परकास 2 - मध्य पुरविया थारूएफिससके मन्डलीके लेल सन्देस 1 “एफिससमे भेल मन्डलीके देख-भाल करैबला स्वरगदुतके यि बात लिख: ‘सातटा तरा आपन दहिना हाथमे लैबला आ सातटा सोनाके डैठके बिचमे चलैबला अनङ कहैछै। 2 तोहर करल मेहनतके काम आ तोहर धिरज हमरा थाहछै। तु दुस्ट लोकसबके सहन करैले नै सकैचिही कैहके हमरा सेहो थाहछै। परेरित नै चियै तैयो आपनके परेरित कहैबलासबके तु जाँच कैरके झुठ साँच पता लगाइनेचिही सेहो थाहछै। 3 हमरा थाहछै, तुसब धिरज कैरके सहन करनेचिही आ हमर नाउके खातिर कस्ट पाबियोके हमरा नै त्यागने चिही। 4 महज तोरासबके बिरोधमे हम यि कहैचियौ कि, तुसब हमरा पहिनेके करल परेम जखा अखैन करैले छोरने चिही। 5 अहैलेल तु कतहेक गिरल चिही, से याद कर। पस्चाताप कर आ पहिनेके करल जखा परेम कर। यदि तुसब पस्चाताप नै करबिही त, हम आइबके तोरासबके डैठ उ जगहसे हटादेबौ। 6 महज तोरासबमे एकटा असल गुन यि छौ कि हमरे जखा तुहुसब निकोलाइटसके रस्तामे चलैबलासबके कामके घिरना करैचिही। 7 जकरा कान छै, से पबितर आत्मा मन्डलीसबके कथी कहैछै से बात सुने। जे जित्तै ओकरा परमेस्वरके स्वरगलोकमे भेल जिबन दैबला गाछिके फल खाइले देबै।’” इस्मुरनाके मन्डलीके लेल सन्देस 8 “इस्मुरनामे भेल मन्डलीके देख-भाल करैबला दुतके यि लिख, ‘जे सुरु आ अन्त चियै, उ मरियोके जिबित हैबला अनङ कहैछै। 9 हमरा तोहर कस्ट आ तोहर गरिबी थाहछै। महज बास्तममे तु धनिक चिही। हम ओकरासबके चिन्हैचियै, जे आपनके यहुदी त चियै कहैछै, महज बास्तममे नै चियै। उसब तोहर बिरोध करल निन्दा हम जानैचियै। उसब त सैतानके लोकसब चियै। 10 तोरा जे कस्ट परेबलाछौ ओइसे नै डरा। तोहर बिस्बास जाँचके लेल सैतान तोरासबमेसे कतेक लोकके जहलमे ढोकतौ। अहिनङ कैरके तोरासबके दस दिनतक कस्ट सहैले परतौ। तु मिरतु तक हमरमे बिस्बास करैले नै छोर। तब हम तोरा जिबनके मुकुट देबौ।’ 11 ‘जकरा कान छै, उ पबितर आत्मा मन्डलीसबके कथी कहैछै से बात सुने। जे जित्तै, ओकरा दोसर मिरतु किछो हानी नै करतै।’” परगाममके मन्डलीके लेल सन्देस 12 “परगामममे भेल मन्डलीके देख-भाल करैबला दुतके यि लिख, जकरसङे दुइ दिसन धार भेल तलबार छै, उ अनङ कहैछै। 13 हमरा थाहछै, तुसब सैतानके सिंहासन भेल ठाममे रहैचिही, तैयो तुसब हमर नाममे अस्थिर रहैचिही। तुसब हमर भक्त चिही आ हमरा बिस्बास करैले नै छोरनेचिही से हमरा थाहछै। हमर बिस्बासी साक्छी एन्टिपास सैतान रहैबला ठाममे मारलगेलै, ओहु समयमे बिस्बास करैले नै छोरलिही। 