रोमी 4 - मध्य पुरविया थारूअबराहमके बिस्बास 1 आब अपनासबके पुरखा अबराहमके बारेमे देख। कोन कारनसे धरमी ठहरलै त? 2 यदि असल काम कैरके अबराहम धरमी ठहरतियै त, उ घमन्ड करैले सकतियै। महज परमेस्वरके अगा ओकरा घमन्ड करैबला कोनो ठामे नै छै। 3 कथिलेत पबितर धरमसास्तरमे लिखलछै, “अबराहम त परमेस्वरमे बिस्बास करल्कै आ ओकर बिस्बाससे परमेस्वर ओकरा धरमी ठहरेल्कै।” 4 काम-काज करैबलाके बोइन देल जाइछै। उ बोइन दान नै चियै महज पसिनाके कमाइ चियै। 5 कोनो लोक धरम-करममे नै महज पापी लोकसबके छमादैबला परमेस्वरमे बिस्बास करैछै त वह्या बिस्बासके कारन परमेस्वर ओकरा धरमी ठहराइछै। यि त परमेस्वरके दान चियै। 6 अहै तरहसे धरम करम बिना परमेस्वरके नजरमे धरमी ठहरल लोकके बारेमे रजा दाउद अनङ कहैछै, 7 “धैनके चियै उसब, जैसबके अपराध छमा भेलछै आ ओकर अनगिन्ती पापसब झाइपदेनेछै। 8 धैनके चियै उसब, जकर पापके लेखा परमेस्वर नै लैछै।” 9 दाउदके कहल यि आसिस खतना भेल यहुदी लोकसबके लेल मातरे चियै कि खतना नै भेल गैर-यहुदी लोकसबके लेल सेहो चियै? पबितर धरमसास्तर अनुसार अपनासब कहलियै कि, “अबराहम त परमेस्वरमे बिस्बास करल्कै आ ओकर वह्या बिस्बाससे परमेस्वर ओकरा धरमी ठहरेल्कै।” 10 तब कहिया धरमी ठहरेल्कै? ओकर खतना हैसे पहिने कि पाछु? खतना हैसे पहिने परमेस्वर ओकरा धरमी ठहरेल्कै। 11 ओकर खतना बिस्बास दुवारा धरमी ठहरल चेन्हा चियै। अहिनङ कैरके उ खतना नै करल महज परमेस्वरमे बिस्बास कैरके धरमी ठहरैबला लोकसबके आत्मिक पुरखा भेलै। 12 अहिनङे यहुदीसब खतना कैरके मातरे नै, महज उसब अबराहम जखा बिस्बासमे चलैके कारन अबराहम उ यहुदीसबके सेहो आत्मिक पुरखा भेलै। परमेस्वरके परतिग्या बिस्बाससे आबैछै 13 अबराहम बेबस्था पालन करलाके कारनसे नै महज परमेस्वरमे करल बिस्बास दुवारा धरमी ठहरलाके चल्ते परमेस्वर ओकरा आ ओकर बेटा-बेटीसबके सन्सारके हकबला बनाबैके परतिग्या करल्कै। 14 यदि बेबस्था पालन करैबलासब मातरे हकबला हेतियै त, बिस्बास आ परतिग्या बेरथ हेतियै, 15 कथिलेत बेबस्था भङ करैबलासब उपर परमेस्वरके करोध परैछै। महज जते बेबस्था नै छै ओते भङ करैबला बाते नै छै। 16 ओहैसे परमेस्वरके परतिग्या बिस्बास दुवारा पाबैबलाके यि ओकर अनुगरहमे भर परैछै। यि परतिग्या बेबस्था पालन करैबला अबराहमके सन्तानसबके लेल मातरे नै महज अबराहम जखा बिस्बास कैरके जियैबलासबके लेल चियै, कथिलेत अबराहम सबके पुरखा चियै। 17 पबितर धरमसास्तरमे एहेन लिखलछै “हम तोरा सन्सारके सब जातीके पुरखा बनाइने चियौ।” मरलसबके जिबन दैबला आ असतित्वमे नै भेल चिजके असतित्वमे लाबैबला परमेस्वरमे अबराहम बिस्बास करल्कै। 18 सन्तानके आसे नै भेल बखत “तोहर सन्तान अकासके तरा जतहेक बहुत हेतौ” कैहके परमेस्वरके देल परतिग्यामे अबराहम आसा आ बिस्बास करैले नै छोरने रहलै। तब पाछु बहुतो जातीके पुरखा बन्लै। 19 अबराहमके उमेर लगभग सय बरिस पुगल छेलै आ उ जानैत रहलै कि हमर यि देहसे आब किछो नै हेतै आ उ यिहो जानैछेलै कि साराके बच्चा जलमाइले असम्भवछै। तैयो उ बिस्बासमे कमजोर नै भेलै। 20 उ परमेस्वरके करल परतिग्यामे एकोरति सङका नै करल्कै महज बिस्बासमे औरो बौकार भ्याके परमेस्वरके परसन्सा करल्कै। 21 कथिलेत परमेस्वर आपन करल परतिग्या अबस्य पुरा करतै कैहके उ निसचिन्त छेलै। 22 तब उ अहै बिस्बासके कारनसे “परमेस्वर ओकरा धरमी ठहरेल्कै”। 23 पबितर धरमसास्तरमे लिखल बात, “परमेस्वर ओकरा धरमी ठहरेल्कै” ओकरलेल मातरे नै लिखल गेलै, 24 महज अपनोसबके लेल लिखलगेल छै। जे कोइ अपनासबके परभु येसुके मरलसे जिबित करैबला परमेस्वरमे बिस्बास करैछै, ओकरा परमेस्वर धरमी ठहराइछै। 25 येसु अपनासबके पापके खातिर मारलगेलै आ अपनासबके धरमी ठहराइके लेल जिबित कर्याल गेलै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.