रोमी 1 - मध्य पुरविया थारू1 हम पावल, येसु खिरिस्टके दास, यि चिठी लिखैचियौ। परमेस्वर हमरा परेरित हैले बोलाइल्कै आ ओकर सुसमाचार परचार करैले अलग करने छै। 2 जे सुसमाचार बहुत बरिस पहिने परमेस्वर देबै कैहके परतिग्या करने छेलै। अकरे बारेमे ओकर अगमबक्तासब पबितर धरमसास्तरमे लिखने छेलै। 3 उ सुसमाचार परमेस्वरके बेटा, येसु खिरिस्टके बिसयमे चियै। उ लोक भ्याके रजा दाउदके बंसमे जलम लेल्कै। 4 पबितर आत्माके देख्याल अनुसार येसु खिरिस्ट परमेस्वरके बेटा चियै, कथिलेकी ओकरा मरलसे फेन जिबित कराइल्कै। उ अपनासबके परभु येसु खिरिस्ट चियै। 5 अपनासबके परभु येसु खिरिस्ट दुवारा परमेस्वर अपनासबके अनुगरह कैरके परेरित बनेल्कै। सब जातीके लोकसब बिस्बास करे आ ओकर कहल बात माने कैहके हमरा ओकर नाउमे पठाइनेछै। 6 तोरासबके सेहो ओकरेसबकेसङे येसु खिरिस्टके लोक हैले बोलाइनेछौ। 7 तुसब रोम सहरमे भेल सब लोकसबके परमेस्वर परेम करैछै, जे परमेस्वरके पबितर लोक हैकेलेल बोल्यालगेलछै। अपनासबके परमेस्वर पिता आ परभु येसु खिरिस्टसे तोरासबके अनुगरह आ सान्ती मिले। रोम सहरमे जाइके पावलके उतकट इक्छा 8 सबसे पहिने, तोरासबके लेल येसु खिरिस्ट दुवारा हम आपन परमेस्वरके धन्यबाद चरहाइचियै, कथिलेकी खिरिस्टमे करल तोरासबके बिस्बासके बारेमे सारा दुनियामे फैललछै। 9 हम आपन पुरे मनसे परमेस्वरके बेटाके बारेमे सुसमाचार परचार कैरके सेबा करैचियै। हम आपन परथनामे तोरासबके सबदिन सम्झैचियौ से बातके साक्छी परमेस्वर आपने चियै। 10 परमेस्वरके इक्छा हेतै त, कहिनो कैरके अन्तमे तोरासबके लग आबैले सकि कैहके हम ओकरसे परथना करैचियै। 11 पबितर आत्मासे मिलल आसिस तोरासबसङे बाइटके बिस्बासमे बलगर बनाइले सकी कैहके तोरासबसे भेटैके खुब इक्छाछै। 12 हमर बिस्बाससे तोरासबके आ तोरासबके बिस्बाससे हमरा उत्साह मिले कैहके हमर इक्छाछै। 13 हे हमर भाइ-भैयासब, तोरासबके यि थाह हेबे कैहके हम चाहैचियौ कि, तोरासबके लग बहुतो बेर आबैले चाहलियै, महज कोनो न कोनो कारनबस अखुनतक आबैले नै सकल चियै। हम औरो ठामके गैर-यहुदीसबके खिरिस्टमे बौकार बन्याल जखा तोरोसबके बौकार बनाइले खुब इक्छाछै। 14 कथिलेत सभ्य हेबे या असभ्य, सिक्छित हेबे या असिक्छित, सबके सुसमाचार सुनाबैले हमरा कर लागलछै। 15 ओहैसे तुसब रोम सहरमे भेल लोकसबके सेहो सुसमाचार परचार करैके हमरा खुब इक्छाछै। सुसमाचारमे सक्ती 16 हमरा यि सुसमाचार सुनाइले लाज नै लागैछै, कथिलेकी बिस्बास करैबला सबलोकके मुक्ती दैकेलेल यि सुसमाचार परमेस्वरके सक्ती चियै, जे पहिने यहुदीसबके लेल आ बादमे गैर-यहुदीयोसबके लेल चियै। 