फिलिप्पी 1 - मध्य पुरविया थारू1 हम पावल आ तिमोथी, येसु खिरिस्टके दास, फिलिप्पी सहरमे रहैबला परमेस्वरके पबितर जनसब, मन्डलीके रेख-देख करैबलासब आ डिकनसबके यि चिठी लिखैचियै। 2 अपनासबके परमेस्वर पिता आ परभु येसु खिरिस्टसे तोरासबके अनुगरह आ सान्ती मिले। धन्यबाद आ परथना 3 जब हम तोरासबके याद करैचियौ तब हम आपन परमेस्वरके धन्यबाद दैचियै। 4 हम तोरासबके लेल परथना करैबेर खुसीसे सबदिन परथना करैचियौ। 5 कथिलेकी तुसब सुरुवेसे अखुनतक सुसमाचारके काममे सहभागी चिही। 6 हमरा पुरा बिस्बास छै कि, परमेस्वर तोरासबमे एकटा असल काम सुरु करल्कौ, वह्या येसु खिरिस्ट आबैबला दिनमे उ काम पुरा करतै। 7 तोरासबके हम आपन हिरदयमे राखनेचियौ। तोरासबके बारेमे अनङ करनाइ हमरा ठिक लाग्लै कथिलेकी हम जहलमे रहैबेर आ बाहरमे रहैबेर सुसमाचार परचार आ अकरा जोगाइबला काममे परमेस्वरके देल अनुगरहमे तुसब हमरसङे सहभागी भेलचिही। 8 खिरिस्ट येसुवे जखा हम्हु तोरासबके परेम करलासे तोरासबके भेटैके एकदम इक्छा करनेचियै से परमेस्वर जानैछै। 9 हमर परथना एह्या चियै, कि तुसब परेम आ ठिक-बेठिक छुटयाबैबला बुइधमे झन-झन परसस्त कैरके बैढते जाय, 10 ताकि तोरासबमे असल कथी चियै उ छुटयाबैले सक आ खिरिस्ट आबैबला दिनमे तुसब सुध आ निरदोस हैले सक। 11 परमेस्वरके महिमा आ परसन्साके लेल येसु खिरिस्टसे आबैबला धारमिकताके फलसे तुसब भरिभराउ हो। पावलके बन्धनसे सुसमाचारके फैलल 12 हे भाइ-भैयासब, तोरासबके यि थाह हेबे कैहके हम चाहैचियै कि हमरमे जे बित्लै तैसे बहुतो लोकसबके सुसमाचार सुनैके मौका भेटलछै। 13 दरबारके सारा सिपाहीसबके आ औरोसबके सेहो हम खिरिस्टके बारेमे परचार करलाके कारन जहलमे परल चियै कैहके थाहछै। 14 हम जहलमे परलाके कारन बहुतो भाइ-भैयासब परभुमे साहसी भेलछै आ परमेस्वरके बचन निडर भ्याके परचार करैले साहस पाबनेछै। 15 कोइ कोइ डाह कैरके औरोसे बेसी करलियै कैहके देखाबैके लेल खिरिस्टके बारेमे परचार करैछै महज कतहेक लोक असल बिचारसे परचार करैछै। 16 सुसमाचारके पक्छमे बोलैके लेल हम अते चियै कैहके जानैबलासब यि काम परेमसे करैछै। 17 डाह करैबलासब सुध मनसे नै महज हमरा जहलमे औरो दुख दैकेलेल स्वारथ बिचारसे खिरिस्टके परचार करैछै। 18 चाहे जे हेबे, असल मनसे हेबे या खराब मनसे हेबे जनङकेभी खिरिस्टके परचार हैतरहे। हम अहैमे खुसी चियै आ खुसी मनाबैत रहबै। 19 कथिलेत हमरा थाहछै, कि तोरासबके परथनासे आ येसु खिरिस्टके आत्माके मदतसे हम छुटकरा पाब्बै। 20 हमर उटकट इक्छा आ आसा यि चियै कि हम कहियो लज्जित नै हेबै महज हमरमे परसस्त साहस हेतै। चाहे हम बाच्बै या मरबै सबदिन जखा अखुनो हमर जिबनसे खिरिस्ट सम्मानित हेबे। 21 कथिलेकी हमर जिबन जियैके मतलब खिरिस्टके लेल जिनाइ चियै महज मरनाइ हमर लेल लाभ चियै। 22 यदि हम जिते रहबै त खिरिस्टके लेल असल काम करैले सक्बै। महज जिबन कि मरन हम कथि चुन्बै हमरा थाह नै छै। 23 हम त दोधारमे परल चियै। बरु अइ सन्सारसे बिदा भ्याके खिरिस्टसङे रहैके हमर बरका इक्छाछै, कथिलेकी यि एकदम असल बात चियै। 24 महज तोरासबके लेल हम जिबित रहनाइ बहुत आबसेक छै। 25 हम एकदम निसचिन्त चियै कि तोरासबके बिस्बास आ आनन्द औरो बरहाबैके लेल हम बाच्बै आ तोरासबसङे रहबै, 26 ताकी हम फेनसे तोरासबलग एबौ त हमर खातिर तोरासबके येसु खिरिस्टमे गर्भ करैबला परसस्त कारन हेबे। 27 मुख बात यह्या चियै कि तोरासबके चाल-चलन खिरिस्टके सुसमाचार अनुसार सोहाइबला हेबे। हम चाहे तोरासबके भेट-मुलकात करी, चाहे दुर रही तुसब एकेटा उदेस्य ल्याके अस्थिर चिही आ एकेटा मन भ्याके सुसमाचारके बिस्बासके लेल मेहनत कैररहल चिही कैहके हम सुनैले पाबी। 28 तुसब बिरोध करैबलासबसे नै डरा। यि ओइसबके बिनास हेतै कैहके एकटा चेन्हा चियै महज तोरासबके उधार हेतौ जे उधार परमेस्वरसे आबैछौ। 29 कथिलेकी खिरिस्टके लेल तोरासबके यि देलगेलछौ, कि तुसब ओकरमे बिस्बास मातरे कैरके नै महज ओकर खातिर दुख सेहो भोगैले परतौ। 30 जे दुख कस्ट हमरमे देखलिही आ हमरसङे छै कैहके सुनैचिही, वह्या दुख कस्टमे तुसब हमरसङे चिही। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.