परकास 13 - मध्य पुरविया थारूजानबरसब 1 हम समुन्दरके बालु उपर ठारभेल छेलियै तकरबाद समुन्दरसे निकैलके आबैत एकटा जानबर हम देखलियै। उ जानबरके दसटा सिङ आ सातटा मुरी छेलै आ सब सिङमे एकटा-एकटा मुकुट छेलै आ ओकर सब मुरीमे परमेस्वरके अपमान करैबला नाम लिखल छेलै। 2 उ जानबर चितुवा जखा लागैछेलै। ओकर टाङ भालु जखा छेलै आ मुह सिंह जखा छेलै। उ अजेगर आपन सक्ती, सिंहासन आ बरका अधिकार ओहै जानबरके देल्कै। 3 ओकर एकटा मुरीमे मरैले लागैबला बहौत गैहर चोट लागल छेलै, महज उ गैहर चोट निक भेलै। अहै खातिर सारा सन्सारके लोकसब आस्चरजमे पैरके ओइ जानबरके पछा लागे लाग्लै। 4 लोकसब उ अजेगरके पुजा करैछेलै कथिलेत अजेगर आपन अधिकार जानबरके देनेछेलै। लोकसब उ जानबरके सेहो जयजयकार करैत अनङ कहल्कै, “ओइ जानबर जखा औरो के छै से? ओकरसङे लराइ करे सकैबला के छै से?” 5 उ जानबरके बरका बरका बात कैरके परमेस्वरके अपमान करैबला मुह देनेछेलै। ओइ जानबरके बियालिस महिना तलिक काम करैके अधिकार देनेछेलै। 6 उ परमेस्वरके अपमान, ओकर नाम, ओकर रहैबला ठाम आ स्वरगमे रहैबलासबके निन्दा करेलाग्लै। 7 उ परमेस्वरके लोकसबसङे लराइ करैके आ ओइसबके जितैके अधिकार पाबनेछेलै। सब कुल, देस, भसा आ जाति उपर अधिकार करैले देने छेलै। 8 मारलगेल थुमाके जिबनके किताबमे सन्सारके सिरिस्टी हैसे पहिने नाम लिखल लोकसब बाहेक पिरथिबीमे रहैबला सबकोइ ओइ जानबरके पुजा करतै। 9 जकरा कान छै, उ यि बात सुने! 10 यदि कोनो लोक कैदके लेल छै त ओकरा कैद कैरके ल्याजेतै आ कोनो लोकके तरबारसे मारैके छै त उ साँचोके तरबारेसे मारल जेतै। तैल्याके परमेस्वरके लोकसबमे सहैके सक्ती आ बिस्बास हेबेपरतै। 11 तकरबाद हम पिरथिबीसे निकलैत दोसर एकटा जानबर देखलियै। जकरा थुमा जखा दुइटा सिङ छेलै आ ओकर बोली अजेगर जखा छेलै। 12 दोसरका जानबर पहिल्का जानबरके लेल ओकर पुरे अधिकार चलाइ छेलै। पिरथिबी आ ओइमे भेल सब लोकसबके पहिन्का जानबरके पुजा करैले कर लगाइछेलै, जकर बहौत गैहर चोट निक भेल छेलै। 13 यि दोसर जानबर अजगुत-अजगुतके चेन्हासब देखाइल्कै। सबलोकके अगा उ अकाससे पिरथिबीमे आइग बरसेल्कै। 14 पहिन्का जानबरके लेल देखाइबला अजगुतके चेन्हासब दुवारा उ सन्सारके सब लोकसबके बहकेल्कै। तरबारके बहौत गैहर चोटसे निक भेल ओइ जानबरके सम्मानमे एकटा मुरती बनाबैके आदेस दोसर जानबर सन्सारके लोकसबके देल्कै। 15 पहिन्का जानबरके मुरती बोले आ उ मुरतिके पुजा नै करैबला लोकसबके माइरदेबे कैहके ओइ जानबरके मुरतिमे साँस फुइकदैके अधिकार अजेगर दोसर जानबरके देल्कै। 16 तब उ छोटका आ बरका, धनिक आ गरिब, स्वतन्तर आ दास सबके आपन देहना हाथमे या आपन-आपन कपारमे चेन्हा लगाइले लगाइल्कै। 17 यि चेन्हा ओइ जानबरके नाम या ओकर सङख्या छेलै। तब जतहेक लोकके उ चेन्हा नै छेलै, उसब किन-बेच करैले नै पाबैछेलै। 18 अइठाम बुइधके आबसेक छै, जकरा सोचैके सक्ति छै, उ ओइ जानबरके सङख्या जोरे कथिलेत उ एकटा लोकके नामके सङख्या चियै आ उ सङख्या ६६६ चियै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.