17 कथिलेत सुसमाचारसे लोकके परमेस्वर कनङके धरमी बनाइतै से बात परकट करने छै। परमेस्वरके अगा धरमी ठहरैबला बात बिस्बाससे सुरु हैछै आ बिस्बासेमे पुरा हैछै। जनङ कि पबितर धरमसास्तरमे लिखलछै, “जे लोक बिस्बास दुवारा परमेस्वरके अगा धरमी ठहरतै, उ लोक जिबन पाबतै।” 18 परमेस्वर स्वरगसे आपन करोध पाप आ दुस्ट काम करैबला लोकसबके उपरमे परलछै। जेसब आपन दुस्ट कामसे सतके दबाके राखनेछै। 19 परमेस्वरके बारेमे जानैबला बातसब ओइसबके थाहेछै, कथिलेकी परमेस्वर ओइसबके उ बात परस्ट कैरदेनेछै। 20 सन्सारके सिरिस्टी हैतकालसे ओकर बन्याल चिजसबसे लोकसब परमेस्वरके जानैले सक्तै। परमेस्वरके अनन्त सक्ती आ इस्वरीय स्वभावसब जखा नै देखाइबला गुनसब सेहो उसब सिरिस्टी करल चिजसबसे साफ-साफ बुझैले सक्तै। ओहैसे ओइसबके बहाना बनाबैबला कोनो कारन नै छै। 21 कथिलेत उसब परमेस्वरके चिन्हीयोके ओकरा आदर नै करल्कै, नै त धन्यबाद देल्कै, महज उसब आपन बिचारमे बेकम्मा भेलै आ ओइसबके मुरुख हिरदय औरो अन्हारसे भरलै। 22 उसब आपनेके बुधियार ठानल्कै महज मुरुख भेलै। 23 कथिलेत उसब नास नै हैबला परमेस्वरके आदर करैके बदलामे नास हैबला लोक, पसुसब, चिरै-चुरगुनसब आ घिसैरके चलैबला जानबरसबके मुरती बन्याके पुजा करल्कै। 24 अहैलेल ओकरासबके हिरदयसे चाहना करल बेबिचारमे परमेस्वर ओकरासबके छोइरदेल्कै आ उसब एक दोसरसङे घिनलागैबला काम कैरके आपन देहके अपबितर बनाइल्कै। 25 उसब परमेस्वरके सतके बदला झुठके अपनेल्कै। उसब सिरिस्टी करैबला आ सबदिन आदर पाबैबला परमेस्वरके नै, महज सिरिस्टी करलहा चिजसबके पुजा आ आराधना करल्कै। आमेन। 26 ओहैसे परमेस्वर ओकरासबके घिनलागैबला बेबिचारके इक्छामे ओइसबके छोइरदेल्कै। ओइसबके घरबालीसब आपन घरबलासङे स्वभाबिक सहवास राखैके छोरके जनी जनीसङे घिनलागैबला सहबास करल्कै। 27 तहिनङ कैरके घरबलासब आपन घरबालीसङे हैबला स्वभाबिक सहबास छोरके पुरुख पुरुखेसङे घिनलागैबला काम करल्कै। उसब आपन देहमे करल अधलाह कामके उचित दन्ड पाबल्कै। 28 उसब परमेस्वरके सत ग्यानके बेकाम ठानल्कै। ओहैसे परमेस्वर ओकरासबके ओहैसबके कुबिचारमे छोइरदेल्कै। 29 उसब सब तरहके खराबी आ दुस्टतासे भरलछै। उसब लोभ, घिरना, दोसरके डाह, हतिया, झगरा-झाटी आ छल करैछै, झुठ बोलैछै आ चुगली लगाइछै। 30 उसब दोसरके निन्दा करैछै आ परमेस्वरके सेहो घिरना करैछै। ककरो आदर नै करैछै महज आपने घमन्डसे फुलल रहैछै आ बरका बारका धाख लगाइछै। खराब काम करैले लया लया उपाय रचैछै। उसब आपन बाप-महतारके कहल बात नै टेरैछै। 31 उसब मुरुख भेलछै आ करबै कैहके कहल बात पुरा नै करैछै। उसब दोसरके परेम आ दया नै करैछै। 32 एहेन लोक मिरतुके योग्यके हैछै कैहके परमेस्वरके धारमिक नियम जानियोके उसब यि कामसब करैछै। ओतबे नै, वोहन काम करैबलासबके औरो उस्काबैछै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.