कि, जनङ आदमके एकेटा पापसे सब लोकसब मिरतुदन्डके भागिदार भेलै, ओहिनङे खिरिस्टके एकेटा धारमिक कामसे परमेस्वरके सामने सबलोक धरमी ठहरतै आ जिबन पाबतै। 19 एकटा लोक आदमके आग्यापालन नै करलाके चल्ते बहुतो लोक पापी भेलै, तहिनङे एकटा लोक खिरिस्टके आग्या पालनके चल्ते बहुतो गोरा परमेस्वरके अगा धरमी ठहरतै। 20 लोकसब अपना कतहेक पाप करनेचियै से जानैके लेल परमेस्वर ओकरासबके बेबस्था देल्कै। लोकसबके पाप जतहेक बरहैत गेलै परमेस्वरके अनुगरह ओतहेक बेसिसे बरहैत गेलै। 21 पहिने पापके सक्ती सब लोकसबके पाप करैले लगेल्कै आ मरलै। आब परमेस्वरके दयासे हमसब ओकर अगा धरमी ठहरैचियै आ अपनासबके परभु येसु खिरिस्ट दुवारा अनन्त जिबन पाबैछै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.