परकास 1 - मध्य पुरविया थारूजल्दीए हैबला घटनाके बारेमे 1 यि किताबमे भेल बातसब येसु खिरिस्ट परकट करने छै। परमेस्वर आपन सेबकसबके जल्दीए हैबला घटनासबके बारेमे बुझैले सके कैहके येसुके परकट करल्कै। येसु खिरिस्ट यि बात कहैके लेल एकटा स्वरगदुतके पठाके आपन सेबक युहन्नाके परकट करल्कै। 2 युहन्ना आपनसे देखल सब बात लिख्नेछै। उ परमेस्वरके बचन आ येसु खिरिस्टके देख्याल सत बातके गबाही अइ किताबमे लिखनेछै। 3 उ धैनके चियै, जे अगमबानीके यि बचनसब जोरसे अबाज निकालके परहैछै, सुनैछै आ ओइमे लिखल बातके पालन करैछै, कथिलेकी यि बात पुरा हैबला समय लगचियागेलछै। सातटा मन्डलीके युहन्नाके गोरलगी 4 एसिया परदेसमे भेल सातटा मन्डलीसबके युहन्नाके गोरलगी, परमेस्वर जे छै, जे छेलै आ जे एतै आ ओकर सिंहासनके अगा रहैबला सातटा परमेस्वरके आत्मासे तोरासबके अनुगरह आ सान्ती मिले। 5 बिस्बास योग्य साक्छी आ मिरतुसे सबसे पहिन्का बेर जिबित भेल सन्सारके रजा सबके रजा, येसु खिरिस्टके तरफसे तोरासबके अनुगरह आ सान्ती मिले। उ अपनासबके परेम करैछै आ आपन लहुसे अपनासबके पापसे छुटकरा देनेछै। 6 उ अपनासबके राज अरथात आपन परमेस्वर आ पिताके सेबा करैके लेल पुजारी बनाइनेछै। येसु खिरिस्टके महिमा आ सक्ती सबदिन रहे। आमेन! 7 देख, उ बादलमे आइबरहलछै आ हरेक लोक ओकरा देख्तै, उहोसब देख्तै जेसब ओकरा भालासे भोक्ने छेलै। सन्सारके सब जातीके लोक ओकर कारन बिलाप करतै। पक्का ओहिने हेतै। आमेन! 8 सरबसक्तिमान परभु परमेस्वर कहैछै, “सुरु आ अन्त हम्ही चियै।” हम उहे चियै, जे छै, जे छेलै आ जे एतै। परभु येसु खिरिस्टके दरसन 9 हम युहन्ना, खिरिस्टमे तोरासबके भैया चियौ। येसुमे बिस्बास करलाके कारन हम तोरासबसङे धिरज होके सहने चियै, जे दुख ओकर राजमे हैबलासबमे सेहो आबैछै। परमेस्वरके बचन आ येसु खिरिस्टके करल सतके बारेमे परचार करलाके कारन हमरा पत्मोस टपुमे कैद कैरके राखने छेलै। 10 परभुके दिनमे हम पबितर आत्मासे भरलछेलियै आ हमर पछा दिसन एकटा तुरहीके जखा अबाज हम अनङ कहैत सुनलियै। 11 “तु जे देखैचिही, से एकटा किताबमे लिख आ सातो मन्डलीके अरथात एफिसस, इस्मुरना, परगामम, थिआटिरा, सारडिस, फिलाडेल्फिया आ लाउडिकियाके पठा।” 12 हमरसङे बोलैबला के चियै कैहके हम पछा ताकलियै त हम दिया राखैबला सातटा सोनाके डैठ देखलियै। 13 हम डैठके बिचमे मानबके बेटा जखा टाङतक लाम बस्तर लगाइने आ छातिमे सोनाके चाकर-चौरस फिता लगाइने एक गोराके हम देखलियै। 14 ओकर मुर आ केस उनके जखा उजर या हेम जखा उजर आ ओकर आँख आइगके धिधरा जखा धधकैत रहलै। 15 ओकर टाङ आइगके भठ्ठीमे खारके चमकाइने काँसके जखा छेलै आ ओकर अबाज बाइढके पानीके आबाजके गरजन जखा छेलै। 16 ओकर दहिना हाथसे सातटा तरा पकरने रहलै आ ओकर मुहसे चोखगर दुधारके तलबार निकलल छेलै। ओकर चेहरा दुपहरके सुरुजके रौद जखा चम्कैत छेलै। 17 ओकरा देखके हम मरल जखा भेलियै आ ओकर टाङमे खैस परलियै। तखन उ हमर मुरमे दहिना हाथ राखैत कहल्कै, “नै डेरा, सुरु आ अन्त हम्ही चियै। 18 जिबित हैबला हम्ही चियै। हम मरल छेलियै महज आब सबदिनके लेल जिबित चियै, मिरतु आ पतालके कुजीसब हमर हाथमेछै। 19 अहै खातिर तु जे देखैचिही से लिख। अखन आ पाछु आबैबला सब घटना लिख। 20 हमर दहिना हाथमे तोहर देखल यि सात तरासब आ सोनाके डैठके रहस यि चियै, सात तरासब सात मन्डलीके देख-भाल करैबला स्वरगदुतसब आ सातटा डैठ सातटा मन्डलीसब चियै।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.