रोमी 11 - मध्य पुरविया थारूइजराएलीसबके उपर परमेस्वरके दया 1 ओहैसे आब हम तोरासबके कहैचियौ, “कि परमेस्वर आपनेसे छानल इजराएलीसबके त्यागने छै त?” कहियो नै! कथिलेत हम्हु एक इजराएली आ अबराहमके बंसमे जलमल बेन्यामिन कुलके चियै। 2 परमेस्वर सुरुवेसे छानल आपन लोकसबके नै त्यागने छै। पबितर धरमसास्तरमे अगमबक्ता एलियाके कहल बात तोरासबके थाह नै छौ से? उ इजराएलीसबके बिरोधमे परमेस्वरसे अनङके बिन्ती करल्कै, 3 “हे परभु, उसब अहाँके अगमबक्तासबके जानसे माइरदेने छै, अहाँके बेदीसबके नास कैरदेनेछै। हम असगरे जिबित चियै आ उसब हमरो जानसे मारैले चाहैछै।” 4 महज परमेस्वर एलियाके कहल्कै, “हम त बाल देवताके पुजा नै करैबला सात हजार लोकसबके बच्याके राखने चियै।” 5 तहिनङे परमेस्वरके अनुगरहसे छानल कतहेक इजराएलीसब अखुन्तो बाकी छै। 6 यि त परमेस्वरके अनुगरहसे भेल छै, धरम-करमसे नै, नै त परमेस्वरके अनुगरह बेरथ हेतियै। 7 अकर मतलब सब इजराएलीसब परमेस्वरके अगा धरमी हैले चाहतो परभी नै भेलै महज परमेस्वरके छानल कुछ इजराएलीसब मातरे धरमी ठहरलै। औरो बाकी इजराएलीसब कठोर भेलै। 8 पबितर धरमसास्तरमे एहेन लिखल छै, “परमेस्वर ओकरासबके मन सुस्त बन्यादेल्कै। एहेन आँख देल्कै कि उसब देखैले नै सकैछै आ एहेन कान देनेछै कि उसब सुनैले नै सकैछै। उसब अखुन्तो ओहिनङे दसामे छै।” 9 रजा दाउद सेहो ओहिनङे कहैछै, “ओइसबके भोज-भात ओकरेसबके लेल फन्हा आ जाल बने, ओकरेसबके ठेस लागैबला आ दन्डके कारन बने। 10 ओइसबके आँख देखैले नै सकैबला अन्हर हेबे आ ओइसबके पिठ सबदिनके लेल कुबर हेबे।” कलमी बान्हल ठाइर 11 तैल्याके हम तोरासबके पुछैचियौ, “कि इजराएलीसब ठेस लाइगके फेनसे उठैले नै सकैबला भेलछै से?” नै! उसब बिस्बास नै करलासे गैर-यहुदीसब मुक्ती पाबल्कै। यि देखके इजराएलीसब डाह करे कैहके परमेस्वरके इक्छा छेलै। 12 इजराएलीसब पाप करलाके चल्ते सन्सारके लोकसब आसिस पाबल्कै। उसब मुक्तीके इन्कार करलाके चल्ते गैर-यहुदीसब मुक्ती पाबल्कै त सब इजराएलीसब पस्चाताप कैरके परमेस्वरमे बिस्बास करतै त औरो बेसिसे आसिस पाबतै। 13 आब हम गैर-यहुदीसबके कहैचियौ, हम त गैर-यहुदीसबमे सुसमाचार परचार करैके लेल खिरिस्टके एक परेरित चियै। हम आपन यि सेबाके बिसेस महत्व दैचियै। 14 हमर करल यि सेबासे आपने यहुदी जातिके लोकसबके डाही बनाइले सकी आ ओइसबमेसे कोइ-कोइ पस्चाताप कैरके परमेस्वरमे बिस्बास करे कैहके हमर आसा छै। 15 कथिलेत इजराएलीसब परमेस्वरके असुइकार करलासे सन्सारके लोकसबके ओकरसङे मिलाप भेलै त, ओकरासबके आपन बनाइतै त झन कतहेक निक हेतै! यि त मरलसे जिबित भेल जखा हेतै। 16 यदि रोटीके पहिन्का टुकरा परमेस्वरके चरहाइचियै त, उ सब रोटी पबितर हैछै। तहिनङे गाछके जैर पबितर छै त, तकर ठाइरसब सेहो पबितर हैछै। 17 तहिनङे कतहेक काम नै लागैबला ठाइर काइटके फेकल जखा कतहेक यहुदीसब परमेस्वरके छोइरके गेलै। महज तु गैर-यहुदीसब जङगली जैतुनके ठाइर जखा भेलोपरभी असल जैतुनके गाछमे कलमी बान्हल चिही। आब तुहुसब असल जैतुनके गाछसे सक्ति आ जिबनके रस पाबनेचिही। 