परकास 11 - मध्य पुरविया थारूदुइटा साक्छीसब 1 तकरबाद हमरा नापैबला लगी देल्कै आ कहल्कै, “उठ, परमेस्वरके मन्दिर आ बेदीके नाप ले आ ओते आराधना करैबलासबके गन्ती कर। 2 महज मन्दिर बाहरके अङनाके नै नाप कथिलेकी उ त गैर-यहुदी लोकसबके देलगेलछै आ उसब बयालिस महिनातक पबितर सहरके लतम-लत करतै रहतै। 3 हमर दुइटा साक्छीसबके एक हजार दुइ सय साइठ दिनतक बोराके बस्तर लगाके अगमबानी बोलैके सक्ती हम देबै।” 4 उ दुइटा साक्छीसब, दुइटा जैतुनके गाछसब आ दुइटा डैठसब चियै जे पिरथिबीमे राज करैबला परभुके अगा ठार रहैछै। 5 यदि कोनो लोक ओकरासबके नास करैले खोज्तै त, ओकरासबके मुहसे आइग निकैलके दुस्मनसबके नास करतै। तहिनङे कोनो लोक ओकरासबके बिगार करैके इक्छा करतै त, उ ओहै किसीमसे मारलजेतै। 6 उसब परमेस्वरके बचन सुनाबैतक पानी नै परे कैहके ओकरासबसङे अकास बन्द करैबला सक्तीछै। ओकरासबसङे पानीके भबसबके लहु आ इक्छा लागल बखत पिरथिबीमे हर तरहके बिपत आनैबला सक्तीछै। 7 उसब आपन गबाही दैबला काम ओरेलाकेबाद नरकसे निकैलके एल उ जानबर ओकरासबसे लराइमे जितके ओकरासबके जानसे माइरदेतै। 8 ओकरासबके लहास बरका सहरके रस्तामे परल रहतै, जते ओकरासबके परभुके सेहो कुरूसमे टाइङके मारने रहै, जै सहरके उदाहरनके रुपमे “सदोम” आ “मिसरदेस” के कहैछै। 9 सारहे तिन दिनतक हरेक देस, कुल, भसा आ जातीके लोकसब ओकरासबके लहास देखतै महज ओकरासबके लहासके गारैले नै देतै। 10 यि दुनु साक्छी दैबलाके मिरतु भेलाके कारन पिरथिबीके लोकसब खुसियाली मनाइतै। एक दोसरके उपहार पठाके आनन्द मनाइतै, कथिलेकी यि दुनु अगमबक्तासब पिरथिबीमे रहैबला लोकसबके बहुत दुख देने छेलै। 11 महज सारहे तिन दिनके बाद परमेस्वरसे जिबनके साँस ओकरासबमे ढुकलै आ उसब आपन टाङमे ठार भेलै, तब ओकरासबके देखैबलासबके बरका डर भेलै। 12 उ दुनु अगमबक्तासब स्वरगसे एकटा एहेन बरका अबाज सुनल्कै, “अते उपर या।” तब ओकरासबके दुस्मनसब देखते देखते उ दुनु बादलमे स्वरग दिसन चैलगेलै। 13 तखुन्ते एकटा बरका भुमकौन गेलै आ सहरके दस भाग खैसपरलै। उ भुमकौनसे सात हजार लोक मरलै। बाकी बचलहासब डरसे स्वरगके परमेस्वरके महिमा करल्कै। 14 दोसर बिपत बित्लै, “देख, तेसर बिपत जल्दिए एतौ।” सतमा तुरही 15 सातम स्वरगदुत आपन तुरही फुकल्कै त स्वरगमे बरका अबाज एहेन कहल्कै, “पिरथिबीमे राज करैके अधिकार आबसे अपनासबके परभु आ ओकर खिरिस्टके चियै आ उ जुगो-जुगतक राज करतै।” 16 तब परमेस्वरके अगा आपन आपन सिंहासनमे बैठैबला उ चौबिस धरमगुरुसब भुइयामे निहैकके एहेन कहैत आराधना करल्कै, 17 “हे सरबसक्तिमान परभु परमेस्वर, अहाँ जे चियै आ छेलियै, हमसब अहाँके धन्यबाद चरहाइचियै, कथिलेत अहाँ आपन महान अधिकार हाथमे लेनेचियै आ आपन सासन करैले सुरु करल्कै। 18 जाती जातीके लोकसब करोधसे भरलछै, महज आब अहाँके आपन करोध देखाबैबला समय एलछै, मरलहासबके नियाय करैबला समय एलछै आ अहाँके सेबकसब, अगमबक्तासब आ पबितर जनसब आ अहाँके डर मानैबला छोट-बरका सबके इनाम दैबला समय आ पिरथिबीके बिनास करैबलासबके नास करैके समय एलछै।” 19 तखन स्वरगमे परमेस्वरके मन्दिर खुल्लै आ ओकर मन्दिर भितर ओकर करारके सन्दुक देखापरलै। तब अकासमे बिजली चमैक उठलै। डरलागैबला अबाज सुनाइ देल्कै आ मेघके गरजन सुनेलै, भुमकौन गेलै आ बरका बरका पथल परलै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.