परकास 20 - मध्य पुरविया थारूएक हजार बरिस 1 तकरबाद हम एकटा स्वरगदुतके स्वरगसे निचा आबैत देखलियै। ओकर हाथमे नरकके कुजी आ बरका जंनजिर छेलै। 2 उ स्वरगदुत अजेगरके पकैरके एक हजार बरिसतक बाइन्हके राखल्कै। उ अजेगर सुरुके साँप या दुस्टके रजा आ सैतान चियै। 3 आबसे जाती-जातीके लोकसबके नै ठगे कैहके स्वरगदुत ओकरा नरकमे फेकदेल्कै आ बन कैरके मोहर लग्यादेल्कै। एक हजार बरिस बितलाकेबाद कुछ देरके लेल खोइलदेतै। 4 तब हम सिंहासनसब आ ओइमे बैठलसबके देखलियै, जकरा नियाइ करैके अधिकार परमेस्वर देनेछेलै। तकरबाद हम येसुके गबाही आ परमेस्वरके बचन परचार करलासे मुरी कटलहासबके आत्मासब देखलियै। उसब जानबर या मुरतिके पुजा नै करनेरहै, नै त आपन कपार या हाथमे ओकर चेन्हा बनाइनेरहै। उसब फेरसे जिबित भेलै आ खिरिस्टसङे एक हजार बरिसतक राज करल्कै। 5 बाकी मरलहासब एक हजार बरिस नै बितैतक जिबित नै भेलै। पहिन्का पुनरुथान एह्या चियै। 6 उसब धैनके आ पबितर चियै, जेसब पहिन्का पुनरुथानमे जिबित भ्याके उठलै। ओइसबके दोसर मिरतुके सक्ती किछो करैले नै सक्तै महज उसब परमेस्वर आ खिरिस्टके पुजारी भ्याके खिरिस्टसङे एक हजार बरिसतक राज करतै। सैतानके अन्तिम बिनास 7 जब एक हजार बरिस पुरा हेतै तब सैतानके ओकर कैदसे मुक्त कैरदेतै। 8 तब पिरथिबीके चारुदिसनसे लोकसबके बहकाइले या गोग आ मागोगके लराइके लेल जम्मा करैले निकल्तै। उसबके सङख्या समुन्दरके बालु सरह हेतै। 9 उसब पुरे पिरथिबीमे गेलै आ परमेस्वरके जनसबके रहैबला ठामके चारुकात आ ओकर परेम करल सहरके घेरल्कै महज स्वरगसे आइग बरैसके ओकरासबके नास करल्कै। 10 तब जाती-जातीके लोकसबके बहकाबैबला दुस्टके रजा सैतानके आइग आ गन्धकके खाइदमे फेकदेल्कै, जते जानबर आ झुठा अगमबक्तासबके फेकने छेलै। ओते उसब दिन-रात सबदिन दुख-कस्ट भोगैतरहतै। अन्तिम नियाय 11 तकरबाद हम एकटा बरका उजर सिंहासन आ ओइमे बैठैबलाके देखलियै। पिरथिबी आ अकास ओकर सामनेसे भाग्लै आ उसब फेनसे कहियो नै देखा परलै। 12 हम बरका आ छोटका सब मरलसबके सिंहासनके सामने ठारभेल देखलियै आ किताबसब खोलल्कै। दोसर किताब खोलल्कै, जे जिबनके किताब छेलै। उ किताबमे लिखल अनुसार, ओकरासबके काम अनुसार मरलसबके नियाइ भेलै। 13 जे सब समुन्दरमे मरल छेलै ओइसबके समुन्दर ओकरा देल्कै। मिरतु आ पताल सेहो ओइमे भेल मरलसबके देल्कै। तब ओकरासबके करल काम अनुसार सबके नियाइ भेलै। 14 मिरतु आ पताल आइगके भठिमे फेकलगेलै। यि दोसर मिरतु चियै। 15 जकर-जकर नाम जिबनके किताबमे लिखल नै भेटलै, ओकरासबके आइगके भठिमे फेकदेल्कै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.