18 तैल्याके तुसब काइटके फेकल ठाइर जखा इजराएलीसे असल चियै कैहके घमन्ड नै कर। यदि घमन्ड करैचिही त, यि बात याद राख, तुसब जैरके नै महज जैर तोरासबके थाइमके राखनेछौ। 19 महज तुसब एहेन कहैले सकैचिही, “हमसब कलमी बान्हैले सकी कैहके ठाइरसब काटल छेलै।” 20 यि बात सत चियै कि, इजराएलीसब बिस्बास नै करलासे ठाइर जखा काइटके फेकल रहै। तुसब बिस्बास करलासे कलमी बान्हल गेलचिही। ओहैसे घमन्ड नै कर बरु परमेस्वरके डर मान। 21 परमेस्वर असल ठाइर, इजराएलीसबके बाकी नै राखल्कौ त, कि तोरासबके छोरतौ? 22 परमेस्वर कतहेक दयालु आ कठोर छै से दुनुबात बिचार कर। उ बिस्बास नै करैबलासबके लेल कठोर हैछै महज तुसब ओकर अनुगरहमे सरन लेब्ही त उ तोरासबके दया देखाइतौ। नै त तोरासब काइटके फेकल ठाइर जखा हेब्ही। 23 तहिनङे यदि इजराएलीसब पस्चताप कैरके बिस्बास करतै त परमेस्वर ओकरासबके फेरसे पहिनेके ठाममे कलमी बान्हतै। कथिलेत परमेस्वर ओकरासबके फेरसे कलमी बान्हैले सक्तै। 24 तु गैर-यहुदीसब जङगली जैतुनके गाछसे काटल ठाइरसब जखा चिही। तुसब परकिरती अनुसार नै मिलैबला भेलोपरभी असल जैतुनके गाछमे कलमी बान्हल चिही। इजराएलीसबके बारीमे रोपल जैतुनके ठाइर जखा चियै। ओइसबके फेरसे परमेस्वर कलमी बान्हैले सकैछै। सब इजराएलीसबके उधार 25 हे हमर भाइ-भैयासब, हम तोरासबके एकटा रहसके बात थाह हेबे कैहके चाहैचियौ। उ बात तोरासबके थाह हेतौ त तुसब आपनेके बुधिमान ठाइनके घमन्ड नै करबिही। उ रहसके बात यि चियै कि, खिरिस्टमे आबैबला गैर-यहुदीसब बिस्बास नै करैतक बहुतो इजराएलीसबके हिरदय कठोर हेतै। 26 तकरबाद सब इजराएलीसबके उधार हेतै। पबितर धरमसास्तरमे एहेन लिखल छै, “मुक्तीदाता सियोनसे एतै, उ याकुबके बंसके पापसे घुमाके आन्तै।” 27 “ओइसबके पाप छमा कैरके ओइसबसङे बान्हल करार पुरा करबै।” 28 सुसमाचारमे बिस्बास नै करलासे इजराएलीसब परमेस्वरके दुस्मन भेलछै। यि त तोरासबके लेल निक बात चियौ। महज परमेस्वर ओइसबके आपनेसे छानलाके कारनसे आ ओइसबके पुरखासबसङे परतिग्या करला कारनसे ओइसबके परेम करैछै। 29 कथिलेत परमेस्वर आपनेसे देल बरदान कहियो फिरता नै लैछै आ बोल्यालसबके कहियो नै छोरैछै। 30 पहिने तु गैर-यहुदीसब परमेस्वरके आग्यापालन नै करैछेल्ही, महज आब यहुदीसब आग्यापालन नै करला कारनसे परमेस्वरके किरपा तोरासबके भेटल छौ। 31 परमेस्वर तोरासबके किरपा करल्कौ। ओहिनङे उहोसब एक दिन किरपा पाबे कैहके अखुन उसब आग्यापालन नै करैछै। 32 कथिलेत सबलोक दया पाबे कैहके परमेस्वर ओइसबके अटेरमे छोइरदेनेछै। परमेस्वरके आदर आ परसन्सा 33 आहा! परमेस्वरके धन, ग्यान आ बुधि कतहेक महान छै! ओकर निरनय करल बातके बखान कोइ नै करैले सकैछै। ओकर काम करैबला तरिका कोइ नै बुझैले सकैछै। 34 परभुके मनके कोइ नै जानैले सक्ने छै। ओकरा कोइ नै सल्लाह दैले सक्तै। 35 कोइ नै परमेस्वरके कोनो चिज देने छै, ओहैसे परमेस्वरके ककरो फिरतो दैले नै परतै। 36 कथिलेत सब चिज ओकरे सिरिस्टी चियै आ ओकरेसे बनलछै आ ओकरे लेल बन्याल छै। ओकर महिमा सबदिन हैतरहे! आमेन। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.