14 महज तोरासबके बिरोधमे हमरसङे कुछ बातसब छै, कथिलेकी तोरासबमेसे कोइ कोइ एहेनछै, जे बालामके सिक्छा मानैछै। मुरुतिके चरहाल चिज आ बेबिचार कैरके इजराएली लोकसबके पापमे फसाइके लेल बालाम बालक रजाके सिखाइने छेलै। 15 ओहिनङे निकोलाइटसके सिक्छा मानैबला सेहो तोरेसबके बिचमेछौ। 16 ओहै खातिर पापसे पस्चाताप कर, नै त हम जल्दिए तोरासबलग एबौ आ हमर मुहसे निकलल तलबारसे उ दुस्ट काम करैबलासबसङे लराइ करबौ। 17 ‘जकरा कान छै, उ पबितर आत्मा मन्डलीसबके कथी कहैछै से बात सुने। जे जित हासिल करतै, तकरा हम गुप्तमे भेल खाइबला मन्न देबै। हम ओकरासबके एकटा उजर पथल देबै, जैमे लया नाम लिखल रहतै। यि उजर पथल पाबैबला मातरे उ नाम जान्तै।’” थिआटिराके मन्डलीके लेल सन्देस 18 “थिआटिरा मन्डलीके देख-भाल करैबला दुतके यि लिख, ‘आइग जखा बरैबला आँख आ खाइरके चम्कैबला काँस जखा टाङ भेल परमेस्वरके बेटा अनङ कहल्कै, 19 तुसब कि-कि करैचिही हमरा थाहछै। तोरासबके करल परेम, बिस्बास, सेबा आ तोरासबके करल धिरज हमरा थाहछै। तुसब पहिने जे करने छेल्ही ओहौसे बेसी अखैन करैचिही से हमरा थाहछै। 20 महज तोहर बिरोधमे हमरा यि कहैकेछै कि, तु इजबेल कहाइबली जनीके सहन करैचिही। जे आपनेके अगमबादिनी कहैछै आ आपन सिक्छासे हमर सेबकके भरमाके बेबिचार करैले आ मुरतिपुजामे चरहाल चिज खाइले सिखाबैछै। 21 हम ओकरा पस्चाताप करैले समय देलियै महज उ आपन बेबिचारसे पस्चाताप करैले इन्कार करल्कै। 22 देख, हम ओकरा बिमारसे बिछोनामे थला परादेबै आ ओकरसङे बेबिचार करैबलासब एकदम दुख आ कस्ट पाबतै। उसब पस्चाताप कैरके ओहन दुस्ट काम नै छोरतै त, हम ओइसबके बरका सजाय देबै। 23 ओकर पछा लागैबला बेटा-बेटीसबके हम खतम करबै। तब सब मन्डलीसब थाह पाबतै कि हम वहे चियै जे सबके मन आ हिरदयके जाँच करैचियै। हम तोरासबके काम अनुसारके इनाम देबौ। 24 महज एहेन खराब सिक्छामे नै लागल आ सैतानके भितरी रहसके बात नै मानैबला थिआटिरामे भेल औरो लोकके कहैचियौ कि, हम तोरासबके औरो कोनो भारी आग्या नै देबौ। 25 महज जाबेतक हम नै एबौ ताबेतक तुसब आपन बिस्बासमे अरल रह। 26 जे जित्तै आ अन्ततक हमर इक्छा पुरा करैतजेतै, तकरा हम जाती-जाती उपर अधिकार देबै। 27 तकरबाद उसब लोहाके डन्टासे सासन करतै आ जाती जातीके लोकसबके माटीके बरतन जखा चकनाचुर करतै, जनङ हम आपन पितासे अधिकार पाबनेचियै तहिनङे ओकरा सबके देबौ। 28 हम ओकरा अनगुतके तरा सेहो देबै।’ 29 ‘जकरा कान छै, उ सुने, पबितर आत्मा मन्डलीसबके कथि कहैछै।’” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.