परकास 16 - मध्य पुरविया थारूपरमेस्वरके करोधके सात बाटी 1 तब हम मन्दिरसे सात स्वरगदुतके जोरसे एहैन कहैत सुनलियै, “तुसब जो आ परमेस्वरके करोधके सात बाटी पिरथिबीमे झाइक दहै।” 2 तकरबाद पहिल्का स्वरगदुत आपन बाटी पिरथिबीमे झाइक देल्कै। तैखातिर उ जानबरके छाप लागल आ मुरतिके पुजा करैबला लोकसबके देहमे घिनलागैबला आ एकदम दुखाइबला घाँह-घौससब निकल्लै। 3 तब दोसर स्वरगदुत आपन बाटी ल्याके समुन्दरमे झाइक देल्कै आ समुन्दरके पानी मरल लोकके लहु जखा भेलै। तब समुन्दरमे भेल सब जिबित परानीसब मैरगेलै। 4 तब तेसर स्वरगदुत आपन बाटी लदीसब आ पानीके भबसबमे झाइक देल्कै आ उ सब लहु भ्यागेलै। 5 पानीउपर अधिकार भेल स्वरगदुतके एहैन कहैत हम सुनलियै, “हे पबितर परमेस्वर, अहाँ जे चियै, जे छेलियै, अहाँके करल नियाइ ठिक छै। 6 कथिलेत उसब अहाँके पबितर जनसब आ अगमबक्तासबके लहु बहेनेछै तब ओकरासबके अहाँ लहुवे पियैले देलियै। ओइसबके अनङ सजाय पाबनाइ उचित छै।” 7 तकरबाद हम बेदीलगसे एकटा एहेन अबाज सुनलियै, “हे सरबसक्तिमान परभु परमेस्वर, अहाँके नियाइ ठिक आ सत छै!” 8 तब चारम स्वरगदुत आपन बाटी ल्याके सुरुज उपर झाइक देल्कै आ लोकसबके रौदसे डहाबैके सक्ती सुरुजके देल्कै। 9 लोकसब सुरुजके टहटह रौदसे डहलै आ यि दुख-कस्टसे उसब परमेस्वरके नामके धिक्कारल्कै महज उसब आपन पापसे पस्चताप करैले आ ओकरा महिमा दैले इन्कार करल्कै। 10 तब पाचम स्वरगदुत आपन बाटी उ जानबरके सिंहासनमे झाइक देल्कै आ ओकर राज अन्हार भेलै। लोकसब दुख-कस्ट सहैले नै सक्लासे आपन जिहके दातसे काटल्कै। 11 तब उसबके घाँह-घौसके दुखसे स्वरगमे रहैबला परमेस्वरके सरापल्कै महज आपन करल पापसे पस्चताप करैले नै मानल्कै। 12 तकरबाद छठम स्वरगदुत आपन बाटी ल्याके बरका लदी युफरेटिसमे झाइक देल्कै आ लदीके पानी सुइख गेलै। तब पुरब दिसरसे आबैबला रजासबके लेल बाट तैयार भेलै। 13 तब हम अजेगरके मुहसे, जानबरके मुहसे आ झुठा अगमबक्ताके मुहसे बेङ जखा तिनटा असुध आत्मासबके निकलैत देखलियै। 14 उसब अचमके चेन्हा देखाइबला आत्मासब चियै। उसब पिरथिबीके जम्मे रजासब लग जाइछै आ सरबसक्तिमान परमेस्वरके महान दिनमे जुध करैले ओकरासबके जमा करैछै। 15 “देख, हम चोर जखा अनचेकेमे एबौ। उ लोक धैनके चियै, जे जागल रहैछै आ आपन बस्तरके जोग्याके राखैछै। उ लोकके नाङटे चले नै परतै आ लोकसबके बिचमे लाजमे नै परतै!” 16 तब हिबरु भसामे आर-मागेड्डोन कहैबला ठाउमे उ असुध आत्मासब रजासबके जमा करल्कै। 17 सातम स्वरगदुत आपन बाटी हबामे झाइक देल्कै। तब परमेस्वरके सिंहासनसे एकटा एहैन अबाज एलै, “आब समाप्त भेलै।” 18 ओते बिजली चमकलै आ मेघ गरजलै आ बरका भुमकौन एलै। लोकके सिरिस्टिसे आइतक ओहेन बरका भुमकौन कहियो नै एलछेलै। 19 तब उ सहर टुकरा-टुकरा भ्याके तिन भाग भेलै आ सब देसके सहरसब नास भेलै। परमेस्वरके महान बेबिलोनके याद एलै आ आपन करोधसे भरल मध बाटीसे ओकरा पियैले देल्कै। 20 सब टापुसब बिलागेलै आ पहारसब बेपता भेगेलै। 21 अकाससे चालिस-चालिस किलोके पथल लोकसब उपर बरसैले लाग्लै आ लोकसब पथलके बिपतीके कारन परमेस्वरके सरापे लाग्लै कथिलेत उ बिपत एकदम भयानक छेलै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.