परकास 7 - मध्‍य पुरविया थारू

एक लाख चौबालिस हजार उपर छाप

¹ तकरबाद पिरथिबीमे, समुन्‍दरमे आ कोनो गाछ-बिरिछमे हबा नै लागे कैहके चारटा स्‍वरगदुतसब पिरथिबीके चारु कातके हबाके रोइकके पिरथिबीके चारु कोनमे ठारभेल हम देखलियै।

² जिबित परमेस्‍वरके लाहट लेके एकटा स्‍वरगदुत पुरुबसे उपर दिसन आबैत हम देखलियै। पिरथिबी आ समुन्‍दरके नोक्‍सान करैबला अधिकार पाबलहा चारटा स्‍वरगदुतसबके उ जोरसे अनङ कहल्‍कै,

³ “हमसब आपन परमेस्‍वरके सेबकसबके कपारमे छाप नै लगाबैतक पिरथिबी या समुन्‍दर या गाछ-बिरिछके बिगार नै कर।”

⁴ तब हम छाप लागलसबके संख्‍या सुनलियै। उसब एक लाख चौबालिस हजार छेलै आ उसब इजराएलके बारह कुलमेसे छेलै।

⁵ इजराएलके एक कुलसे बारह हजार छाप लगाइने छेलै: यहुदाके कुलसे बारह हजार, रुबेनके कुलसे बारह हजार, गादके कुलसे बारह हजार,

⁶ आसेरके कुलसे बारह हजार, नप्‍तालीके कुलसे बारह हजार, मनस्‍सेके कुलसे बारह हजार,

⁷ सिमियोनके कुलसे बारह हजार लेबीके कुलसे बारह हजार, इस्‍साखारके कुलसे बारह हजार,

⁸ जबुलुनके कुलसे बारह हजार, योसेफके कुलसे बारह हजार, बेन्‍यामिनके कुलसे बारह हजार।

उजर बस्‍तर लगेल्‍हासबके बरका भिर

⁹ तकरबाद हम ताकलियै त कोइ नै गनैले सकैबला लोकसबके एकटा बरका भिर देखलियै। उसब हरेक जाती, हरेक कुल, हरेक देस आ हरेक भसाके लोक छेलै। उसब उजर बस्‍तर पिन्‍हके हाथमे खजुरके ठाइर लेके सिंहासन आ थुमाके अगा ठारभेल हम देखलियै।

¹⁰ उसब जोर-जोरसे एहेन कहल्‍कै, “सिंहासनमे बिराजमान हैबला अपनासबके परमेस्‍वर आ थुमासे मुक्‍ती आबैछै।”

¹¹ सिंहासन, धरमगुरु आ चार जिबित परानीके चारुकात स्‍वरगदुतसब ठारभेल छेलै। उसब सिंहासनके अगा निहुकके अनङ कैहके परमेस्‍वरके आराधना करल्‍कै:

¹² “आमेन! परसन्‍सा, महिमा ग्‍यान-बुइध, धन्‍यबाद, आदर अधिकार आ सक्‍ती जुगो-जुगतक अपनासबके परमेस्‍वरके हेबे। आमेन!”

¹³ तकरबाद एकटा धरमगुरु हमरा पुछल्‍कै, “यि उजर बस्‍तर लगाइबलासब के चियै आ कतेसे एलछै?”

¹⁴ हम ओकरा कहलियै, “गुरु जी, हमरा थाह नै छै। अहिके थाहछै।” उ हमरा कहल्‍कै, “उसब त बरका भारी सताबट सैहके एलछै आ उसब आपन-आपन बस्‍तर थुमाके लहुसे धोइबके उजर बनाइनेछै।

¹⁵ अहैकारनसे, उसब परमेस्‍वरके सिंहासनके अगामे छै आ दिन रात परमेस्‍वरके मन्‍दिरमे परमेस्‍वरके सेबा करैछै। सिंहासनमे बिराजमान हैबला आपनेसे परगट हैत ओइसबके सुरक्‍छा करतै।

¹⁶ उसब कहियो नै भुखल आ पियासल रहतै। उसबके सुरुजके टहटहवा रौद या नै कोनो जराइबला धाहसे हानी करतै।

¹⁷ कथिलेत सिंहासनके बिचमे रहैबला थुमा ओकरासबके चरबाहा हेतै, ओकरासबके डोरियाइत जिबनके पानीके मुलमे लजेतै आ परमेस्‍वर ओकरासबके आँखके सब लोर पोइछदेतै।”