रोमी 2 - मध्य पुरविया थारूपरमेस्वरके ठिक नियाय 1 हे लोकसब, कि तु दोसरके दोस लगाइचिही? तोरासबमेसे चाहे जे कोइ हेबे दोसी नै चियै कैहके बहाना करैबला कोनो कारन नै छौ। दोसरके दोस लगाइबला तु आपनेके दोसी ठहरबिही, कथिलेत जे कामके लेल दोसरके दोस लगाइचिही, उ काम तु आपने करैचिही। 2 परमेस्वर एहेन काम करैबलासबके ठिकसे नियाय करैछै से बात अपनासब जानैचियै। 3 तु एहेन काम करैबलासबके दोस लगाइचिही, हे लोकसब आपने तु ओहेन कामसब करैचिही। कि तु परमेस्वरके नियायसे बचबिही कैहके सोचैचिही? 4 या कि तु परमेस्वरके महान किरपा, सहनसिलता आ धिरजके तुच्छ सम्झैचिही? परमेस्वर आपन किरपासे तोरा पापसे पस्चाताप करैके मौका देनेछौ से बात कि तोरा थाह नै छै? 5 महज तु जिद्द कैरके पस्चाताप करैले नै चाहलिही। ओहैसे तु परमेस्वरके नियाय हैबला दिनमे बरका दन्डके लेल करोध समैटके राखनेचिही, जै दिनमे परमेस्वर ठिकसे नियाय करतै। 6 परमेस्वर हरेक लोकके ओकर करल करम अनुसारके फल देतै। 7 जे लोकसब निरन्तर भलाइके काम कैरके आदर, इज्जत आ अनन्त जिबनके खोजी करैछै, ओइसबके परमेस्वर अनन्त जिबन देतै। 8 महज आपनेके मातरे परेम करैबला, सत बातके पालन नै करैबला आ खराब बातमे लागल रहैबला लोकसबमे परमेस्वरके करोध आ दन्ड परतै। 9 खराब काम करैबला हरेक लोकमे दुख आ सङकट एतै, पहिने यहुदी तब गैर-यहुदीसबमे सेहो एतै। 10 महज असल काम करैबला हरेक लोकके, आदर, इज्जत आ सान्ती मिल्तै, पहिने यहुदी तब गैर-यहुदीसबके सेहो मिल्तै। 11 कथिलेकी परमेस्वर ककरो पक्छपात नै करैछै। 12 मोसाके बेबस्था पाबलहा यहुदीसब पाप करतै त उसबके बेबस्था दुवारा नियाय हेतै आ मोसाके बेबस्था गैर-यहुदीसबके नहियो भेलापरभी उसब पाप करतै त नास हेतै। 13 कथिलेकी बेबस्था सुइनके मातरे लोकसब परमेस्वरके नजरमे धरमी नै ठहरतै महज बेबस्था पालन करैबलासब धरमी ठहरतै। 14 गैर-यहुदीसबसङे बेबस्था नै छै महज उसब आपने बिबेकसे बेबस्था अनुसार करैछै। अइसे यि देखाबैछै कि ओकरासबके हिरदयमे बेबस्था छै। 15 ओकरासबके हिरदयमे बेबस्थाके बातसब लिखलछै कैहके ओकरासबके चालचलनसे देखाबैछै। कथिलेत ओकरासबके बिबेकसे कोनोबेर आपनेके दोख लगाबैछै त कोनोबेर ठिक छै कहैछै। 16 यि बातसब ओइ दिन हेतै जै दिन परमेस्वर हमर करल सुसमाचार परचार अनुसार येसु खिरिस्ट दुवारा लोकसबके हिरदयमे रहल गुप्त बातसबके नियाय करतै। यहुदीसब आ बेबस्था 17 महज तुसब आपनेके यहुदी चियै कैहके बेबस्थामे भर परैचिही आ परमेस्वरके चिन्हैचियै कैहके घमन्ड करैचिही। 18 तुसब, परमेस्वर कथि चाहैछौ से जानैचिही आ असल कथि चियै सेहो जानैचिही कथिलेत बेबस्थासे तुसब सिखनेचिही। 19 तुसब, मनके आन्हर भेल लोकसबके डोरियाबैचियै कैहके धाख लगाइचिही। तुसब अन्हारमे चलैबलासबके लेल अपनाके इजोत सम्झैचिही। 20 तुसब मुरुख लोकसबके सल्लाहकार तब परमेस्वरके बारेमे किछो नै जानैबलासबके सिक्छक चियै कैहके सोचैचिही, कथिलेत बेबस्थामे भेल सब बुइध आ सत बात पाबनेचियै कैहके दाबी करैचिही। 21 अनङ तुसब दोसरके सिखाइचिही, महज आपने कथिले नै सिखैचिही? तुसब दोसरके चोरी करैले नै हैछै कहैचिही, महज आपने कथिले चोरी करैचिही? 22 तुसब दोसरसबके बेबिचार नै कर कैहके कहैचिही, महज कथिले तुसब आपने बेबिचार करैचिही? तुसब मुरती पुजाके घिरना करैचिही, महज कथिले तुसब मन्दिरके लुटैचिही? 23 मोसाके बेबस्था हमरासबसङे छै कैहके तुसब धाख लगाइचिही, महज ओकरा तुसब पालन नै कैरके कथिले परमेस्वरके अनादर करैचिही? 24 पबितर धरमसास्तरमे अनङ लिखल छै, “तु यहुदीसबके कारनसे गैर-यहुदीसब परमेस्वरके अनादर करैछै।” 25 यदि तुसब बेबस्था पालन करैचिही त खतना करल फाइदा हेतौ। महज तुसब बेबस्था पालन नै करैचिही त, तुसब खतना नै करैबला लोकसब जखा चिही। 26 यदि खतना नै करैबला लोक बेबस्था पालन करैछै त कि ओकरासबके खतना करल लोकसबके जखा परमेस्वर नै मान्तै से? 27 तु यहुदीसबसङे लिखल बेबस्थाछौ आ तोरासबके खतना भेलछौ तैयो तुसब बेबस्था पालन नै करैचिही महज गैर-यहुदीसब खतनो नै कैरके बेबस्था पालन करैछै त तुसब स्वतह दोसी ठहरल जेब्ही। 28 बाहरके रुपसे मातरे यहुदी देखाबैबला लोक पक्का यहुदी नै हैछै। ओहिने देहमे करल बाहरके देखाबटी खतना पक्का खतना नै चियै। 29 साँचो यहुदी त हिरदयके भितरसे परमेस्वरके अगा सत ठहरैले परतै। तब साँचो खतना त देहके बाहरमे लगाइबला खतना नै महज परमेस्वरके आत्मा पाइबके हिरदय भितरेसे परिबरतन होनाइ चियै। एहेन लोक, लोकसबसे नै महज परमेस्वरसे आदर पाबैछै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.