फिलिप्पी 3 - मध्य पुरविया थारूसत धारमिकता 1 अन्तमे भाइ-भैयासब, परभुमे आनन्द कर। यि बात तोरासबके घरी-घरी लिखैके लेल हमरा झनझट नै लागैछै आ तोरेसबके सुरक्छाके लेल चियौ। 2 कुतासब जखा झगरा करैबलासबसे, अधलाह काम करैबलासबसे आ खतना करैले परतौ कहैबलासबसे होसियार रह। 3 सत हिसाबसे खतना करैबला त हम्हीसब चियै कथिलेत पबितर आत्मासे परमेस्वरके आराधना करैचियै आ खिरिस्ट येसुमे हमसब गर्ब करैचियै। हमसब बाहरके कोनो रितिथितीमे भरोसा नै करैचियै। 4 तैयो हम आपनके त देहमे भरोसा राखैके कारन छै। यदि कोनो लोक देहमे भरोसा राखैके कारन छै कैहके सोचैछै त, हमर त औरो बेसी कारन छै। 5 जलम भेलाके आठम दिनमे हमर खतना भेलै। हम इजराएल जातिके, बेन्यामिन कुलके खाटी हिबरु चियै। बेबस्थाके बिसयमे कहबै त हम एक फरिसी चियै। 6 जोसके बिसयमे कहबै त मन्डलीके सताबैबला, धारमिकताके बिसयमे कहबै त बेबस्थामे भेल धारमिकतासे हम निस्खोट ठहरलचियै। 7 महज जतहेक बात हमर लेल लाभदायक छेलै, उ सब हम खिरिस्टके खातिर बेकार मानैचियै। 8 साँचोके कहबै त, खिरिस्ट येसु हमर परभुके चिन्हैले पाबैबला अनमोल बातके तुलनामे औरो सब बातके हम बेकार सम्झैचियै। खिरिस्टके पाबैले सकी कैहके ओकरलेल हम सबबातके नोक्सानी भोगने चियै आ सब चिजके मैला सम्झैचियै, 9 ताकी पुरा रुपसे हम ओकरमे एक भ्यासकी। बेबस्था पालन कैरके परमेस्वरके अगा हम धरमी हैले नै सक्बै महज आब खिरिस्टमे बिस्बास करलासे परमेस्वरे हमरा धरमी ठहराइल्कै। यि धारमिकता बिस्बासमे अरल छै। 10 हम खिरिस्टके औरो निकसे चिन्हैले आ ओकरा जियाइबला सक्तीके अनुभव करैले चाहैचियै। ओकर जखा दुख सहैले आ मरैयोले इक्छा करैचियै, 11 ताकी मरलहासबसे हम्हु जिबित हैले सकी। लक्छ दिसन अगा बढनाइ 12 हम लक्छमे पहिनेसे पुइग गेल चियै, या हम पहिनेसे सिध भेलचियै कैहके नै कहैचियौ, महज यिसब पकरैके लेल अगा बैढरहल चियै, जै बातके लेल खिरिस्ट हमरा चुनल्कै। 13 हे भाइ-भैयासब, हम लक्छमे पुइग गेल चियै से नै लागैये, महज हम एकटा काम करैचियै, कि पहिन्का बातसब बिसैरके अगा आबैबला लक्छमे पुगैले कोसिस करैचियै। 14 ओहैसे स्वरगके इनाम जितैके बिचारसे लक्छ दिसन अगा बरहैचियै। अकरे लेल परमेस्वर हमरा खिरिस्ट येसुसे अनन्त जिबनमे बोलाइनेछै। 15 अपनासब आत्मिक रुपमे परिपक भेलसबके ओहिने बिचार करेपरतै। ककरो ककरोमे फरक बिचार छै त परमेस्वरे तोरासबके परकट कैरदेतौ। 16 चाहे जे हेबे, हमसब जे बात पाबनेचियै तैमे बौकार भ्याके रह। 17 हे भाइ-भैयासब तुसब हमर देखासेखी कर। हमसब तोरासबके लेल असल नमुना बनलियौ। आब ओहै नमुना अनुसार चलैबला लोकसबके पछा लाग। 18 हम तोरासबके पहिनो बहौत बेर कहनेचियौ, अखुन हम कानैत कहैचियौ, कि बहुतो लोक खिरिस्टके कुरूसके दुस्मन जखा जिबन जियैछै। 19 बिनास ओइसबके अन्त चियै, पेट ओइसबके देबता चियै, लाज मानैबला बातसबमे उसब घमन्ड करैछै। ओइसबके मन सन्सारिक बातसबमे मातरे लागल रहैछै। 20 महज हमसब त स्वरगके नागरिक चियै। मुक्ती दैबला हमरासबके परभु येसु खिरिस्ट स्वरगसे एतै कैहके हमसब ओकर बाट ताकैचियै। 21 उ आपन सक्तीसे सब चिजके आपन अधिनमे लाबेसकैछै। ओकर यि सक्तीसे अपनासबके यि मैर जाइबला देहके ओकर आपन महिमाके देह जखा हैले परिबरतन कैरदेतै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.