मरकुस 3 - मध्य पुरविया थारूसुखल हाथके निक करल्कै ( मती १२:९-१४ , लुका ६:६-११ ) 1 बादमे फेनो येसु सभाघरमे ढुक्लै। ओते सुखलहा हाथ भेल एकटा लोक छेलै। 2 कतौ उ बिसरामके दिनमे ओकर सुखलहा हाथ निक करतै कि कैहके ओकरा दोस लगाइबला फरिसीसब नजर पसारने रहै। 3 तब उ सुखलहा हाथ भेल्हा लोकके कहल्कै, “अते या।” 4 येसु ओइसबके कहल्कै, “बिसराम दिनमे भलाइ करनाइ कि खराब करनाइ, परान बचेनाइ कि मारनाइ, कोन उचित छै?” महज उसब जबाब नै देल्कै। 5 ओइसबके हिरदयके कठोर बिचार जाइनके दुखीत भेलै आ खिस्याके उ सबके ताकल्कै तब येसु ओइ लोकके कहल्कै, “तोहर हाथ पसार।” उ हाथ पसारल्कै आ ओकर हाथ पहिने जहिनङ छेलै तहिनङ भेलै। 6 तब फरिसीसब निकैलके गेलै आ ओकरा कनङके मारबै कैहके तुरन्ते हेरोदिसबसङे ओकर बिरोधमे सल्लाह करल्कै। 7 तकरबाद येसु आपन चेलासबसङे ताल दिसन गेलै आ गालिलसे लोकसबके बरका भिर ओकर पछा लाग्लै। 8 यहुदिया आ इदुमिया परदेस आ यरुसलेम, टुरोस आ सिदोन सहरसे आ यरदन लदी ओइपारसे चारुदिसनसे लोकसबके बरका भिर ओकर आस्चरजके कामसब करने छै से सुइनके ओकरलग एलै। 9 लोकसबके भिर नै किचे कैहके उ आपन चेलासबके आपन खातिर एकटा नाह तैयार करैले लगाइल्कै। 10 उ बहुतोके निक करलाके कारन बिमार भेल सबलोक छुबी कैहके ठेलम-ठेल करै। 11 जब दुस्ट आत्मा लागल लोकसब ओकरा देखै, तब ओकर अगा ठेङहुनिया द्याके चिच्याबै, “अहाँ परमेस्वरके बेटा चियै।” 12 महज हम के चियै से लोकसबके नै कहैले दुस्ट आत्मासबके करा आग्या देल्कै। बारह चेलासबके छानल्कै ( मती १०:१-४ , लुका ६:१२-१६ ) 13 तकरबाद येसु पहारमे चैलगेलै आ उ आपन मनपरैबला चेलासबके बोलाइल्कै आ उसब ओकरलग एलै। 14 तब ओकरे जरे रहैले आ परचार करैके लेल पठाबैले उ बारह गोरेके छानल्कै आ ओइसबके “परेरित” नाम देल्कै। 15 आ उसबके भुतो आत्मासब निकालैके अधिकार देल्कै। 16 उ बारहटा परेरितसब एह्या चियै: सिमोन, जकर नाम पतरुस राखल्कै, 17 जब्दियाके बेटासब याकुब आ युहन्ना, जैसबके उ बोअनरगेस, अरथात मेघ गरजनके बेटासब कैहके नाम देल्कै। 18 यहिनङे कैरके अन्दरियास, फिलिप, बारथोलोमाइ, मती, थोमा, अल्फयासके बेटा याकुब, थेदियस, सिमोन कनानी, 19 आ यहुदा इस्करियोती जे ओकरा धोखा द्याके पकराइने रहै। येसु आ बालजिबुल ( मती १२:२२-२३ , लुका ११:१४-२२ ) 20 तकरबाद येसु घर दिसन गेलै। तब फेनो अतहेक लोकसबके भिर जम्मा कि येसु आ ओकर चेलासबके खाइओ तक फुरसत नै पाबल्कै। 21 जब येसुके परिबार यि सुनल्कै, तब येसुके लैले उसब निकल्लै, कथिलेत ओकर मन आपन ठाममे नै छै कैहके उसब कहैछेलै। 22 यरुसलेमसे एल्हा धरमगुरुसब कहल्कै, “ओकरमे बालजिबुल नामके भुत छै आ ओहै भुतसबके मालिकके सक्तिसे भुतसब निकालैछै।” 23 महज उ ओइसबके आपनलग बोल्याके खिसा-पिहानीसबमे कहल्कै, “कनङके सैताने सैतानके निकाले सक्तै? 24 कोनो राजमे आपनमे फुट हेतै त उ राज नै टिकतै। 25 कोनो घरोमे आपनमे फुट हेतै त उ घर नै टिकतौ। 26 यदी सैतान सैतानेके बिरोधमे ठडा भ्याके फाटो लाबने छै त उ नै टिके सक्तै। महज ओकर बिनास आइबगेल छै। 27 कोइ नै बौकार लोकके घरमे ढुइकके ओकर घरके धन-सम्पती नै लुटे सक्तै जाबेतक ओइ बौकार लोकके पैहने बान्हतै, तब न उ ओकर घर लुटे सक्तै। 28 “साच्चोके, हम तोरासबके कहैचियौ, लोकसबके सब पाप आ परमेस्वरके दुर-छिया करैबला पाप समेत छमा करतौ, 29 महज पबितर आत्माके बिरोधमे दुर-छिया करैबलाके कोनोभी हालतमे छमा नै हेतै, महज उ अनन्त पापकरमके दोसी ठहरतौ।” 30 येसु यि बचन ओइसबके कहल्कै, कथिलेत “ओकरमे असुध आत्मा छै” कैहके उसब कहने छेलै। येसुके माँ आ भाइसब ( मती १३:१-२३ , लुका ८:४-१५ ) 31 तब ओकर माँ आ ओकर भाइसब ओते एलै आ बाहरेमे ठार भ्याके ओकरा बोलाइले पठाइल्कै। 32 लोकसबके भिर ओकर अगल-बगलमे बैठल छेलै तब उसब ओकरा कहल्कै, “देखु, अहाँके माँ आ अहाँके भाइसब अहाँके बाहरमे ताकैछै।” 33 येसु ओइसबके जबाब दैत कहल्कै, “हमर माँ आ हमर भाइ के चियै?” 34 तब आपन अगल-बगल रहल लोकसबके देखके कहल्कै, “हमर माँ आ भाइसब यिहेसब चियै! 35 कथिलेत जे परमेस्वरके इक्छा पालन करैछै, उहे हमर माँ आ हमर भाइ आ हमर बहिन चियै।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.