परकास 21 - मध्य पुरविया थारूलया अकास आ लया पिरथिबी 1 तकरबाद हम लया अकास आ लया पिरथिबी देखलियै, कथिलेत पहिन्का अकास आ पिरथिबी बितगेलै आ ओते कोनो समुन्दरो नै छेलै। 2 तब हम परमेस्वरसे बरके लेल कनिया जखा सिङगार-पटार करल, अरथात पबितर सहर, लया यरुसलेम, स्वरगसे निचा आबैत देखलियै। 3 तब हम सिंहासनसे एहेन कहल एकटा बरका अबाज सुनलियै, “देख, परमेस्वरके बास लोकसबसङे भेल छै। परमेस्वर ओइसबसङे बास करतै आ उसब ओकर लोकसब हेतै। परमेस्वर आपने ओइसबके परमेस्वर भ्याके ओकरासबसङे रहतै। 4 परमेस्वर ओकरासबके आँखके पुरे लोर पोइछदेतै। ओते मिरतु, सोक, बिलाप आ दुख नै हेतै। कथिलेत पुरन्का सब बात बित गेलछै।” 5 तब सिंहासनमे बिराजमान रहैबला परमेस्वर कहल्कै, “देख! हम सबचिज लया बनाइबै।” उ हमरा अहिनङो कहल्कै, “यि लिख, यि बात बिस्बासयोग्य आ सत छै।” 6 उ हमरा कहल्कै, “आब सबकाम पुरा भ्यागेलै! अल्फा आ ओमेगा, सुरु आ अन्त हम्ही चियै। जकरा-जकरा पियास लागल छै, हम ओइसबके मङनिएमे जिबनके पानीके भबसे पियैले देबै। 7 जे कोइ जित्तै, उ यि सब अधिकार पाबतै। तब हम ओकर परमेस्वर हेबै आ उ हमर बेटा हेतै। 8 महज डरपोकसब, बिस्बास नै करैबलासब, घिनलागैबला काम करैबलासब, हतियारासब, बेबिचारीसब, जादु-टोना करैबलासब, मुरती पुजा करैबलासब आ झुठ बोलैबलासबके ठाम त आइग आ गन्धक बरैबला भठिमे हेतै। यि दोसर मिरतु चियै।” लया यरुसलेम 9 तब उ सात अन्तिम बिपतीसे भरल सातटा बाटी बोकैबला सातटा स्वरगदुतमेसे एक गोरे हमरा आइबके कहल्कै, “अते या, हम तोरा कनिया देखेबौ, जे थुमाके घरबाली चियै।” 10 तकरबाद हम पबितर आत्मासे भरपुर भेलियै आ स्वरगदुत हमरा बरका आ उच पहारमे ल्यागेलै। तब स्वरगदुत हमरा स्वरगमे रहैबला परमेस्वरसे निचा दिसन खसैत पबितर सहर यरुसलेम देखाइल्कै। 11 उ सहर परमेस्वरके महिमासे भरल छेलै आ उ बहुमुल्य रत्न, मोती आ मनी जखा चम्कैछेलै। 12 ओकर चारुकात बरका आ उचगर दबाल छेलै। ओइमे बारहटा केबार छेलै आ हरेक केबारमे एक-एक गोरे स्वरगदुत ठारभेल छेलै। उ केबारसबमे इजराएलके बारह कुलके नाम लिखल छेलै। 13 पुरब दिसन तिनटा, पछिम दिसन तिनटा, उतर दिसन तिनटा आ दछिन दिसन तिनटा केबारसब छेलै। 14 ओइ सहरके देबालके बारहटा जग छेलै आ ओइमे थुमाके बारह परेरितसबके नाम लिखल छेलै। 15 हमरसङे बोलैबला स्वरगदुतके हाथमे उ सहर, ओइके केबार आ दबाल नापैबला एकटा सोनाके लगी छेलै। 16 उ सहर चौखुट छेलै। ओकर चौरा आ लम्बा बराबर रहै। जब स्वरगदुत ओइ लगीसे सहरके नापल्कै तब उ सहर दुइ हजार चार सय किलोमिटर छेलै। ओकर लम्बा, चौरा आ उच सब बराबर छेलै। 17 तकरबाद स्वरगदुत उ दबाल नापल्कै आ लोकके परयोग करल नाप अनुसार उ एकसय चौबालिस हाथ छेलै। 18 उ दबाल चमकदार पथलसे बनल छेलै आ सहर निखुर सोनासे बनल छेलै आ सफा सिसा जखा चम्कैछेलै। 19 दबालके जगसबमे बहुत किसिमके बहुमुल्य रत्नसबसे सजाल रहै। पहिन्का जग चमकदार बिलौर, दोसर नीरमनी, तेसर हरित मनी, चारम पन्ना, 20 पाचम आनिक्स, छठम लालमनी, सातम पीतमनी, आठम बेरुज, नवम पुस्पराज, दसम लसुने, एघारम निलमनी आ बारहम कटेलाके छेलै। 21 ओते बारह केबार बारह मोतिके छेलै। हरेक केबार एक-एक मोतिसे बनल छेलै। ओइ सहरके सरक चमकदार सिसा जखा निखुर सोनाके छेलै। 22 हम सहरके भितरमे कोनो मन्दिर नै देखलियै। कथिलेत सरबसक्तिमान परभु परमेस्वर आ थुमे ओइ सहरके मन्दिर छेलै। 23 उ सहरमे इजोतके लेल सुरुज आ चानके आबस्यक नै छै, कथिलेत परमेस्वरके महिमा ओतेका इजोत चियै आ थुमा आपने चिरखा चियै। 24 सन्सारके सबलोक ओकर इजोतमे चल्तै आ पिरथिबीके रजासब आपन महिमा ओते आन्तै। 25 उ सहरके केबारसब दिनमे कहियो बन नै हेतै, नै त ओते राते हेतै। 26 तब जाती-जातीके लोकसब परमेस्वरके आदरके खातिर आपन-आपन महिमा आ मान-सम्मान सब ओते आन्तै। 27 महज असुध चिज, घिरनित काम करैबला आ झुठ बोलैबलासब उ सहरके भितर जाइले नै पाबतै। थुमाके जिबनके किताबमे नाम लिखलहासब मातरे ओते जाइले पाबतै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.