रोमी 12 - मध्य पुरविया थारूपरमेस्वरके सेबा 1 तैल्याके हे भाइ-भैयासब, परमेस्वरके दयाके धियानमे राइखके हम तोरासबके बिन्ती करैचियौ, तुसब आत्मिक आराधनाके रुपमे आपन-आपन देहके पबितर आ परमेस्वरके मनपरैबला जिबित बलीके रुपमे चरहा। ओकर आराधना करैबला सहि तरिका एह्या चियै। 2 अइ सन्सारके लोकसब जखा देखासेखी नै कर महज आपन सोच-बिचार परमेस्वरके परिबरतन करैले दहै। तब परमेस्वरके असल, मनपरैबला आ सिध इक्छा कथी चियै से तुसब जानबिही। 3 परमेस्वरके देल अनुगरहसे हम तोरासबके चेताबनी दैचियौ कि, तुसब आपनके बरका नै समझ महज परमेस्वरके देल बिस्बासके नाप अनुसार तुसब जहिनङ चिही तहिनङे सोच। 4 कथिलेत जनङ अपनासबके देहमे बहुतो अङसब छै, महज सब अङके काम एकेटा नै हैछै, 5 तहिनङे अपनासब बहुतो चियै तैयो खिरिस्टमे एकेटा देह चियै आ अपनासब एक-दोसरके सेबा दैबला अङसब चियै। 6 परमेस्वरके अनुगरहसे अपनासबके फरक-फरक किसिमके बरदानसब देनेछै ओहै अनुसार काम करे। यदि जकरसङे अगमबानी बोलैबला बरदान छै त उ आपन बिस्बास अनुसार ओकर तरफसे अगमबानी बोले। 7 जकरसङे सेबा करैबला बरदान छै त, उ सेबाके काम करे, जकरसङे सिक्छा दैबला बरदान छै त, उ निकसे सिक्छा दैबला काम करे। 8 जकरसङे अरति-उपदेस दैबला बरदान छै त, अरति-उपदेस दैबला काम करे, दान दैबला बरदान पाबलहासब खाचोमे परलहासबके उदार-चितसे दान देबे, अगुवाइ करैबला पुरा मन लग्याके अगुवाइ करे, दया करैबला खुसिसाथ लोकसबके दया करे। परेमके बारेमे सिक्छा 9 तोरासबके परेम देखाबटी नै महज सत हेबे। खराब काम छोइरके असल काममे लागल रह। 10 एक-दोसरके आपने भाइ-भैया जखा परेम कर। अपनासे बेसी दोसरके आदर कर। 11 करैबला काममे कोरहिया नै बन महज पबितर आत्मामे जोसगर हो आ परभुके सेबा करैतरह। 12 आपन आसामे आनन्द कर, दुख-कस्टमे धिरज कर आ निरन्तर परथना करैतरह। 13 खिरिस्टके पबितर जनसबके खाचोमे मदत कर आ घरमे एल मेजमानसबके सेबा-सत्कार कर। 14 तोरासबके सताबैबलासबके सराप नै महज आसिरबाद दहै। 15 आनन्द करैबलासबसङे आनन्द कर आ कानैबलासबसङे कान। 16 एक-दोसरसङे मिल-जुइलके रह, घमन्डी नै हो, महज साधारन लोकसबसङे सङहत कर। अपनाके बुधिमान नै ठान। 17 तुसब ककरो खराबके बदला खराब नै कर। जे चिज सबलोकके नजरमे आदरनिय छै, तैमे धियान दहै। 18 सकभर सबकोइसङे मिल-जुइलके रह। 19 हमर पिरिय भाइ-भैयासब, आपनेसे ककरो बदला नै ले महज परमेस्वरके करोधमे छोइरदहै। कथिलेत पबितर धरमसास्तरमे परमपरभु एहेन कहैछै, “बदला लैबला काम हमर चियै, हम्ही बदला लेबौ।” 20 फेनसे दोसर ठाममे एहेन लिखल छै, “तोहर दुस्मन भुख्याल छौ त ओकरा खाइले दहै, उ पियासल छौ त तकरा पानी पियैले दहै। एहेन करलासे तोहर दुस्मन लाजसे ओकर मुह अन्हार हेतै।” 21 खराब बातसे हार नै मान महज खराब बातके भलाइसे जित। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.