फिलिप्पी 4 - मध्य पुरविया थारूउपदेस 1 अहैलेल हे हमर पिरिय भाइ-भैयासब, तुहिसब हमर लेल पिरिय चिही। हम तोरासबके कतहेक याद करैत रहैचियौ। तुसब हमर आनन्द आ मुकुट चिही। हे हमर पिरियसब, अहिनङे तुसब परभुमे अस्थिर रह। 2 हम इयोदिया आ सुन्तुखेके परभुमे तु दुनु दिदी-बहिन एके मनके हो कैहके बिन्ती करैचियौ। 3 हमर बिस्बास योग्य सुजुगे, हम तोरा बिन्ती करैचियौ, कि अइ जनिसबके मदत कर, कथिलेकी यिसब हमर सङे-सङे सुसमाचारके काममे क्लेमेससङे आ हमर औरो सहकरमीसङे मेहनत करल्कै, जकर नाम जिबनके किताबमे लिखलछै। 4 परभुमे सबदिन आनन्द कर। हम फेनसे कहैचियौ, आनन्द कर। 5 तुसब सब लोकसङे असल बेबहार कर। परभु जल्दिए आइबरहल छौ। 6 कोनो बातके चिन्ता नै कर, महज खाचो परल चिजके लेल परमेस्वरमे परथना कर आ ओकर करल सब असल चिजके लेल धन्यबाद दहै। 7 तब लोकके समझसे बाहर रहल परमेस्वरके सान्तीसे तोरासबके हिरदय आ मनके खिरिस्ट येसुमे रक्छा करतौ। 8 अन्तमे, भाइ-भैयासब, जे बात सत छै, जे बात असल छै, जे बात नियाय संगत छै, जे बात पबितर छै, जे बात परेम योग्य छै, जे बात किरपाके योग्य छै, अरथात जे आदरके योग्य छै आ परसन्साके योग्य छै तैमे मन लगा। 9 तुसब जे बात हमरसे सिखलिही, गरहन करलिही, सुनलिही आ हमरमे देखलिही, ओहिनङे कर तब सान्तीके परमेस्वर तोरासबसङे रहतौ। भेटीके लेल धन्यबाद 10 हम परभुमे एकदम आनन्दित चियै। बहौत समयके बाद फेनसे तुसब हमरा वास्ता करलिही। अकर मतलब तुसब हमरा वास्ता नै करलिही कैहके नै कहैचियौ महज वास्ता करैके मौका नै मिलल छेलौ। 11 हमरा खाचो परलै कैहके नै कहैचियौ, कथिलेकी चाहे कोनोभी परिस्थितीमे हेबे हम सन्तुस्ट रहैले सिखने चियै। 12 चाहे अभाब हेबे चाहे परसस्त हेबे कनङके जिबन चलाइबै से बात हम सिखने चियै। अघाएलमे हेबे या भुखाएलमे हेबे, भरपुरीमे हेबे या कमीमे हेबे, कोनोभी परिस्थितीमे सन्तुस्ट रहैले हम सिखने चियै 13 खिरिस्टके देल सक्तीसे हम सबचिज करैले सकैचियै। 14 चाहे जे हेबे, तुसब हमर कस्टमे मदत कैरके एकदम असल करलिही। 15 सुरुमे हम तोरासबके सुसमाचार परचार कैरके माकेडोनिया परदेससे जाइले लागलियै त हमरा सहायता करैबला मन्डली तुहिसब मातरे छेल्ही। यि बात तु फिलिप्पी सबके थाहे छौ। 16 हम थेसलोनिके सहरमे रहै बखत हमरा कमी भेलै तखुन तुसब बेर बेर मदत करलिही। 17 हम तोरासबसे भेटी नै चाहैचियौ, महज तुसब जनङ मदत करलिही ओकर आसिस परमेस्वर तोरासबके देबे कैहके हम इक्छा करैचियै। 18 हम पाबैबलासे बेसी पाबनेचियै। इपाफोरोडिटसके हाथसे पठ्याल तोरासबके गमगम करैबला, परमेस्वरके मनपरैबला आ गरहन योग्य भेटी पाइबके हम सन्तुस्ट भेलचियै। 19 हमर परमेस्वर तोरासबके सब आबसेक्तासब पुरा कैरदेतौ। खिरिस्ट येसुमे भेल असिम भन्डारसे तोरासबके आबसेक्ता परल सबचिज पुरा कैरदेतौ। 20 आब अपनासबके परमेस्वर पिताके जुगो-जुग तलिक महिमा हेबे! आमेन। अन्तिम गोरलगी 21 खिरिस्ट येसुमे रहल सब पबितर लोकसबके हमर गोरलगी सुन्यादहै। अते हमरसङे भेल भाइसब तोरासबके गोरलगी पठाइनेछौ। 22 सब पबितर लोक आ खास कैरके रोमी सरकारके दरबारमे भेल सबलोक तोरासबके गोरलगी पठाइनेछौ। 23 परभु येसु खिरिस्टके अनुगरह तोरासबसङे रहे। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.