परकास 17 - मध्य पुरविया थारूबेबिचारी जनी आ जानबर 1 तब सात बाटी लेल सात स्वरगदुतमेसे एक गोरे हमर लगमे आइबके कहल्कै, “एते या, हम तोरा नाम चलल बेबिचारनी जनीके कनङके सजाय दैछै से देखाइबौ। उ बेबिचारनी जनी समुन्दरके पानी उपरमे रहैछेलै। 2 ओकरसङे सन्सारके रजासब बेबिचार करने छेलै आ सन्सारके लोकसब ओकर बेबिचारके नसासे मातल छेलै।” 3 तब हम पबितर आत्मासे भरलियै आ स्वरगदुत हमरा उजार जगहमे ल्यागेलै। ओते हम लाल रङके जानबरके उपरमे एकटा जनीके बैठल देखलियै। उ जानबरके सातटा मुरी आ दसटा सिङ छेलै आ ओकर पुरे देहमे परमेस्वरके निन्दा करैबला नामसब लिखल छेलै। 4 उ जनी बैजनी आ लाल रङके बस्तर लगाइने छेलै आ सोना, बहुमुल्य रत्न आ मोतिसबके गहना-गुरियासे सिङगारल छेलै। ओकर हाथमे सोनाके एकटा बाटी छेलै आ ओइमे बेबिचारके घिनलागैबला असुध चिजसबसे भरल छेलै। 5 ओकर कपारमे एक रहसमय नाम लिखल छेलै, “महान बेबिलोन, सन्सारके बेबिचारनी आ अधलाह काम करैबलासबके महताइर चियै।” 6 तब हम उ जनीके परमेस्वरके पबितर जनसब आ येसु खिरिस्टके साक्छी दैबलासबके लहु पिके मातल देखके हम एकदम छक परलियै। 7 महज स्वरगदुत हमरा कहल्कै, “तु कथिले छक परलिही?” हम तोरा उ जनी आ ओकरा बोकैबला सातटा मुरी आ दसटा सिङ भेल जानबरके रहस बतेबौ। 8 तु जे जानबर देखलिही उ एक समयमे जिबित छेलै महज अखुन मरल छै। उ गैहर खाइदसे बाहर निकैलके एतै आ नासमे जेतै। सन्सारके सिरिस्टी हैसे पहिने जकर नाम जिबनके किताबमे लिखल नै छै, उसब उ जानबरके देखके छक परतै, कथिलेत एक समयमे उ जिबित छेलै अखुन मरल छै। महज उ पाछे फेरसे जिबित हेतै। 9 यि बातसब बुझैले ग्यान आ बुइध चाही। उ सातटा मुरीके मतलब सात पहार चियै, जैमे उ जनी बैठलछै। 10 उसब सातटा रजा सेहो चियै, ओइमेसे पाँच गोरे नास भ्यागेलछै। एक गोरे छेबेकरै आ एक गोरे आबैले बाकी छै। उ आइबके कुछ समयके लेल मातरे राज करतै। 11 उ जानबर, जे पहिने जिबित छेलै महज अखुन मरलछै, उ आठम रजा चियै। सातममेसे एक चियै महज ओकर नास हेतै। 12 तु जे दस सिङ देखलिही, से दस रजासब चियै, उसब अखुनतक राज नै करने छै। महज उसब कुछ समयके लेल उ जानबर सङे राज करैके अधिकार पाबतै। 13 उ दस रजासबके एके उदेस्य छै आ उसब आपन सक्ति आ अधिकार उ जानबरके सोइपदेतै। 14 उसब थुमाके बिरोधमे लराइ करतै महज थुमा आपनसङे बोल्याल, छानल आ बिस्बास योग्यसबके ल्याके ओकरासबके जित्तै कथिलेत उ परभुसबके परभु आ रजासबके रजा चियै। 15 तब स्वरगदुत हमरा कहल्कै, “तु जे बेबिचारनी जनीके समुन्दरके पानी उपर बैठल देख्ने छेल्ही, उ त देससब, भिरसब, जातीसब आ भसासब चियै। 16 तु जे जानबर आ दसटा सिङके देखलिही, उ ओइ बेबिचारनी जनिके घिरना करतै। उसब ओकर सब चिज लुइटके नङटे बनाइतै आ ओकर मासु खेतै आ ओकरा आइगसे नास कैरदेतै। 17 कथिलेत परमेस्वर आपन उदेस्य पुरा करैबला मन ओकरासबके देनेछै आ परमेस्वरके कहल बचन पुरा नै हैतक उसब एकेमन भ्याके काम करतै, राज करैबला आपन अधिकार उ जानबरके देतै। 18 तु जे बेबिचारी जनिके देखलिही उ महानगरी चियै आ सन्सारके सब रजासब उपर राज करैछै।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.