रोमी 3 - मध्य पुरविया थारूपरमेस्वरके बिस्बास योग्यता 1 कोइ कोइ एहेन कहैले सकैछै: यहुदी भेलापर कोन फाइदा छै? कि खतना कैरके कोनो लाभ भेलै त? 2 हरेक तरहसे फाइदे फाइदा छै। सबसे पहिने परमेस्वर आपन बचन यहुदीसबके सौप देल्कै। 3 महज कतहेक गोरा बिस्बास योग्य नै भेलै त, कि भेलै? उसब बिस्बास योग्य नै भेलै त कि परमेस्वर आपन बचन पुरा नै करतै से? 4 पक्का पुरा करतै, सब लोक आपन बचन पुरा नै करतै तैयो परमेस्वर आपन बचनके पुरा करतै। जनङ पबितर धरमसास्तरमे लिखल छै, “बोलि-बचनमे अहाँ ठिक ठहरलचियै, नियाय हेतै त अहाँके जित हेतै।” 5 महज कतहेक लोकसबके बिचारमे, हम यहुदीसबके करल पापसे परमेस्वर औरो बेसी धरमी देखाइछै त हम कथि करबै? कि लोकसबके दन्ड देनाइ परमेस्वरके गल्ती छेलै त? 6 नै, परमेस्वरके दन्ड दैबला काम कोनो हालतमे गल्ती नै चियै। यदि परमेस्वर ठिकसे नियाय नै करतै त उ कनङके सन्सारके लोकसबके नियाय करतै? 7 कोइ कोइ अहिनो बिचार करैछै, “यदि हमर झुठसे परमेस्वरके सतके औरो आदर हैछै त, कथिले हमरा पापके दोसी ठहराइछै?” 8 कोइ कोइ यह्या दोस हमरासबके लगाइछै, “हमसब जतहेक पाप करबै ततहेक बेसिसे परमेस्वरके आदर हेतै।” एहेन दोस लगाइबला लोकसबके परमेस्वरसे दन्ड मिलनाइ उचित छै। धरमी कोइ नै छै 9 ओहेन छै त, कि हम यहुदीसब औरोसे असल चियै त? कदापी नै चियै। यहुदी आ गैर-यहुदी दुनु समान रुपसे पापके अधिनमे छै कैहके हम पहिने देखाइने चियौ। 10 पबितर धरमसास्तरमे एहेन लिखलछै, “धरमी कोइ नै छै, एकोटा नै छै। 11 परमेस्वरके बात बुझैबला लोक कोइ नै छै, परमेस्वरके खोजैबला कोइ नै छै। 12 सबलोक परमेस्वरके रस्तासे भटैकके दुर चैलगेलछै, सबलोक काम नै लागैबला भेलछै। भलाइ करेबला कोइ नै छै, एकोटा नै छै।” 13 “ओकरासबके कन्ठ त खुलल चिहानसे निकलैबला दुरगन्ध जखाछै, उसब आपन जिहसे छलके बात करैछै।” “ओकरासबके बोली बिखधर साँपके बिख जखाछै।” 14 “उसब आपन मुहसे सराप आ तित बात बोलैछै।” 15 “उसब लोकसबके हतिया करैले आतुर रहैछै। 16 उसब जते जाइछै ओते बिनास करैछै आ लोकसबके दुख दैछै। 17 उसब अमन चैनसे जियैले नै जानैछै।” 18 “उसब परमेस्वरके डर नै मानैछै।” 19 बेबस्थाके बात त बेबस्थाके अधिनमे रहैबला लोकसबके लेल चियै कैहके हमरासबके थाहछै। ओहैसे परमेस्वर सन्सारके नियाय करैतखिना हम पाप नै करनेचियै कैहके बहाना बनाबे नै सक्तै। 20 बेबस्था पालन कैरके परमेस्वरके नजरमे कोइयो नै धरमी ठहरतै कथिलेत लोकसब पापी छै से बात त बेबस्थे बताइछै। परमेस्वर लोकसबके धरमी बनाइछै 21 महज अखुन बेबस्था पालन नै कैरके परमेस्वर लोकसबके धरमी ठहराइबला बाट देखाइनेछै। अकर बारेमे बेबस्थाके किताब आ अगमबक्तासब गबाही देनेछै। 22 अहिनङ कैरके, येसु खिरिस्टमे बिस्बास करैबला सबके परमेस्वर धरमी ठहराइनेछै, कथिलेत उ ककरो भेदभाव नै करैछै। 23 कथिलेत सबलोक पाप करने छै आ परमेस्वरके महिमा तक पुगैले चुकल छै। 24 महज परमेस्वरके अनुगरहसे खिरिस्टमे बिस्बास करैबला लोकसबके मङनिएमे पापसे धरमी ठहराइल्कै। 25 परमेस्वर येसु खिरिस्टके अपनासबके पापके दन्डसे छुटकरा दैकेलेल बलिके रुपमे अइ सन्सारमे पठेल्कै। अपनासबके लेल येसु खिरिस्ट आपन लहु बहेल्कै कैहके बिस्बास करैबला लोकसब धरमी ठहरैछै। यि काम परमेस्वर आपन धारमिकता देखाबैके लेल करल्कै, कथिलेत उ आपनसबके पहिने करल पापके धियान नै देल्कै, कारन उ बहुत धिरजी छै। 26 महज अखुन्का समयमे परमेस्वर उसबके पापके लेखा लैछै कथिलेत उ आपने धरमी छै आ येसुमे बिस्बास करैबलासबके धरमी ठहराबैछै कैहके उ साबित करैछै। 27 ओहेन छै त कथिके लेल घमन्ड करबै? घमन्ड करैबला बाते नै चियै। बेबस्था पालन कैरके लोक धरमी नै हैछै, महज खिरिस्टमे बिस्बास कैरके मातरे धरमी हैछै। 28 बेबस्था पालन कैरके नै महज खिरिस्टमे बिस्बास कैरके मातरे परमेस्वरके अगा धरमी ठहराबैछै से बात हमसब जानैचियै। 29 कि परमेस्वर यहुदीसबके मातरे परमेस्वर चियै? कि परमेस्वर गैर-यहुदीसबके परमेस्वर नै चियै से? साँचे, उ त सबके परमेस्वर चियै। 30 कथिलेत परमेस्वर एकेटा छै। उ यहुदी आ गैर-यहुदी दुनुके बिस्बास दुवारा धरमी ठहराइछै। 31 तब कि अपनासबके अहै बिस्बास दुवारा बेबस्थाके बेरथ कैरदेबै? कदापी नै! बरु हमसब बेबस्थाके साँचोके मानैचियै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.