परकास 5 - मध्‍य पुरविया थारू

थुमाके दरसन

¹ सिंहासनमे बिराजमान भेलके दहिना हाथमे हम कागतके एकटा मुठा लपेटल देखलियै। उ कागतके मुठा भितर आ बाहर दुनुकात लिखल रहै आ ओइमे सातटा लाहट लगाके बन्‍द करने रहै।

² तब हम एकटा बलबान स्‍वरगदुतके देखलियै, जे बरका अबाजमे अनङ कैहके पुछल्‍कै, “अकर लाहट तोइरके अकर मुठा खोलैले के योग्‍यके छै?”

³ महज स्‍वरगमे, पिरथिबीमे आ पिरथिबीके निचा पतालमे कागतके मुठाके खोइलके ओइ भितर देखैले सकैबला कोइ नै भेटलै।

⁴ उ कागतके मुठा खोइलके ओइ भितरमे देखैके योग्‍य कोइ नै भेलासे हम खुबे कानलियै।

⁵ तब धरमगुरुमेसे एक गोरा हमरा कहल्‍कै, “नै कान! देख, यहुदाके कुलसे एल एकटा सिंह, जे दाउदके सिंहासनके उतराधिकार छै, उ जितने छै आ सातटा मुठाके लाहट तोरके खोलैके योग्‍यके छै।”

⁶ तकरबाद हम चारटा जिबित परानी आ धरमगुरुसबसे घेरल सिंहासनके बिचमे एकटा थुमा ठारभेल देखलियै। उ थुमा मारल जखा देखाइछेलै। ओकरा सातटा सिङ आ सातटा आँख छेलै। सातटा आँख पुरे पिरथिबीमे पठाल परमेस्‍वरके सात आत्‍मा चियै।

⁷ थुमा अगा जाके सिंहासनमे बैठलहाके दहिना हाथसे उ कागतके मुठा लेल्‍कै।

⁸ तकरबाद उ चारटा जिबित परानीसब आ चौबिसटा धरमगुरुसब अगा आइबके निहुक गेलै। सबके हाथमे एक-एकटा बजाबैबला बिना आ धुप गमकसे भरल सोनाके बाटी छेलै, उ धुपके गमक त परमेस्‍वरके लोकसबके चरहाल बिन्‍ती परथना चियै।

⁹ उसब अनङ कहैत एकटा लया गित गाबल्‍कै, “यि कागतके मुठा लैले आ अकर लाहटके तोरेके योग्‍य अहाँ मातरे चियै, अहाँ मारल गेलियै आ आपन लहुसे अहाँ परमेस्‍वरके लेल सब कुल, भसा, जाती आ देसके लोकसबके छुटकरा देलियै।

¹⁰ अहाँ त ओइसबके रजा जखा सासन करैले आ पुजारी जखा परमेस्‍वरके सेबा करैले देनेचियै आ उसब पिरथिबीमे राज करतै।”

¹¹ तब हम देखलियै त बहुतो स्‍वरगदुतसब गित गाबैत रहै, जेसब सिंहासन, चारु जिबित परानी आ धरमगुरुके चारुदिसन ठारभेल छेलै, जकर गन्‍ती लाखो-लाख आ करोरोमे छेलै।

¹² उसब जोरसे अनङ कहैछेलै, “बलीके रुपमे मारलगेल थुमा अधिकार, धन, बुइध, बल, मान, आदर आ इस्‍तुती पाबैके योग्‍यके चियै!”

¹³ तब स्‍वरगमे, पिरथिबीमे, पिरथिबी निचा पतालमे, समुन्‍दर आ ओते भेल सब परानीके अनङ कहैत हम सुनलियै, “सिंहासनमे बिराजमान हैबलाके आ थुमाके इस्‍तुती, आदर, महिमा आ बल सदा-सरबदा हेबे।”

¹⁴ तब उ चारु जिबित परानी कहल्‍कै, “आमेन” आ उ धरमगुरुसब निहैकके गोरलगी करल्‍कै।