परकास 9 - मध्य पुरविया थारू1 तकरबाद पाचम स्वरगदुत आपन तुरही फुकल्कै त हम एकटा तरा अकाससे पिरथिबीमे खसल देखलियै। ओइ तराके नरकके कुजी देलगेलै। 2 उ तरा नरकके खोलल्कै आ ओइ नरकसे आइगके बरका भठ्ठीसे धुवाँ जखा निकललै आ ओइ धुवाँसे सुरुजके इजोतके झाइपदेल्कै आ अकास सेहो अन्हार भेलै। 3 उ धुवाँसे फैनगासब पिरथिबीमे एलै आ ओइसबके पिरथिबीके बिछी जखा डसैबला सक्ती देलगेल छेलै। 4 ओइसबके घास या गाछसबके कोनो हानी नै कर महज कपारमे परमेस्वरके छाप नै लागल लोकसबके मातरे नोक्सानी करिहे कैहके आदेस देल्कै। 5 फैनगासबके लोकसबके जानसे मारैके नै महज पाँच महिना तक एकदमे सताबिहे कैहके अधिकार देल्कै। लोकसबके बिछी डसैछै त जनङ पिरा हैछै, ओइसबके देल पिरा सेहो ओहिनङ छेलै। 6 उ लोकसब पाँच महिनामे मरैले चाहतै, महज मरैले नै पाबतै। उसब मरैले खोज्तै महज मिरतु ओकरासबसे दुर भाग्तै। 7 उ फैनगासब लराइमे जाइके लेल तयार भेल घोरासब जखा छेलै। ओकरासबके कपारमे सोनाके मुकुट जखा कुछ चिज छेलै आ ओइसबके चेहरा लोकसबके चेहरा जखा छेलै। 8 ओइसबके केस जनीके केस जखा आ ओइसबके दात सिंहके दात जखा छेलै। 9 ओकरासबके छातिके कबच लोहाके छेलै आ ओकरासबके डेनके अबाज लराइमे दौरैबला बहुत रथ आ घोरासबके जखा छेलै। 10 ओकरासबके नङरी आ खिल बिछीके जखा छेलै। ओइसबके नङरीमे पाँच महिनातक लोकसबके कस्ट दैबला सक्ती छेलै। 11 नरकके दुत ओइसबके रजा छेलै। हिबरु भसामे ओकर नाम “एबाड्डोन” आ गिरीक भसामे ओकर नाम “अपोल्लियोन” चियै। जकर अरथ “नास करैबला” चियै। 12 पहिल्का बिपत समापत भेलै। दुइटा बिपत औरो आबैले बाकिछै। 13 तकरबाद छठम स्वरगदुत आपन तुरही फुकल्कै त हम परमेस्वरके अगा भेल सोनाके बेदीके चार सिंङसे निकलल एकटा अबाज सुनलियै। 14 उ अबाज छठम स्वरगदुतके अनङ कहल्कै, “युफरेटिस नाम भेल बरका लदीमे बान्हल चारटा स्वरगदुतसबके छोइरदहै।” 15 उ चारटा स्वरगदुतसबके छोइरदेल्कै, पुरे सन्सारके एक तिहाइ लोकसब वह्या बरिस, वह्या महिना, वह्या दिन आ वह्या घरीके लेल मारैले तयार कैरके राखने छेलै। 16 ओते बिस करोर घोरसबारसबके फौज छै कैहके हम सुनलियै। 17 हमर दरसनमे देखापरल घोरा आ घोरसबारसब एहेन छेलै, ओकरासबके छातिके कबच आइग जखा लाल, निल आ हरदी रङके छेलै। घोरासबके मुरी सिंहसबके मुरी जखा छेलै आ ओइसबके मुहसे आइग, धुवाँ आ गन्धक निकलैछेलै। 18 ओइसबके मुहसे आइग, धुवाँ आ गन्धकके तिनटा बिपत निकलैत रहलै। तै बिपतसे एक तिहाइ लोकसबके जानसे मारल्कै। 19 कथिलेकी उ घोरासबके मुहमे आ नङरीमे जानसे मारैबला सक्ती छेलै। ओइसबके नङरी बिखधर साँपके मुरी जखा छेलै। लोकसबके कस्ट दैकेलेल उ नङरी हिलाबैछेलै। 20 उ बिपतसे बचलहा लोकसब आपन हाथके कामसबसे पस्चाताप नै करल्कै। उसब भुत-परेतसबके, देखैले नै सकैबला, सुनैले नै सकैबला आ चलै-फिरै नै सकैबला सोना, चानी, काँस, पथल आ काठके मुरतीसबके पुजैलै नै छोरल्कै। 21 उसब हतिया करैसे, जादु-टोना करैसे, बेबिचार करैसे आ चोरि-चकारी करैसे मन नै फिराइल्कै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.