परकास 8 - मध्य पुरविया थारूसातम लाहट आ सोनाके धुपदानी 1 जब थुमा सातम लाहटके तोरल्कै, तब करिब आधा घन्टातक स्वरगमे सुनसान भेलै। 2 तकरबाद परमेस्वरके अगा ठार रहैबला सात स्वरगदुतसबके देखलियै। परमेस्वर ओकरासबके एक-एकटा तुरही देल्कै। 3 सोनाके धुपदानी बोक्ने दोसर एकटा स्वरगदुत आइबके बेदीके कातमे ठार भेलै। सिंहासनके अगा भेल सोनाके बेदीमे परमेस्वरके जनसबके परथनासङे चरहाबैके लेल ओकरा बहुत गमकैबला धुप देल्कै। 4 परमेस्वरके अगा ठारभेल स्वरगदुतके हाथसे धुपके धुवाँ परमेस्वरके जनसबके परथनासङे उपर दिसन गेलै। 5 तकरबाद उ स्वरगदुत धुपदानी लेके ओइमे बेदीके आइग भरल्कै आ पिरथिबीमे फेकल्कै त मेघ गरजनके आबाज एलै, बिजली चमैक उठलै आ भुमकौन गेलै। सातटा तुरहीसब 6 तब उ सातु स्वरगदुतसब, जकरासबसङे सातटा तुरही छेलै, उसब ओइके फुकैले तयार भेलै। 7 पहिल्का स्वरगदुत आपन तुरही फुकल्कै त लहुसङे मिझराइल पथल आ आइग पिरथिबीमे बरसलै। जकर कारन पिरथिबीके एक तिहाइ भाग, गाछसबके एक तिहाइ भाग आ सब हरियर घास-पतार डैहगेलै। 8 दोसर स्वरगदुत आपन तुरही फुकल्कै त आइग लागल पहार जखा देखापरैबला चिज समुन्दरमे खस्लै। तब समुन्दरके एक तिहाइ भाग लहु भेलै। 9 समुन्दरमे भेल एक तिहाइ भागके सब जिबित परानीसब मैरगेलै आ जहाजसबके एक तिहाइ भाग नास भेलै। 10 तकरबाद तेसर स्वरगदुत आपन तुरही फुकल्कै त अकाससे बिसाल तरा मसाल जखा बरैत खस्लै। उ तरा लदिसबके एक तिहाइमे आ पानीके भबसबमे खस्लै। 11 उ तराके नाम “तित” चियै आ उ पानीके एक तिहाइ भाग तित बनेल्कै आ उ तित पानी पिके बहुत लोकसब मैरगेलै। 12 तकरबाद चरमा स्वरगदुत आपन तुरही फुकल्कै त, सुरुज, चान आ तरासबके एक तिहाइ भागमे परहार भेलै। ओइसबके एक तिहाइ भाग अन्हारमे बदैलगेलै। अनङ दिन आ रातके एक तिहाइ भाग अन्हार भेलै। 13 हम देखलियै, अकास उपरमे एकटा गरुर जोरसे अनङ कहैत सुनलियै, “पिरथिबीमे रहैबलासबके धिक्कार! धिक्कार! धिक्कार! कथिलेकी औरो बाकी रहल तिन स्वरगदुतसब तुरही फुक्तै त पिरथिबीमे परैबला बिपत केहेन हेतै?” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.