रोमी 14 - मध्य पुरविया थारूदोसरके दोस नै लगा 1 बिस्बासमे कमजोर भेल्हा लोकसबके सुइकार कर आ उसब जे बिचार करने छै, तैमे दोस लग्याके ओइसबसङे तरक नै कर। 2 कोइ-कोइ बिस्बासी सबचिज खाइले हैछै कैहके बिस्बास करैछै, महज बिस्बासमे कमजोर भेल्हा लोक सागपात मातरे खाइले हैछै कैहके बिस्बास करैछै। 3 जे लोक सब चिज खाइछै, उ सागपात खाइबलासबके घिरना नै करे। तहिनङे सागपात खाइबलासब नै खाइबलाके दोस नै लगाबे। कथिलेत परमेस्वर दुनुके सुइकार करने छै। 4 दोसरके नोकरके दोख लगाइबला तु के चिही? उ त ओकर मालिक आपन नोकर असल या खराब काम करल्कै कैहके नियाय करतै। परभुवे आपन नोकरके असल काम करैले सहायता करतै कथिलेत ओकरा सहायता करैबला सक्ति परभुमे छै। 5 कतहेक लोक एकटा दिनके दोसर दिनसे बेसि बिसेस मानैछै महज कतहेक लोक सबदिन एके ठानैछै। हरेक लोक आपन-आपन मनमे बिस्बास करल बातमे पक्का हैलेपरतै। 6 जे लोक एकटा दिनके बिसेस रुपसे मानैछै, उ लोक परभुके आदरके लेल पालन करैछै। तहिनङे जे लोक मासु लगाएत सब चिज खाइछै उ लोक परमेस्वरके आदरके लेल खाइछै आ परमेस्वरके धन्यबाद दैछै। जे लोक सागपात मातरे खाइछै उ लोक परमेस्वरके आदरके लेल खाइछै आ उहो परमेस्वरके धन्यबाद दैछै। 7 अपनोसब आपने लेल नै जियैचियै आ आपने लेल नै मरैचियै। 8 चाहे अपनासब जिबै त परभुवेके लेल जिबै आ चाहे मरबै त परभुवेके लेल मरबै। तैल्याके अपनासब जिबै आ मरबै परभुवेके लेल चियै। 9 ओहैसे येसु खिरिस्ट मरलै आ फेर जिबित भेलै ताकी मरलसब आ जिबीतसब दुनुके परभु हेबे। 10 अनङ छै त तुसब कथिले आपन बिस्बासी भाइसबके दोस लगाइचिही? कथिले आपन बिस्बासी भाइसबके तुच्छ ठानैचिही? कथिलेत अपनासब सबकोइ परमेस्वरके नियाय करैबला ठामके अगा खरा हैले परतौ। 11 कथिलेत पबितर धरमसास्तरमे लिखल छै, “परमपरभु कहैछै, ‘जनङ हम जिबित चियौ तहिनङ सबलोक हमर अगा झुक्तै आ सबकोइ हमरा परमेस्वर कैहके पुकारतै।’” 12 तैखातिर सबकोइ आपन-आपन कामके हिसाब परमेस्वरके दैले परतौ। ठेस लागैबला काम नै कर 13 ओहैसे अपनासब एक-दोसरके दोस नै लगा। बरु अपनासब आपन भाइके ठेस लागैबला या बाधा दैबला काम कहियो नै करबै कैहके अठोट कर। 14 परभु येसुमे बिस्बास कैरके हम यि बात पक्का जानैचियै कि, खाइबला कोनो चिज आपनेमे असुध नै रहैछै। महज जे लोक असुध माइनके खाइछै, उ ओकरलेल असुधे हैछै। 15 यदि तु जे खाइचिही ओइसे तोहर आपने भाइके चित दुखैछौ त, तु आपन भाइके परेमे नै करैचिही। खिरिस्ट आपन परान देके बच्याल भाइ तोहर खाइबला चिजसे नास नै हेबे। 16 तैखातिर असल काम कैरके खराब कहैले दोसरके मौका नै दहै। 17 कथिलेत परमेस्वरके राज खाइ-पियैबला चिज नै, महज पबितर आत्मासे आबैबला धारमिकता, सान्ती आ आनन्द चियै। 18 जे एहेन किसिमसे खिरिस्टके सेबा करैछै, उ परमेस्वरके खुस करैछै आ लोकसबसे आदर पाबैछै। 19 तैल्याके अपनासब उ बातसबके अनुसरन कर जे बात सान्ती लाबैछै आ एक-दोसरके बिस्बासमे बलगर बनाइले मदत करैछै। 20 खाइबला चिजके कारन परमेस्वरके कामके नास नै कर। सब चिज खाइले हैछै महज औरो लोकके बाधा हैबला हिसाबसे खेनाइ खराब चियै। 21 यदि तोहर भाइके तोहर खाइबला मासु, तोहर पियैबला निसा चिज या तोहर करैबला औरो कोनो कामसे समस्या लाबैछैत, तोरा ओइसबके छोरनाइ असल हेतौ। 22 यि बातसबमे भेल तोहर बिस्बास परमेस्वर आ आपने बिचमे राख। उ लोक धैनके चियै, जे अपनासे ठिक ठहर्याल चिजके कारन आपनेके दोसी नै ठहराइछै। 23 महज जे कोइ सङका कैरके खाइछै त, उ दोसी ठहरैछै, कथिलेत बिस्बास बिनाके करल सबकाम पाप चियै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.